【校園／愛情】戀上鄰家女孩（布甸篇）: 82. 塵世中的小確幸

其實我又點會唔明白子瑜諗緊咩，佢呢個女仔就係太過善良，總係處處為人著想，唔識得幫自己諗，為咗佢細佬、為咗曉琳已經犧牲咗自己太多，唯一一次任性就係中一嗰陣捉住我逼我扮佢男朋友，滿足佢玩拍拖遊戲嘅慾望。

子瑜知道家樂對自己死心塌地，為咗自己付出咁多，佢會想嘗試同對方喺埋一齊當做補償；佢知道曉琳鍾意我，佢覺得自己由中一開始就一直霸住咗我，因而產生愧疚之心，所以到最後將我讓俾曉琳。

就算呢刻我同子瑜已經互相確認咗對方心意，但愛情呢家嘢唔係話兩情相悅就可以終成眷屬，我知道只要我哋解決唔到以上嘅問題，我哋就算喺埋一齊都唔會走得遠，更何況我到呢刻，名義上仲算係另一個女仔嘅男朋友。

一諗到呢度，無力感就好重好重，曾經有人同我講過，人嘅能力係有限，無論係面對生活上嘅難題，抑或係感情方面嘅問題，總唔能夠事事稱心如意，但係咪咁諗就可以解得開我哋之間嘅煩惱呢？

「落車先喇。」子瑜拍一拍我手臂，將我向外推。





大家都知依家小巴落車都唔使再對住個司機咆哮，只要㩒咗鐘仔就可以，但我連鐘仔都聽唔到有響，可能我掛住諗嘢諗到太入神。

「嗯。」我急急腳帶住子瑜由小巴車尾衝落車，方死遲咗一秒都會俾小巴司機粗口問候。

落咗車之後，返屋企嘅嗰段路，子瑜無再好似喺醫院同小巴嗰陣咁翹住我隻手，令我更加有種患得患失嘅感覺。

第二日係陸運會翌日嘅學校假期，我同子瑜約好咗再去醫院探黃子俊，因為電話銀包唔喺身反而俾咗種假象我，感覺自己好似暫時脫離咗原本嘅世界。

嗯，當然呢個「暫時」都只係得返今日，聽日返學就要面對現實，短髮妹妹知道真相肯定會好鄙視我，眼鏡妹妹平時無咩主見，多數都係跟大隊一齊討厭我，芯玲一直咁幫我同曉琳，雖然睇得出佢都好關心子瑜，但係今次應該都無眼睇我，至於家樂就…本身都已經無朋友做，我除咗愧疚之外都唔知可以講咩好，仲未計擅自離開運動場嘅懲罰。





只係唔知依家曉琳點呢？唔知佢依家做緊咩？一個人喊緊，定係已經好憎我？但係拍拖以嚟曉琳佢真係從來都無嬲過我…

去到醫院之後，我同子瑜半隻腳踩入病房，黃子俊已經發現我哋。

「陳佑男！！」

粒豆釘一見到我就興奮到手舞足蹈，子瑜見狀即刻衝埋去制止佢，話晒都係啱啱打完石膏，不過見佢咁活潑我都放心返唔少，但又醒起嗰日曉琳嚟我屋企嗰陣我對黃子俊態度咁差，其實佢都只不過係小朋友一個，我咁樣對佢諗返起都有啲內疚。

「黃子俊你唔好郁嚟郁去啦。」好不容易子瑜先至令到佢細佬冷靜返落嚟，跟住我同子瑜夾手夾腳拎咗堆飯盒同湯壺出嚟餵飽黃子俊。講到廚藝，子瑜的確係無得輸，簡單嘅青菜白飯清湯都可以煮得咁香，嗰陣香味直頭搞到隔離床個細路都好似滴緊口水。





而黃子俊個衰仔食完飯，嘴都未抹乾淨，就傻更更咁望住子瑜同我係咁笑。

「嘻嘻～」

「笑咩啊？你唔嬲我啦咩？」子瑜問。

「黃子瑜我邊有嬲你喎。」

「小朋友唔准講大話啊，明明你早幾日都唔理我嘅。」子瑜咬住嘴唇望住佢細佬，明明佢先係家姐，但呢刻反而似個妹妹，又有啲似女朋友咁嗲自己細佬。

「我無講大話啊，我係無理你咋嘛，但係我一啲都無嬲你，我最鍾意就係黃子瑜～」我睇見粒豆釘真誠嘅眼神，總覺得佢兩姊弟前世一定係情人，到今世再續情緣。

「黃子俊啊！」

「喂喂黃子瑜你唔好攬到我咁實啦，抖唔到氣...抖唔到氣...」





「唔得啊，我好掛住你。」

呢刻子瑜同黃子俊相擁而泣，啲眼淚決堤咁流，我喺旁邊見到佢兩姊弟感情和好如初，心裡面有股暖意源源不絕咁湧至，可以睇住佢兩姊弟咁好感情，又會唔會係塵世中一種難得嘅小確幸呢？