《我老婆唔係我女朋友》【那些年／九十年代學界／真人】 第七章全新中篇！: 【第七章】 第二苦主（１）
第二苦主
我有點好奇從Lulu的角度去看，當年又是甚麼回事呢，遂頑皮的追問：「因乜事隔日就去游水呀，佢想減肥咩？」
「係鬼呀，我覺得佢好似約咗人噉，只係一直等唔到，問佢又唔肯講。喂，你唔問我點知佢約咗人嘅？」呢條囡話匣子打開後就不得了，話題連消帶打，尤如爆水喉一樣，噴發出嚟。
「係嘅，係嘅，噉妳點知佢約咗人呢？」我忙不迭的順應民意。
「佢呀，山長水遠去九龍公園游呀，仲隔日就去添呀！明明石硤尾去李鄭屋或者呢度深水埗近好多啦（Lulu未搬之前都是住大坑西的）。去到泳池又成日四圍望，成舊望夫石噉，我見佢好似悶悶不樂噉先無再追問咋。」Lulu連珠炮發，看來這事情困擾她好多年了。
我想起「九龍無仔」的誤會，不禁噴飯式的笑了出來。Lulu有點懷疑：「有咩咁好笑呢又？」
既然Lulu都是我這個「薄倖仁」的間接受害者，似乎我都應該交代一下，無奈的苦笑：「無…妳講望夫石，諗起佢個樣啫。不過我想話應該係九龍仔公園，唔係九龍公園囉。」
她聽完後似乎一時未能聯想起來：「乜嘢九龍仔呀，我哋嗰陣係去九龍公園喎…欸？等陣，你話佢約咗嗰個人應該喺九龍仔泳池先啱？佢話你知㗎？佢無理由特登去錯地方㗎，仲要帶埋我一齊去錯？玩嘢咩？」一貫機關槍式的發問方式。
「唉～真係一言難盡。」於是我將當年在泳池邊的事，簡略地覆述一下。