【校園／愛情】戀上鄰家女孩（布甸篇）: 77. 你的心在哪裡，你的寶藏就在那裡
「你知唔知呀，我最近睇緊一本書呢，佢講風可以改變沙丘嘅形狀，但係沙漠永遠都會存在，跟住我就喺度諗，如果每個人個心都有屬於佢嘅形狀，唔知我嗰個係咩形狀呢？」
「又睇埋啲咩奇怪書啊？我剩係知尋日science堂教呢，心臟就有四個心室，分別係左右心房同左右心室，裡面仲有塊半月形嘅瓣膜，你係咪講呢塊吖？」
「都唔知你講緊咩。」
「搞錯啊，你有無留心聽書㗎？」
「無啊，你又唔係唔知道我最唔鐘意上嘅就係science堂，所以我下年一定唔會揀理科。」
「藉口嚟㗎啫，抑或你係掛住同隔離個男仔傾偈咋？」
「邊有啊？」
「真係無？」
「真係無，係佢撩我咋嘛，呃你做咩？」
跟住個女仔就一腳踢埋嚟，得逞後再轉身狂奔跑走，我隻腳差啲俾佢踢到殘廢，我有時都唔明，做咩呢個女仔可以咁粗魯，郁啲就動手動腳。
但諗諗吓，又發覺當日子瑜跑走嘅背影，同今日有啲相似，係我自己一直無為意吖？定係，我收埋咗喺內心太耐，一直抑壓住？
不過當日子瑜嘅表情係帶住一種調皮，又夾雜住一股稚氣，但依家子瑜好似俾一層又一層嘅憂鬱籠罩住，而佢變到咁，我總覺得我有份造成。
「要行快啲啦，怕趕唔切。」社長喺旁邊催促住我加快速度。
但係無論如何，頭先子瑜孤獨嘅背影，早已經深深烙印咗喺我腦海中揮之不去，子瑜依家肯定好擔心佢細佬嘅安危，偏偏現場氣氛高漲到一個極點，四社聲嘶力竭咁為場上進行緊嘅社際乙組男子接力賽打氣，形成咗一個鮮明嘅對比。
短髮妹妹聚精會神咁望住跑道，準備喺選手衝線嘅一刻㩒停秒錶，當我經過終點位置嗰陣，就連曉琳同芯玲兩姊妹都喺度開心雀躍咁傾緊啲唔知咩嘢。
忽然間，我對於周遭嘅一切事物都產生咗一種厭惡感，你哋喺度享受緊你哋嘅歡樂時光，但係就唔知道有個女仔喺度獨自受苦，擔心緊佢最錫嘅細佬，明明佢本身都可以融入喺呢個氣氛之中。
「接住落嚟就係今屆陸運會嘅壓軸賽事，社際男子甲組4×100接力賽。」
司令台嘅廣播直接將全場氣氛昇華。
工作人員安排好每個參賽選手嘅起步同接棒位置，依照我哋之前嘅分配，大師兄徑賽經驗最豐富，所以第一棒起跑嘅重任理所當然落喺佢身上，然後第二棒就由擅長直路衝刺嘅二師兄處理，第三棒彎路交俾藍社社長。
「而負責藍社嘅最後一棒就係，4C班嘅陳佑男！」
司令台把女仔聲順住交棒次序逐一介紹我哋，因為我跑最後嗰棒，所以我就成為被壓軸介紹嗰位，四社嘅吶喊聲幾乎未曾停止過，但係我絲毫嘅興奮都感覺唔到。
因為我只係想，快啲完成個比賽去。
以最快嘅速度完成。
就係呢一刻，全場喺頃刻之間靜止咗落嚟，所有人都全神貫注望住條起跑線，等待裁判發號施令。
「呠——」
起步槍聲響起，運動場再次陷入熱血沸騰嘅狀態，四社嘅吶喊聲再度匯集一齊，打氣嘅力度同選手嘅速度幾乎畫上等號，驟眼望過去大師兄領先緊好幾個身位，所以觀眾席上，藍社當下嘅氣氛亦都係最高漲。
轉眼間，大師兄就將領先優勢交俾二師兄，接住落嚟就係佢發揮直線衝刺嘅時候，但係衝咗一段路程之後，黃社同紅社都不遑多讓，喺後面死咬住唔放，而且仲將個差距越收越窄。
去到第三棒嗰陣，藍社同黃社幾乎係同一時間交棒，社長同隔離黃社喺最初嗰半個彎位依然叮噹馬頭，鬥到難分難解，而佢兩個嘅步伐越嚟越接近嘅同時，我亦都開始將身體漸漸壓低，左手慢慢向後伸動，順住節奏一步一步咁向前加速助跑，雖然呢串動作我已經反覆練習過好多次，亦深知道交棒嘅流暢度就係決定勝負嘅關鍵。
