【校園／愛情】戀上鄰家女孩（布甸篇）: 94. 即使那日放了手

「黃子瑜！！既然你自己申請俾人罰，咁你都留喺度寫悔改書啦！你企嗰邊寫！唔准再黐住陳佑男！」訓導主任指住走廊嘅另一邊，失咗控咁怒吼。

「對唔住啊子瑜，連累咗你。」我細細聲向住子瑜道歉。

「我唔介意啊，同甘共苦咋嘛。」子瑜又細細聲安慰返我。

子瑜你真係一個好女仔…

雖然我同子瑜依家各自各埋頭苦幹寫緊悔改書，但只要我哋知道對方喺身邊，其他一切都顯得次要。





又係嘅…我同子瑜耐唔耐就擰轉頭偷望對方，我諗，其他人望到肯定覺得我哋似打情罵俏，多過似俾老師罰緊留堂。

無幾耐，我同子瑜都寫好篇悔改書，至於個內容都係嗰三幅被，訓導主任收咗我哋篇悔改書，望都無望，就叫我哋一人一邊靠牆罰企，臨走之前再三警告我哋唔准傾偈。

我就無咩所謂啊，呢一刻，我哋只係隔咗一條學校走廊嘅寛度，面對面望住對方，心裡面就甜絲絲，原本我以為見唔返子瑜之餘仲要自己一個留堂留到天昏地暗，誰不知子瑜突然出現不特止，仲肯陪我一齊留堂。

之不過，個傻妹依家望住我偷笑緊啲咩？咬住嘴唇含羞答答咁笑，個樣鬼死咁可愛，行過去問吓佢先。

「黃子瑜，你陰陰嘴笑緊咩啊？」我完全無視訓導主任叫我罰企嘅命令，直接走過對面質問下個衰妹。





「無啊，邊有啫。」吖你個衰妹竟然擰歪面唔認賬。

「明明見住你笑。」

「無啊無啊～係你眼花睇錯咗咋。」黃子瑜你仲狡辯！？就係呢秒鐘我又見到你偷笑。

「我眼花？」

「你…你呀，走過嚟做咩喎？小心訓導主任因間出嚟捉走你。」正當我諗緊點樣篤穿佢偷笑嘅原因，居然俾子瑜反客為主。





「你想我俾人捉走咩，你唔會掛住我咩？」我唔會俾你搶返個主導權㗎！

「哼哼！乜你咁自戀㗎，邊個會掛住你喎！？」子瑜又嘟起嘴巴，兩邊腮充滿氣脹脹的。

「你囉，我想你掛住我得唔得？」我試圖捉住子瑜隻手仔想溶化佢個心。

「唔要！！」但佢就將兩隻手翹喺背脊後面，偏唔俾我捉。

不過我見子瑜依家塊面早已經紅粉緋緋，我心血來潮有股衝動，想哄埋去錫落佢面珠墩度…

忽然間，有個身影喺校務處裡面行出嚟，嚇到我即刻彈返埋自己位，好彩嗰個身影係我班主任Miss Chan。

「喂你兩個可唔可以唔好咁黐纏啊，睇少你嘅一陣就喺度打情罵俏。」

「Miss Chan，陳佑男佢蝦我。」子瑜竟然仲要指住我告狀。





黃子瑜，我真係俾你激死…你搞到連Miss Chan都忍唔住揞住嘴偷笑。

「哦！？有啲咁嘅事？欺負女同學，罪加一等。」然後Miss Chan不懷好意咁望住我。

「冤枉啊…」黃子瑜…你同Miss Chan咁快就可以連成同一陣線，女人真係可怕…

「子瑜，今次呢件事其實你都係無辜，始作俑者都係呢個衰仔，所以你可以放學先喇，我仲有事要同我個男班長好好咁傾吓。」Miss Chan眨眼間就收起笑容，回復返老師平時正經嘅威嚴。

子瑜都唔敢再嬉皮笑臉，慢慢揹返起個書包，從佢嘅眼神我知道，呢個衰妹係唔捨得我嘅，但無辦法，我要俾Miss Chan帶去另一個地方準備受死。

「唔使望喇，個傻妹九成九會留喺學校等埋你。」

「Miss Chan你咁好眼力嘅…」明明你喺我前面行緊，咁都俾你見到我有偷偷地擰轉頭望向子瑜。





結果，Miss Chan帶我上返嚟我哋班個課室，呢個鐘數成間學校啲同學都散得七七八八，外面操場嗰四盞大燈都著晒，意味着天色都開始昏暗。

「男班長，你估下今次俾人記咩過？」Miss Chan一坐低就入正題。

「我諗…至少都小過？」

「你知就好啦，上次陸運會已經記咗一個小過，今次又記多一個，兩個小過就變成一個大過，兩個大過學校就有機會考慮移除你學藉，你知㗎可？不過我叫你上嚟並唔係想講呢啲。」

「吓？咁係…？」

「不如你又估下，當你用緊學校個廣播器，好有型咁向住子瑜示愛嗰陣，我收到個咩電話？」

聰明如我，都大概估到Miss Chan想講邊個，亦都知道點解佢叫子瑜放學然後捉咗我上嚟呢度。

「係曉琳…？」





「哈哈，一早就知你係醒目仔，無錯啊，我都唔同你轉彎抹角喇，我直接話你知曉琳打俾我講啲咩，第一佢話佢想退出唔再幫手做Christmas party，而第二就係佢想辭退女班長呢個職位。」