【校園／愛情】戀上鄰家女孩（布甸篇）: 95. 雙腳似未學會走

「可能咁樣對曉琳都係一件好事。」呢個係我第一時間嘅反應。

「你係咪時候要同我講返，你哋三個之間頭先發生咗咩事？」

就係咁，我向Miss Chan講返頭先我哋三個喺社房事發嘅經過，但當然係經過修飾嘅故事，譬如曉琳當住子瑜面前錫我嘅呢幕，我就含糊帶過就算，始終曉琳喺老師嘅眼中係個乖學生，就算我哋分咗手我都唔希望破壞佢建立已久嘅良好形象。

「所以，我覺得曉琳辭職唔做聖誕party同女班長，對佢嚟講，都係一個機會可以俾佢放低我哋呢段感情？」

「起初我以為你兩個小朋友只係嗌下交，一時意氣用事過多陣就無事，睇嚟我一早就唔應該應承曉琳俾佢幫你搞聖誕party。」





「都唔係嘅…我覺得呢啲事遲早都會發生，早晚我哋都係要面對…」

「你識得咁諗，都係一件好事嚟嘅，不過…個聖誕party都係要搞㗎！就算無咗曉琳，你本身應承咗我會幫手，就無得甩底㗎啦，你唔同我做得好好睇睇嘅話，哼…到時你就知味道。」

最後Miss Chan露咗一個奸狡嘅笑容，就此放過我俾我放學，唔知點解呢刻，我有種連我自己都解釋唔到嘅感覺湧上心頭，似係釋懷？但又帶點傷感，總之就係百感交集。

而當Miss Chan離開咗課室之後，四周圍又回復一片沉寂，不過呢頭Miss Chan走咗無耐，嗰頭我就睄到子瑜匿喺課室門口鬼鬼祟祟咁，剩係伸個頭入嚟望我，搞到我忍唔住噗哧一聲笑咗出嚟。

「笑咩喎！？」子瑜俾我發現咗之後，就索性走入嚟氣沖沖咁一巴掌車落我個頭度。





「無笑你啊，覺得你好可愛咋嘛，做咩匿喺出面唔入嚟啫？」

「見你望住塊壁報板望到入晒神，唔好意思打擾你啦。」子瑜又擠出佢嘅招牌表情，我企起身走埋去想篤佢個腮嗰陣，佢就叉住手擰歪面避開我攻擊。

「子瑜你唔好呷醋啦，依家全校都知道你先係我最鍾意嘅女人。」

「唔要啊！邊個俾你鍾意我！哼哼！不過呢，你同曉琳呢兩張大頭相真係好搶眼，我每次經過你哋班房，望到你哋塊壁報板嘅時候，都忍唔住會望多兩眼。」

「我知喇，其實你係想望我。」我伸隻手過去搣佢面珠墩啲肉。





「先至唔會想望你囉，係都望曉琳啦。我問你吖，話說頭先喺社房嗰陣，我走咗之後，你同曉琳之後點？點解最後你會用學校廣播搵我㗎？你唔怕佢會聽到咩？」

我都估到呢個問題子瑜遲早會問，但係我亦都唔介意向子瑜坦白從寬。

「你走咗之後，我就即刻諗住追出嚟搵你，點知曉琳捉住我唔放，雖然最後我都成功擺脫到，但我始終唔放心留低佢一個女仔喺社房，所以即刻打俾芯玲叫佢返嚟睇住佢，我用個廣播器嘅時候，芯玲已經同咗我講佢同曉琳出咗去散心，所以曉琳應該聽唔到段廣播…」

跟住我仲同子瑜講埋，頭先Miss Chan捉我上嚟課室，其實最主要係同我傾，曉琳唔想再做聖誕party嘅搞手，仲有辭退女班長嘅事。

「唉，早知道係咁，我就唔多事上嚟社房搵你啦，結果我又搞到曉琳唔開心。」

「子瑜啊…你唔好咁啦，其實呢件事我哋大家都有份造成，唔可以怪邊一個，如果樂觀啲諗，依家有芯玲陪住佢，我諗應該無事嘅。」

「你小心啲啊，芯玲身邊有咁多男仔friend，到時候佢介紹一兩個俾曉琳識，到時就唔方你唔樂觀喇！」

「我唔怕啊，又唔係介紹俾你識。」





「咁我都叫芯玲介紹下啲靚仔俾我識先。」然後子瑜孭住個書包仔轉身衝咗出走廊。

「唔俾啊！」我一手捉住佢書包，唔俾佢走得快過我。

「點解唔俾先？」

「因為我…」我一時三刻又諗唔到點樣反駁…

誰不知子瑜突如其來停低腳步，沉吟不語無再出聲。

「子瑜？」我亦都跟住佢停低腳步，企喺佢後面，明明上一秒子瑜仲喺度嘻嘻哈哈，做乜依家又無端端靜咗落嚟。

「黃子瑜？」我再一次探問。





「喂喂，陳佑男。」子瑜連把聲都忽然間變得好認真。

「做咩？」

「我想為曉琳做返啲嘢啊，我想…追返我曾經嘅好姊妹返嚟，你可唔可以陪我一齊？」子瑜回身捉住我手。