【校園／愛情】戀上鄰家女孩（布甸篇）: 81. 或者一切早注定

自從我同曉琳一齊之後，就好似無試過同子瑜玩得咁開心，我諗總算叫做經歷咗咁多唔開心嘅事之後，子瑜終於搵返屬於佢嘅笑容。

但我又點會唔知道，呢個笑容係需要付出代價的。

我同子瑜雙雙離開醫院嘅時候，夜幕已經低垂，而另一邊廂嘅運動場應該一早就曲終人散，我個背囊同埋啲隨身物品統統留咗喺運動場，依家返去九成唔會搵得返，我諗多數都係芯玲或者曉琳幫我執起咗，只不過我後日返學仲有無面見佢哋又係另一回事。

而返屋企嗰程小巴，都係靠子瑜嘅銀包打救我，先不至於要著住對釘鞋由醫院行石屎路落山。

小巴班次好密，唔使一陣就有得上車，我同子瑜揀咗小巴最後排嘅連位坐，呢個位置又偏僻又暗，感覺上就好似頭先醫院嘅嗰張長凳咁，一個細小空間俾多咗次機會我哋兩個獨處。





「你咁樣一走了之，曉琳知唔知道…？」子瑜忽然間咁認真問，搞到我措手不及。

「欸...嗰陣比賽，佢見到我跑到終點之後，直接跑咗出運動場，但係個原因，我諗佢未必即刻知道。」我解釋。

「如果佢知道你係因為我，佢肯定會好傷心。」

「唉...家樂同社長都見到你跑出運動場，我諗曉琳應該好快就會知道件事。」

雖然社長應該唔知子瑜細佬出咗事，但家樂由始至終見證住成件事發生，曉琳要知道我點解跑咗出運動場唔係難事。





不過當我講完呢句之後，子瑜就靜咗一陣，剩返嘅只有小巴加速減油嘅摩打聲。

「陳佑男，你會唔會好討厭我？」

「吓？點會？」

「但係我好討厭我自己，頭先學校打過嚟嗰陣，家樂坐喺我旁邊，佢聽到發生咩事，想同我一齊去醫院，但係你都見，我好狠心拒絕咗佢嘅好意，去到醫院之後其實我心情好複雜，我覺得好對佢唔住，一直以嚟我都只係當佢工具人咁利用，用佢嚟攝時間、用佢嚟填補我嘅寂寞，所以我有諗過，當黃子俊出院之後，我就會接受佢，疊埋心水同佢喺埋一齊。」

聽完子瑜咁講，我心裡面當然係不是味兒，歸根究柢都係出於我嘅自私，就算我已經有曉琳，我都唔想見住子瑜同另一個男仔拍拖。





「勉強無幸福嘅…」所以潛意識嘅我，依然係想阻止呢件事發生，亦慶幸依家喺佢身邊嘅人係我，而唔係其他人。

「我知道…我曾經都有逼自己鍾意另一個男仔，就算同佢出街食飯睇戲…就算俾佢攬住我…拖住我，但我都係無嗰種感覺。」

雖然子瑜無講個男仔係邊個，我都大概估到就係藍社社長，我又諗返起早個幾月曉琳俾我睇嘅嗰張相，社長從後攬住子瑜嘅自拍照。

「自從你話你鍾意曉琳之後，我成個人就好迷失，你知唔知道，正正就係你同我講，你鍾意佢嘅前一日，曉琳同我講原來佢都鍾意你，其實我一早已經察覺到你兩個有啲嘢，但點估到你哋會咁合拍，一前一後咁同我講出你哋嘅心意…」

呢個時候小巴司機忽然間一個急煞停，所產生嘅慣性搞到子瑜失平衡，差啲撞咗落前面張凳度，好彩我機警敏捷扶實佢，我仲諗住幫子瑜扣返好安全帶，但佢就選擇挨埋我膊頭度翹住我手臂。

好啦，我唯有暫時充當住子瑜嘅安全帶。

「一開頭嘅時候，我以為自己可以好豁達，就算睇住你哋慢慢走埋一齊都無所謂，但後來見到你哋越嚟越親密，個心好似突然之間缺少咗一啲嘢咁，但又講唔出係啲咩，只係好想快啲搵啲嘢填補返呢種空虛寂寞嘅感覺，好想搵個男仔錫我…」

結果係點大家都已經知道，子瑜始終無辦法鍾意追咗佢成年嘅家樂，而對住個花心大蘿蔔嘅社長，亦都無辦法交到個心出嚟。





講到花心，我又何嘗唔係？

「子瑜…我以後剩係會錫你一個。」

你可以話我出於內疚又好，真係發自內心都好，不過當你走進過呢個女仔嘅內心世界，自然就會產生咗一種憐香惜玉嘅感覺，想好好攬住佢，好好照顧呢個女仔，等佢唔再需要一個人喺感情路上跌跌撞撞。

只不過，現實總係殘酷。

「咁曉琳點算…？」子瑜凝望住我隻右手問。

我猛然醒覺，我右手綁住嘅呢條藍白間條手繩，再加埋面上嗰兩劃藍色彩繪，處處提醒住我曉琳對我嘅愛意。

「陳佑男你仲記唔記得…我曾經同你講過，如果你傷害曉琳嘅話，我一定唔會放過你...」





「嗯...」我當然記得。

「結果依家…我同你都係共犯。」子瑜續道。

小巴繼續奔馳，但呢一刻，我終於明白點解子瑜會喺醫院度，話我依家先發現原來佢一直對我有意思已經係太遲，如果當初我早啲察覺到佢嘅心意，之後發生嘅事係咪就會唔一樣？問題係，當刻嘅我哋，面對住一早注定嘅結果，又可以有選擇嘅能力嗎？