【校園／愛情】戀上鄰家女孩（布甸篇）: 78. 推開這扇窗之後

我咁樣粒聲唔出擅自離開運動場，都唔知到時候返到學校會點樣俾班主任罰，分分鐘都唔係班主任可以處理到嘅層面，我諗最低限度都起碼要見訓導主任甚或至乎要見家長。

迷糊嘅記憶當中，我好似有印象當時大師兄已經去到終點位準備同我慶祝，不過佢肯定點估都估唔到終點對於我嚟講只係一條失去咗意義嘅白線，越過呢條白線之後我並無放慢腳步，依然向住我嘅終點繼續前進。

啊！芯玲三姊妹肯定以為我癡咗線，特別係芯玲，比賽之前佢仲笑我因為緊張而肚痾，唔知佢會唔會以為我咁樣衝出賽道，係為咗避免意外決堤要衝入廁所呢？但係佢好似都睇到我係向住運動場大門方向跑，而唔係向住廁所方向跑。

至於曉琳，唉...我都唔知點算好，唯有寄望返到去仲可以有彎轉。

「後生仔，見你啱先嗰個樣緊張到呢，計阿叔話，九成都係為咗女人㗎喇，嗱老老實實話俾阿叔知，係為咗女朋友定係阿媽先？」





面前呢個的士佬，係頭先見我喺條街跑到幾乎甩肺，駛埋嚟拉低車窗問我想去邊，我答話我趕住要去醫院跟住佢就叫我上車，仲拍晒心口話唔收錢免費車我去。

「兩樣都唔係。」

「吓？唔通你係基嘅...？」

「唔係，只不過佢真係唔係我女朋友...」其實我都無咩心情陪佢講笑，但見佢咁熱情又咁好心，患難見真情肯免費車我去醫院，我都無得求其敷衍佢。

「哈哈同你講笑啫，點都好啦，阿叔相信呢個世界，係你嘅始終會係屬於你嘅，唔係你嘅嘢你點樣強求都無用㗎喇，愛情都係一樣啊，任你點樣死心塌地付出都未必有收穫㗎喎，因為唔係屬於你嘅嘢，就算俾你一時三刻得到，最終都係要還返出嚟，到時候仲可能要加倍奉還添啊...」





點知的士佬就越講越興奮，就算架車到咗醫院停咗車，都仲雞啄唔斷沒完沒了。

「欸...司機大哥，好似到咗喇，我可唔可以落個車先...」

「得得得，梗係得啦，開埋車門俾你都仲得添啊，加油呀後生仔。」

落車之後，的士佬使出一個急轉彎就揚長而去，然後眨吓眼就喺我視線範圍消失咗，剩返我一個企咗喺醫院嘅急症室大門面前。或者真係正如子瑜所講，只要你真心渴望一樣嘢嘅時候，全個宇宙都會嚟幫你，而啱啱嗰個咁好人嘅的士佬就係其中一份子？

不過依家都唔輪到我停低思考，我只係想快啲可以搵返子瑜，俾佢知道呢個世界裡面，佢唔需要一個人獨自承受所有嘅痛傷，因為仲有我願意幫佢分擔。





問題係，成間醫院咁大我真係無從入手，急診室幾乎可以一眼望盡，除咗公公婆婆之外，就係啲陪佢哋一齊嚟睇病嘅親朋戚友或者工人姐姐，總之就無一個好似我同子瑜約莫嘅年紀。

詢問處嘅護士姐姐話我無帶身份證，又唔係病人家屬唔肯幫我查黃子俊喺邊個病房，於是乎我索性行去電梯大堂對住個樓層表，鎖定最有可能嘅嗰幾層病房，自己逐層逐層去搵。

之但係咁樣搵法，同大海撈針真係無咩分別，兒童科我又去過，連深切治療部個門口我都摸過，不過呢度除咗冷冷冰冰之外真係完全唔見子瑜身影，但我一身中學運動服連埋對跑步釘鞋，喺醫院跑起上嚟鞋底發出咯咯聲又特別容易惹人注目。

為咗唔好俾護士當我係壞人抨我扯，所以我都係落返樓下急症室，靜靜哋諗吓下一步應該點做，呢刻我望住個電話亭，心諗自己電話又無帶，銀包又唔喺身，我摸下自己條運動褲褲袋，空空如也連個銀仔都唔多個，想打個電話俾子瑜問吓佢喺邊都唔得，對住個電話亭我只能夠望洋興歎。

突然我靈光一閃，頭先我跑過嚟醫院就有的士佬免費車我過嚟，咁話唔定有人跌咗個大餅喺地下等我執呢。

「使唔使借個一蚊俾你啊？」正當我耷低頭望緊地下嘅時候，我背後就有把清脆悅耳嘅女仔聲出現。

「好啊。」

好乜鬼吖？我擰轉後面一望，眼前呢個女仔，咪正正係我依家最想搵到嘅嗰個女仔。