【校園／愛情】戀上鄰家女孩（布甸篇）: 89. 秋分過後的那天

「喂喂！你點啊？」電話另一邊嘅子瑜問。

「冇啊…」

「你同曉琳講咗喇？」

「嗯…算係嘅。」

「你點同佢講？」子瑜問。





「我咪直接話…我鍾意嘅人其實係你，」

「吓，咩…咩呀，依家邊個俾你同我表白喎？唔理你啊，我…啱啱探完黃子俊啊，你食咗嘢未啊？要唔要一齊食晚飯？」

「但係我依家真係無咩心情食，我想自己一個人靜一靜，摺埋一下先…」

「哦…咁好啦，咁我自己去搵啲嘢食…」

我唔係有心拒絕子瑜嘅好意，我明明聽得出電話另一邊嘅子瑜有種失望嘅感覺，但呢刻嘅我，真係再無氣力去照顧任何一個人嘅情感。





返到屋企之後，我都無精神去思考其他嘢，迷迷糊糊嘅狀態之下就瞓著咗，直至到第二朝鬧鐘響。

嗶嗶嗶嗶———

簡單梳洗過後，揹埋書包就出門口，點知一打開鐵閘就撞到子瑜，我想講嘅係呢個情況呢個學期係絕少機會發生，咁突然我霎時間都唔知俾咩反應好。

「哼！」結果一大朝早就俾子瑜嫌棄我。

跟住佢就無理過我，閂埋門之後就自己行去大堂，我就喺佢後面跟住。入到𨋢之後，個衰妹就全程嘟起個嘴擰歪面。





「子瑜你嬲咗我？」

「冇啊。」

「冇嘅話做咩擰歪面？」見佢兩邊腮又脹起咗，我就伸隻手過去想篤下。

「喂吔，咪搞啦。」結果俾子瑜一手擋開咗。

「唔得呀我見到就好想篤落去。」我懶理子瑜擋格，繼續搵空隙進攻。

「你心情咁快好返喇咩？尋晚又對人咁冷淡。」子瑜一邊退後一邊避開我。

「邊有喎？」我隻手無停過咁篤佢塊臉。

「咪整啦，有人望住㗎。」





「呃我？無人喎架𨋢。」定係你計埋個閉路電視？

不過下一秒我就知又中計了，子瑜趁我唔為意之下又一腳踢埋嚟，我哋兩個好似小朋友咁郁嚟郁去，差啲搞到困𨋢，諗諗吓我本來以為分完手之後心情會好差，但當見到子瑜又無晒呢啲煩惱。

「喂，我問你吖，分咗手係咪會好傷心？」離開屋邨範圍之後，仲要行多一段路先進入學校附近嘅範圍，子瑜篤一篤我手臂問。

「講真吖，我又無話好傷心…我都唔識講，反而好似有種釋懷嘅感覺？」

「吓你咁衰嘅，我睇啲愛情小說呢，啲男女主角分咗手都會好傷心好唔捨得對方，次次我都會睇到喊㗎。」子瑜用鄙視眼神望住我。

「你唔好睇咁多小說啦，遲早睇壞你個腦。」我輕輕力用手指篤返佢頭。

「你個腦就壞，不知幾好睇，同埋我又未拍過拖，我點知道分手嘅感覺係點喎。」





其實連我自己都唔知道分手嘅感覺應該係點，但係我諗每個人對於分手呢回事都會有唔同嘅感受？唔知道依家曉琳又點呢？

「做咩啞咗唔講嘢嘅？」子瑜見我無反應，又嚟伸隻手指篤我手臂。

「無啊諗緊嘢咋嘛。」

「諗緊咩？」

「諗緊究竟分手係一回咩嘅事，拍拖又係一回點樣嘅事，點解兩個人互相鍾意對方就會喺埋一齊？」

「鬼知道咩，你同個A0講呢啲好唔好意思㗎？」子瑜收返起篤我嘅手指，變咗自己篤自己手指。

「小姐你唔好唔記得你邊度係A0，明明中一嗰陣就俾你逼我做過你男朋友！」我一嘢敲落子瑜頭頂度。

「唔計啊！！嗰次唔算數啊！」佢俾我突如其來嘅一擊嚇到縮咗一下。





「咁邊次算數？」

「點知你。」跟住子瑜就急急腳向前跑走咗，唔知點解今次我並無本能反應咁即刻追住佢，而係維持住我原本嘅步伐，望住子瑜一路向前跑嘅背影，晨曦光線照住佢嘅身影，細細粒嬌滴滴咁條馬尾左捹右捹好可愛。

