【校園／愛情】戀上鄰家女孩（布甸篇）: 90. 微風帶著你重臨
然後有一日禮拜五，我差啲俾芯玲三姊妹周到我同子瑜私底下約食晏，話說嗰日我原本真係約咗子瑜，但因為佢晏咗落堂，所以叫我喺我哋嗰間舊式茶餐廳坐住等。
當我去到坐低嗰陣，茶餐廳老闆見到我已經慣性咁放低兩杯水同兩份餐具，幫我照舊落完單之後，我就收到個電話。
來電顯示：余芯玲
咩事…？
「喂！你去咗邊度食啊？」「邊間啊！？」「係咪自己一個！？我哋又嚟得唔得！？」唔係我手殘唔記得隔行，而係佢哋三姊妹真係七嘴八舌一輪嘴咁講。
「欸…」
「你可以講㗎喇，邊間啊？我哋過嚟搵你食。」終於剩係得返芯玲把聲。
「啊，我喺…」心虛之下，我居然將依家身處嘅地方報咗出嚟。
「哦～我知邊度，咁你幫我哋留多三個位啦。」
「吓？你哋真係嚟㗎？」咁亂嚟都得㗎咩？
「咩啫，你唔歡迎我哋咩？好啦唔講住先啦，收線啦拜拜。」
我真係想知究竟發生咩事，點解無端端會多咗三個女仔過嚟同我食飯，但呢刻我有樣更加重要嘅事要決定，就係咁子瑜點算好。
依家個情況係，子瑜過緊嚟，芯玲三姊妹都過緊嚟，咁到時候就會穿煲，芯玲就會知道我同子瑜單獨約食晏呢個秘密，再加上家樂嘅關係，短髮妹妹一向視子瑜為情敵，我怕佢兩個見到面分分鐘會演變成一場腥風血雨。
情急之下，我諗到嘅辦法唯有係咁…
「喂，子瑜？」我即刻拎起部手機撥個輪俾佢。
「做咩啊？唔好催我啦，行緊過嚟啦。」
「唔係呀，而係我想講，我今日可能同唔到你食晏…」
「吓？點解嘅？你未落堂咩？」
「我到咗茶餐廳坐低咗㗎啦，係因為無啦啦芯玲同佢兩個frd話要同我食，佢哋依家過緊嚟，你過嚟嘅話會撞到佢哋。」
「哦…咁…你想我點…？」我聽得出子瑜嘅失落。
「不如…我哋再約吖。」
「咁你食得開心啲啦。」
當子瑜收咗我線之後，我有啲後悔落咗個咁嘅決定，但我都已經別無他法，咁嘅情況好似除咗犧牲子瑜之外都無第二啲辦法，總唔能夠俾佢哋出現喺同一個地方。
趁芯玲三姊妹未嚟到，我叫老闆再俾多兩份餐具我，咁張枱加埋就有四份餐具，我都唔知自己點解要諗到咁周到，呢三個女仔無端白事話要過嚟搵我食晏，肯定唔方係好事，我已經有預感一陣個情況唔容易應對。
「喂條友仔喺嗰邊啊！」
呢頭講完嗰頭就到，一聽把聲就知係芯玲，然後就成班女就坐晒埋嚟，芯玲一馬當先坐我隔離，另外兩個妹妹坐我對面。
「有咩食㗎呢度？」短髮妹妹搶咗張餐牌嚟睇。
「你咪霸住張餐牌啦。」跟住圓框眼鏡妹妹伸手搶返張餐牌，我依家先留意到原來佢換咗副新嘅金絲眼鏡。
當兩個女仔好似細路女咁爭餐牌嗰陣，冷不防我大髀俾人兜野咁摙咗一下，痛到我差啲叫出嚟，唔使問都知係芯玲做嘅好事。
「我又要睇！」
我仲以為芯玲有嘢想同我講，點知佢摙完我就當無事發生若無其事咁同兩個女仔一齊睇有咩食。講真有乜好睇吖，當我碗沙嗲牛肉麵送到埋嚟嘅時候，個個都話好香好香跟住就抄我食同一樣嘢。
「呢間茶餐廳超舊，仲有少少污糟又無冷氣，夏天肯定會熱死。」金絲眼鏡妹妹左望右望。
「吓？無啊，路過見到咪入嚟試吓。」我希望老闆唔會喺呢個時候篤穿我。
「仲要呢度張餐巾係呢種油紙，都唔知點樣拎嚟抹嘴。」短髮妹妹插多把口入嚟吐糟。
你兩個女仔亂入搞到我要放子瑜飛機我都算喇，仲要喺度嫌三嫌四，芯玲雖然無同佢哋一齊吐糟，但佢成餐飯都係坐我隔離，我連拎起個手機睇吓子瑜有無搵我嘅機會都無，唔知道佢去咗邊度食，又唔知道佢依家係咪嬲緊我，不過多數都係㗎喇…
食飽飽就去埋單，返學校嘅途中芯玲故意殿後同我行埋一齊，正所謂芯玲行得慢，肯定有古怪...
