《我老婆唔係我女朋友》【那些年／九十年代學界／真人】 第七章全新中篇！: 【第八章】 足球狂熱（１）
足球狂熱
星期五如常進行巡舗工作，3點又返到士多開檔，不知道是不是那張貼門口的臨時營業的告示傳開了，開舗不到15分鐘就陸續有客上門，不過【神都】港女筠卻是第一個。
「喂哥仔，還麻雀呀。」港女筠西口西面的說。
我望著她好像見到《殭屍先生》電影裡面嗰啲殭屍造型，面青唇白死魚眼，扮熊貓唔使化妝。「呵？遲咗兩日喎，要補返60呀。」
「得啦～打足四日，輸足四日呀。喂，順便畀包煙仔，誒…『黑貓』吖。」一貫港女本色。
咦，買煙？我自己唔食煙，真係唔知埞喎。
「誒…唔好意思，可唔可以指點一下。」我示意她望望老古董上邊那個煙倉。
她稍微盯我一眼，緩緩的逐一說明：「你睇老闆都分好晒嚟擺喇，同一價錢都放一堆啦，嗱左面開始萬寶路、沙龍、健牌、駱駝，黑貓呀，（我：呢包？）係呀，順手攞包嚟啦，跟住登喜路、三個五呢啲全部24，希爾頓、紅雙喜、雲絲頓、良友、溫拿19個半，順手送個火機啦，啱喇，買煙例牌跟個火機嘛。」
雖然她西著面講解，但仍然都相當仔細，並且十分畀面無「嘖」我，顯然是記得我初嚟步到乜都唔識。
「噢，唔該晒，即是一共84，畀返張學生證妳先。喂咁幫手，我請妳飲支汽水啦。」我繼續慷阿心之慨。
港女筠也老實不客氣：「啊呀～多謝喎。」點了煙後，全自助式招呼自己。