「喂！我去買早餐啊，你要唔要一齊買啊？」子瑜跑多兩步就回頭望返過嚟。

「黃子瑜等埋我！」我再次追上去呢個女仔面前。

追到上去，我先發現原來子瑜塊面早就紅卜卜，係陽光照射曬到佢咁吖？定係呢個平時唔多做運動嘅衰妹跑多兩步就血管充血，我都唔知道。

而你問我，咁樣係咪等於將子瑜追到手？同樣我都唔知道，不過我同子瑜之後可以話係相依為命，事關我哋兩個喺學校個朵已經臭到無得再臭，身邊嘅朋友都所剩無幾，同級同學都開始察覺到我同曉琳已經散咗。

自陸運會嘅嗰件事之後，我係一個公開拋棄女朋友嘅渣男，而子瑜就係個背後勾人男朋友嘅婊子。





不過我同子瑜喺學校範圍內都盡量避免有任何交集，仲嫌花生唔夠多咩？至於嗰間舊式茶餐廳呢，就變成我同子瑜食晏嘅地方，連老闆都成日笑我哋兩個係一對，喺嗰度，真係會令我產生一種錯覺好似同緊子瑜幽會咁，而且我哋總係要前後腳偷偷摸摸咁喺學校外面會合，咁嘅情況不知不覺又維持咗半個月。

好快又去到深秋，涼風一日比一日送爽，慢慢開始分唔到依家係秋天定係冬天，學校出咗通告話下個禮拜轉冬季校服，我喺衣櫃摷返套長袖恤衫出嚟，男仔嗰套冬季校服其實同夏季無咩分別，差別只係在於短袖同長袖之分，女仔嗰套就由白色校裙，變成白色長袖恤衫加條灰色背心連身裙，仲要戴埋條深藍色嘅領呔，而我覺得最大嘅分別係，感覺上班女仔每逢冬天就會成熟咗，唔知道係因為大家又大咗一歲嘅關係，定係套校服俾我嘅錯覺。

而呢一日，上緊堂嗰陣就忽然間俾芯玲問我晏晝去咗邊度食Lunch。

「吓…無啊，咪去咗轉角位嗰間車仔麵檔食。」俾芯玲失驚無神咁問，我都佩服自己咁機智作到個大話。

「嗰間出咗名難食你都食嘅。」

「無計啦，都無人陪我食飯。」我會唔會有啲此地無銀三百兩呢？

「無人陪你食飯，同你要揀一間難食嘅，又有咩關係呢？」啊！！芯玲點解你頭腦可以咁清醒？

「我覺得又唔算太難食嘅…」

又一個大話蒙混過關，總係覺得呢個聰明女想戳我晏晝同咗邊個食飯，可能佢估到我同子瑜偷偷地單獨見面？不過只要唔係俾佢撞到，同埋我死都唔認，應該唔會有事嘅。

「咁你哋呢？最近係咪都係同曉琳食？」我嘗試轉移話題，再加上我都想知下曉琳近況。

「問咁多做咩？專心上堂啦。」芯玲托住個腮，之後就成堂都無理過我。

啱嘅，做學生專心上堂係應份嘅，我望住塊黑板，唔夠一陣視線就轉移咗落坐前排嘅曉琳度，望住佢背影，唔知道佢依家諗緊咩呢？話就話我無資格再去關心佢，但係唔代表我內心唔再在意佢嘅感受。

嘩等陣先！忽然間曉琳擰轉頭望過嚟，好彩我即刻耷低頭扮抄筆記逃過一劫，個傻妹又會咁唔專心上堂無端端擰過嚟都有嘅？