「你今日真係自己一個食嘅？」芯玲個樣完全係不懷好意。
「係啊...」
「真係嘅？」
「呃你做乜。」
「嘻嘻～對唔住喇，阻住咗你同人哋幽會。」芯玲批肘撞我手臂細細聲講。
頂你個衰妹吖，你唔講出嚟猶自可，原來你根本就知道我同子瑜食嘅，仲要喺度奸笑，信唔信我將你就地正法！
「唓你一早知嘅，咁你做咩仲要專登帶埋佢哋兩個過嚟喎，搞到我要臨時臨急放子瑜飛機。」
「哈哈，原來真係子瑜！！」
「吓？」我俾芯玲佢擺咗一道？
「好嘢終於解咗我一個心結。」
「喂你唔好咁大聲先啦！」
「我估咗好耐㗎啦，多謝你提供答案俾我，但你放心啦我唔會爆出去㗎～」芯玲講完之後就雙手翹後，三兩下小跳步快步行返去會合佢兩位妹妹。
少年我真係太年輕，對住芯玲真係無咩可以隱瞞到佢，雖然我知道佢一直都好關心曉琳同子瑜，我信佢會幫我哋守住呢個秘密嘅，依家俾佢知道咗反而好似有種釋懷，況且有時候我都唔係好知點解我要隱瞞住，我同子瑜嘅關係，真係唔見得光咩？
返到學校之後，本來我趁仲有少少時間先打鐘，諗住過去八卦望下子瑜返到班房未，點知就俾Miss Chan捉住咗我。
「喂男班長，你間課室喺呢邊喎，你鬼鬼祟祟咁行過去文科班嗰邊做咩？」
「欸…」
「你落嚟教員室先啦。」
唉，心諗我咁都要俾Miss Chan罰，唯有死死地氣跟住佢落教員室，但點知去到教員室門口嗰陣，Miss Chan就笑笑口對住我。
「算啦唔玩你啦，同你講返正經嘢，我搵你嘅原因係，嚟緊月尾要搞Christmas party，上晝留喺課室玩聯誼活動，下晝就全體落禮堂聽sing con，咁你幫我諗諗計嗰日朝早有咩好做啦，你知㗎啦，你應承咗我嚟緊半年都要幫手搞活動㗎嘛，今次就俾個committee你做，但你放心，已經有人舉手自願做你partner。」
「Miss Chan，咁係邊個？」
搞活動我就無咩所謂，當有啲細藝打發下時間都好，不過邊個做partner就好大影響，你知啦唔係個個都夾得埋㗎嘛。
「咦，到啦，喺你後面。」
究竟係邊個呢？
我回身一望，係一個熟悉不過嘅女仔身影，亭亭玉立著住套冬季校服笠埋件海軍藍冷衫，帶住一種渾然天成嘅氣質。
我個partner，竟然係曉琳。