不過今次顯然唔係我做得最好嘅一次，甚至乎步伐開始出現凌亂，但我無辦法再控制大腦作出及時調整，而電光火石之間，社長已經將支接力棒交託到我手上。
「唔好話大師兄唔教你，記住啊，落到場比賽，好多時都係憑感覺，就算啲動作做得唔好都唔緊要，到時候只要相信你嘅直覺，相信你嘅能力，之後咩都唔使理，意想不到嘅事情就會發生。」
我都唔知點解，腦海中會浮現返大師兄對我講過嘅呢番說話，去到呢一刻我就乾脆順住呢股信念，相信自己嘅直覺，忽然之間我全身力量都好似注滿晒喺雙腿肌肉之中，然後再將呢股力量一下子爆發出去。
無錯！我要相信自己直覺，相信身體每一個細胞，每一寸肌肉。
轉入最後直路之後，我依稀可以見到曉琳企咗喺終點位置，旁邊仲有芯玲同眼鏡妹妹陪伴住，而短髮妹妹拎住個秒錶目不轉睛咁望住我，大家都係等緊我衝線嘅一剎那。但當鬥到最後三十米嗰陣，我開始感覺到自己個身體漸漸超出負荷，與此同時，後面對手施加嘅壓力亦都越嚟越大，我根本唔敢擰轉頭望個距離差幾遠。
我可以做緊嘢，就係咬實牙關，死守住依家呢個領先優勢。
「你知唔知道，《牧羊少年奇幻之旅》呢本書講過，當你真心渴望一樣嘢嘅時候，全個宇宙都會聯合起嚟一齊去幫你實現。」
「咁係咪你都會嚟幫我？」
「嘻嘻，咁睇你係咪真係咁有決心追到...」
其實我都唔明，點解當我真心渴望一樣嘢嘅時候，全宇宙都會嚟幫我，呢啲寓言故事其實係咪用嚟呃小朋友㗎咋，現實世界中，個宇宙又點會知你渴望緊啲咩喎，黃子瑜你成日睇埋晒呢啲古靈精怪嘅故事書，會唔會有一日睇壞腦㗎？
雖然我去到今時今日，都依然對呢個道理一頭霧水，但係，我好似終於認清楚自己所渴望嘅嘢係乜嘢，對我嚟講，捱埋最後呢三十米已經唔再有咩困難，因為呢段直路將會係我漫長旅程嘅開端，前面等緊我嘅仲有好多未知之數，但係我願意繼續勇往直前，追尋我心中真正所屬。
曾經，我為咗追到曉琳，將你拋低喺班房，當時我已經察覺到你有唔妥，但我唔想去承認。
之後有一晚喺你屋企食飯，我因為曉琳嘅一個電話，罔顧一切離開你屋企，冒住雨衝返學校接曉琳放學，當晚，我親眼望住你喊，但我無勇氣去面對。
仲有一次，我哋終於俾曉琳揭破咗我同你之間係鄰居嘅關係，你為咗截住黃子俊唔俾佢繼續令到件事變得更壞，你一巴車落佢塊面度，而我知道你一向都好錫佢，你為咗我同曉琳，犧牲你細佬，亦都犧牲咗你自己。
更加唔好提其他同學對你嘅閒言閒語，話你鍾意收兵，又話你鍾意四周溝仔，搞到你喺學校嘅形象跌落谷底。
黃子瑜，我唔想你再孤獨一個，承受住呢個世界嘅殘忍。
衝過終點嘅一刻，原本手上呢支接力棒對我嚟講應該係無比重要，但最終我都係選擇鬆開手，由得佢順住地心吸力跌落地，同時間亦都好似將心中一路抑壓住嘅情感一併放下，場上嘅喧鬧聲從未有一刻停止過，但我已經無辦法感受到，就好似，我已經同四周圍嘅環境割裂開一樣。
比賽冠軍花落誰家我唔知道，我剩係知道，呢刻嘅我並無因為衝過終點而停下腳步，曉琳由興奮到錯愕嘅表情轉變，我都清清楚楚睇到，亦都無阻我繼續向前跑，沿住頭先子瑜急住離開嘅同一條路上，向住運動場大門方向繼續前進，而我將會，親手推開呢道大門。
因為鎖匙早已喺我手上。