【校園／愛情】戀上鄰家女孩（布甸篇）: 62. 未開始已經結束

正當我回身望向個女仔嘅時候，佢已經落荒而逃，擰轉身跑走咗，身影瞬間消失喺轉角之內，我想追出去都怕太遲。

我都唔知子瑜個傻妹做咩又要跟住我，但見到我又要避開我，或者佢真係好唔想見到我，咁其實我都明嘅，我欠佢嘅嘢實在係太多。

呢個時候我褲袋又傳嚟電話震動，我拎出嚟一睇，來電顯示係曉琳，我不自覺地輕嘆一口氣，然後撥橫接聽。

「你今日點啊，無咗我會唔會好唔慣？」曉琳喺電話另一邊嬌嗲嗲咁問。

「還好啦。」其實我應該起碼要講啲咩無咗你真係好唔慣嘅說話氹吓曉琳，但係呢刻我又真係無講花言巧語嘅心情。





「做咩你好似無厘神氣咁嘅？」曉琳再問。

「唔係啊，可能係有啲攰...」

「好啦好啦，你攰就早啲返屋企休息啦，我仲諗住...」曉琳欲言又止咁，而我又點會唔知其實佢係想我去接佢放學吖？

「諗住咩？」我強行重提精神，先至可以挑逗吓曉琳。

「無嘢呀無嘢呀～」曉琳你個傻妹吖。





就係咁，我帶住疲倦嘅身軀返到學校，再拖住曉琳送佢返屋企。當我重踏歸家路上時，我不停咁反思如果頭先喺天橋上面，子瑜轉身跑走嗰陣我都追埋上去，之後嘅事情又會點呢？

當面同子瑜道歉講對唔住？定係可以當無事發生好似平時咁同佢嘻嘻哈哈？不過我諗諗吓無論點都好，個結局最終都係會因為曉琳嘅一個電話打嚟，然後重演返上一次喺子瑜屋企發生嘅事情，結果都只係會再次搞到子瑜唔開心。

後來我都諗過，點解子瑜喺運動場見到我個表情會咁錯愕，我推斷係雖然佢俾社長叫過嚟，但係事前無同子瑜提及會有咩人在場，再加上社長都未必知道我同子瑜個關係，自然唔會多此一舉專登提起我，我反而覺得如果子瑜事先知道我都會喺度，就未必會應承社長過嚟。

數數手指，我同曉琳已經一齊咗一個月有多，距離陸運會只係得返幾日，呢個幾禮拜同兩個師兄一齊練跑都增進咗唔少感情，同社長就無辦法，始終心裡面有條刺突破唔到，而子瑜就自從嗰晚喺天橋上消失之後，我都無機會可以再見到佢。

呢排黃子俊都無打過電話俾我，唔知係咪子瑜收埋咗部電話等佢細佬無得偷嚟用，定係佢見我整喊子瑜從此對我不抱期望。諗返起，有時候呢粒豆釘硬係好似有意無意咁幫我同佢家姐鋪橋搭路，但依家連呢條引線都不復存在。





「喂陳佑男，做咩發晒吽哣啊？」餐廳飯枱上，芯玲批咗我一下手肘，等我終於可以從紊亂思緒之中抽離。

「肯定係曉琳今日忙到連晏都陪唔到我哋食，搞到佢食唔安瞓唔落。」圓框眼鏡妹妹仲幫我諗埋解釋。

「咁恩愛真係好。」短髮妹妹露出羨慕嘅眼神。

「你都可以㗎，最近見你喺堂上面同坐前面個男仔都玩得好開心㗎喎。」圓框眼鏡妹妹打蛇隨棍上。

「你講鄒家樂呀？咪玩啦，我同佢大纜都扯唔埋啦，何況佢仲咁鍾意黃子瑜。」唔知點解我注意到短髮妹妹啱先眼神略過一絲閃縮。

「咁你幫人哋醫吓失戀囉...」圓框眼鏡妹妹笑說。

餐廳嘅四人枱上，我同芯玲並排坐，另外圓框眼鏡妹妹同短髮妹妹坐我哋對面，同樣都係四個人嘅食飯組合，以前係子瑜、曉琳同家樂，如今已經人面全非，有啲人曾經喺你生命中出現過，留低過痕跡，但唔代表佢哋每個都可以陪你走到最後。

食完晏飯返學校嘅嗰程路上，兩位妹妹仲喺度爭論緊應唔應該幫家樂醫治失戀，傾到面紅耳赤，反而芯玲一直置身事外，我亦自覺不便參與呢場討論，咁啱我同芯玲兩個就不謀而合，處於同一步伐。





「做咩啊？夾咗喺兩個女仔中間好煩惱呀？」芯玲突然間一句毫無預兆嘅說話，嚇到我目瞪口呆。

「你...你講咩呀？」