《我老婆唔係我女朋友》【那些年／九十年代學界／真人】 第七章全新中篇！: 【第七章】 林心穎密碼（２）
Leon聽到後反應很大：「吓？！你蒙主感召，皈依老耶呀？你問你條囡嘛，我點會有聖經呀，仆街你問我有無寫真集都仲可能有吖。」
確實在93年，不論是陀地或是東洋女星（少部份男星也有的）都紛紛推出寫真集，陳N倫、周W敏、李L珍、葉W儀等等，是出版寫真集的黃金時代。
「唔係呀，查嘢啫。」我不太想告訴他真相，因為確實是老尷的。「唉～佢哋闔家去咗旅行啦。」
「喂唔係喎，你樓下有教堂嘛，門小你面懵懵行入去咪有聖經囉。」Leon提供了一個不甚體面的方法。
咦，又係喎，都係條友精明。
收線後將「心之密碼」抄起，落樓下教堂襯吓。在【聖多馬堂】門口又看見那派傳單的阿姨，硬著頭皮行埋去直接問她。「誒…唔好意思，我想問吓呢段係唔係聖經嘅引文？」
阿姨有點愕然但仍相當友善，先將傳單收好，細心的閱讀並思索了一會才說：「你前面有個符號我唔知係乜嘢，但第二個字係引用個『四』字，我印象中聖經好似無呢啲章節喎，後生仔你要唔要我入去搵人幫你查清楚啲呀。」
瘦妹明知我唔好呢味嘢，我自己也估計佢唔會要我查經的。「喔～唔…唔使喇，我估應該都唔係嘅，唔該晒。」連隨多謝阿姨幫忙。
「後生仔，我哋今晚有聚會喎，得唔得閒嚟聽吓呀。」阿姨打蛇隨棍上。
「呃，唔好意思呀，我一陣要開工，下次先啦。」