【校園／愛情】戀上鄰家女孩（布甸篇）: 73. 風曾經改變沙丘

食完飯過後，回程路上短髮妹妹繼續捉住隱形眼鏡妹妹喋喋不休，可能今朝早佢自己一個人做helper，無人陪佢傾偈實在太無聊，所以佢依家要把握時間，將所有想講嘅說話濃縮喺呢段路一次過釋放晒出嚟。

忽然間，芯玲同兩位妹妹講，話醒起有啲嘢想買，未等佢兩個反應得切，就已經拉住我向反方向行。

「你陪我買啲嘢吖。」芯玲一直捉住我隻手遲遲未放。

「去邊啊？你要買啲咩？」雖然唔知芯玲做咩要我陪買佢嘢，但起碼呢刻離開咗兩個妹妹，耳根終於可以回復清靜。

「買糖食。」





直至我哋入到一間便利店，芯玲先至鬆開我隻手，之但係頭先又話買糖食，我以為係啲咩朱古力之類女仔最鍾意嘅糖，點知芯玲拎住咗盒喉糖，行去收銀處前面停低對住我講。

「陳佑男，俾個機會你請我食。」

咁講真我又一啲都唔介意嗰十蚊八蚊嘅，話晒我已經當正芯玲係我嘅傾訴對象，加上我真係感覺到佢全心全意為咗我同曉琳好，而且暗啞底佢亦都好關心子瑜，所以呢盒喉糖絕對係抵請嘅。

只係我唔明白芯玲做咩無啦啦要買喉糖食，明明佢今朝早都無幫手嗌過cheers，唔通佢諗住食完個晏，填飽個肚就展露佢最熱情嘅一面俾大家見識一下？

不過返到運動場之後，盒喉糖就再無出現過，甚至連包裝紙都無拆開過，晏晝隱形眼鏡妹妹無比賽玩，就坐喺芯玲隔離度傾偈，變相我就無得再同芯玲傾訴，結果我滿肚子心事但就無處釋放。





無計，唯有同自己講唔好胡思亂想，乖乖地欣賞場上比賽。

午後陽光將跑道曬得更加通紅耀目，全場氣氛亦都漸漸進行白熱化，但由於今日只係陸運會第一日，大部份嘅賽事都係初賽，百米決賽同社際接力呢啲重頭戲全部都要等到第二日先至上演，正好呢個晏晝可以俾我齋坐喺度，而坐耐咗自自然然視線又會聚焦返喺曉琳身上。

呢個下晝，曉琳為咗藍社真係盡心盡力，每逢運動場上有藍社健兒在場比賽嘅時候，身為康樂幹事嘅曉琳都要帶領住看台上面嘅一班同學仔起身嗌cheers，大家都知同學仔通常比較怕羞，為咗帶動氣氛曉琳每次都要落足全力嗌到力竭聲嘶，連啲額頭瀏海都濕到一撻撻，只不過今日曉琳嘅投入程度，令我有種錯覺覺得佢好似刻意寄情於工作之中，用以掩蓋內心嘅苦悶。

而講到我，成個晏晝我都只能夠望住曉琳東奔西撲，但我完全無勇氣主動落去搵佢，自從星期六晚我送完佢返屋企之後，我哋就再無交流過。

隨住時間流逝，今日嘅賽事亦都完滿結束，大會隨即公佈四社現時分數，包尾嘅係綠社，排第一名嘅係啱啱突破咗一千分關口嘅黃社，緊隨其後嘅係我哋藍社，不過都只係相差二十分，換言之決勝負嘅關鍵就係聽日嗰幾場壓軸賽事。





忽然之間我感覺到有人拍我膊頭，我擰轉頭一望，原來係大師兄同二師兄。

「喂陳佑男，今晚記得抖足精神，聽日就輪到我哋㗎喇。」大師兄依舊咁氣定神閒，見慣大場面果然係唔同啲。

「知道。」我點點頭回應。

「但好似有啲難度喎，次次見親佢隔離都有女仔圍住。」二師兄繼續保持一貫開玩笑作風，仲搞到我旁邊嘅隱形眼鏡妹妹尷尷尬尬咁撥弄頭髮。

「好啦，聽日見喇。」大師兄道別過後就沿住看台樓梯離開，途經看台前排就同我哋個社長同埋曉琳寒暄咗兩句，之後就消失咗喺人群之中，看台上其他嘅同學仔亦都陸續執袋離去，曉琳同一眾社幹事就留喺看台嘅最前排向班同學仔逐一揮手歡送，當人去樓空之後，曉琳又重新埋頭苦幹清理啲佈置雜物。

正當此時，芯玲將盒喉糖塞喺我手裡面。

「唔使等到聽日喇，依家就係輪到你發揮嘅時候。」

旁邊嘅隱形眼鏡一臉錯愕咁望住我同芯玲。





「仲唔快啲氹返人？仲等咩啊？」芯玲見我反應遲鈍，嘆一口氣之後再補多句。

眼見芯玲一副認真嘅眼神望住我，與此同時佢又不停向住看台最前排嘅方向連打眼色，呢個時候，我終於知道芯玲要我請佢食喉糖嘅真正原因了。