【校園／愛情】戀上鄰家女孩（布甸篇）: 72. 沒有愛就沒有情

陸運會嘅午飯時間，我同芯玲三姊妹喺附近隨便搵咗間茶餐廳入座，我都開始慢慢習慣呢個飯腳組合，我故之然想曉琳可以跟埋嚟一齊涼住冷氣食飯，但係佢依家應該捱緊肚餓，忙到連外賣都無時間食。

「呼～估唔到今朝早跳高都要等咁耐先輪到我，仲要係最後一個跳，喺外面熱到我出晒汗。」圓框眼鏡妹妹今日轉咗戴隱形眼鏡，佢話因為怕會整爛副眼鏡。

「我做helper企咗成朝都好熱啊，芯玲你就好啦，匿喺看台唔怕曬。」短髮妹妹接住抱怨。

「哈哈，醒目㗎嘛，乜都唔報，咁就唔使出汗又唔會怕曬黑。」芯玲笑道。

「陳佑男做咩你停晒手唔食嘢？」隱形眼鏡妹妹問。





「人哋可能掛住曉琳無胃口。」短髮妹妹幫我諗埋解釋。

「佢懺悔緊。」點知芯玲就一腳伸落嚟。

講真就算芯玲點樣抽我水，我都唔會有半點怨言，問題係我望住自己碗沙嗲牛肉麵，我又喺度胡思亂想諗緊唔知子瑜依家去咗邊度食，同緊邊個食，同人哋傾緊啲咩嘢。

「懺悔緊啲咩？你係咪激嬲咗曉琳呢？」隱形眼鏡妹妹啖飯爬緊一半入口，都要伸過頭嚟八卦。

「吓？但係佢哋咁恩愛，點睇都唔似會鬧交。」短髮妹妹插嘴幫我解圍。





「嘻嘻你係咪羨慕人哋啊？我見你今日成日借啲意走過去黃社嗰邊，係咪掛住鄒家樂呢～」八卦嘅隱形眼鏡妹妹無意之中幫我帶走咗個話題。

「我...邊有吖。」不過短髮妹妹竟然會臉紅。

明明呢間茶餐廳啲冷氣好充足，兩位妹妹反而越講越熾熱。

就喺呢個時候，芯玲細細力批咗我一下手踭，向我打咗一下眼色，我又竟然真係會意到佢意思，順住佢目光望過去茶餐廳門口方向，見到一個熟悉嘅女仔身影，我心頭一震，但芯玲隨即喺耳邊提醒我。

「唔好咁大反應...」





如果唔係芯玲提醒我，我都唔為意自己嘅注意力經已俾呢個女仔牢牢吸引住，好彩我哋四人坐嘅方向，兩位妹妹係背對住門口，咁啱只有我同芯玲望到門口發生咩事。

但見個女仔眼光呆滯，似乎只係啱啱大病初癒，茶餐廳伙記大步流星走埋去問「阿妹幾多位」，個女仔豎起咗一隻手指，個伙記隨即指向遠處張大圓枱，跟住個女仔就順住方向行過去搭枱坐低，同枱嘅係一班同樣著住我哋學校運動服嘅低年級男仔。

我趁個女仔向我呢邊張望嘅一剎那，我即刻耷低頭夾一撮麵入口，避開同佢四目交投嘅接觸，但心裡面暗地思忖點解子瑜要孤伶伶一個人自己食。

但係我好快就諗到，今時唔同往日，以前陸運會放飯子瑜同埋曉琳總會糖黐豆咁，連埋我三個人柴娃娃咁出去一齊食飯，但係自從我同曉琳拍拖之後，一切都唔同晒。我喺度諗，可能呢個學期子瑜都好似依家咁，孤獨剩返自己，小息自己一個過，食飯自己一個食，連放咗學都係自己一個走，所有唔開心嘅事都要自己一個承受。

當諗到呢度嘅時候，我個心就揦住揦住好唔舒服。

「咦，嗰個女仔咪係黃子瑜？」最終都係俾隱形眼鏡妹妹發現，唔通戴咗隱形眼鏡視力會好啲？

「又同成班男仔坐，睇嚟佢真係好鍾意溝仔。」短髮妹妹反咗下白眼。

我同芯玲好有默契唔出聲坐喺度聽佢兩個繼續講。





「唔係喎，就咁睇佢唔似識嗰班男仔，似係自己一個搭枱食。」都係隱形眼鏡妹妹心水清。

「係咩？咁抵佢啦，無人陪佢食飯。」短髮妹妹盡顯怒氣。

接住落嚟呢餐飯，短髮妹妹一直喺度同隱形眼鏡妹妹抱怨子瑜呢樣嗰樣，短髮妹妹醋意越大，我就知道佢內心對家樂越在意，到後來佢講吓講吓，我留意佢眼眸隱約流露出一絲絲嘅苦澀，終究鍾意咗一個已經心有所屬嘅人，傷痛就要由自己獨自承受。一段愛情裡面，難道痛苦係必然嘅過程，總係無可避免的嗎？