【校園／愛情】戀上鄰家女孩（布甸篇）: 61. 彼此放手不容易

「子...」正當我想同子瑜揮手打招呼嗰陣，見佢已經收起咗愕然嘅表情同我擦身而過，我隻手舉起咗一半無處安放。

「嗱～買咗支寶礦力俾你。」眨下眼子瑜已經走到社長身邊。

「多謝你。」跟住社長連把聲都戳到好溫柔，同平時簡直係差天共地。

「嘩！我哋有無份先？」呢刻我背住佢哋綁緊鞋帶，但從二師兄嘅語調都可以想像到佢嗰份見到靚女嘅喜悅。

然後我目光向後一轉，已經見到社長搭住子瑜膊頭，得意洋洋咁向我哋介紹。





「佢叫黃子瑜，係我哋中四嘅師妹。」

「咪住先我認得你，你好似係黃社㗎喎，做咩過嚟幫我哋藍社呢邊先，有啲古怪喎，講！你係咪黃社派過嚟嘅間諜，偷睇我哋練習過程再返去通風報信！？」呢個大師兄想像力真係豐富。

「間你個死人頭啊，鬼得閒做間諜偷睇你哋，仲有啊如果我真係間諜，我依家都成個人棟咗喺度鍾意點睇就點睇，仲使乜偷睇。」

雖然大家都知佢兩個係講緊笑，畢竟子瑜同佢哋只係第一次見面，就將大師兄窒到體無完膚，兩位師兄眼界大開，連社長都有啲意料不及，雖然我知道子瑜不嬲嘴上不饒人，但我都擔心子瑜會有啲過咗火。

「哈哈，做咩啊？你俾人窒到出唔到聲啊？」二師兄又借機揶揄下大師兄，只見大師兄扮咗個被完美擊敗嘅動作，一笑置之根本無放在心裡。





臨近陸運會，我哋四個嘅練習都開始進入白熱化，接力並唔係一項單純鬥快嘅比賽。大師兄同我哋講過，香港男子百米短跑紀錄保持者跑出10.28秒嘅成績，但喺四乘一百比賽可以做出38秒幾。由此證明，四乘一百絕對唔係四個人各跑一百米咁簡單，跑道場上嘅真正較量，係取決於每一次交棒嘅過程。

呢個過程看似簡單，乜唔係就係將支接力棒喺唔跌嘅狀況底下，交到俾下一位隊友就完成啦咩？事實上，接力比賽交棒動作由預備、助跑、擺手、接棒、同加速，每一項背後都有科學理論支持。

舉個例，第一同第三棒都係負責跑彎道，因為接力賽係逆時針方向跑，喺高速奔跑情況之下，雙手會同時前後擺動，呢個時候用右手揸棒會比起左手揸棒更為順暢，更加有利轉彎。

另一方面，兩個人交棒時候亦唔會用相同手交接，因為咁樣好容易會撞手，換言之跑第一棒會用右手揸棒起步，第二棒就用左手接，如此類推，接棒嘅邊一個部份同手指擺位都可以好講究，慢慢做當然容易，但一快起上嚟就好易亂。

大師兄仲同我哋講解咗好多跑步技巧同背後原理，對於以前跑步剩係識一味發力向前亂衝嘅我嚟講，的確係獲益良多，不過仲有啲咩技巧就唔噚氣多講喇，因為落到場比賽，好多時都係憑感覺同心態，背後嘅理論消化到幾多就要睇自己造化。





「今日Edward好似幾有態，但陳佑男你今日就好似無咩狀態咁喎，平時都唔係咁㗎？」中場休息期間，大師兄揸住支寶礦力過嚟拍我膊頭。

「係咪因為女朋友唔喺度，無人同你打氣呢？」二師兄又拎埋支寶礦力過嚟將我夾咗喺中間。

「我睇就唔係喇，嗱老實講俾我知，我哋兩個唔會爆出去嘅，你同黃子瑜本身係咪識？」大師兄搭住我膊頭，用佢龐大身軀幫我擋住坐咗喺另一邊嘅社長同子瑜。

「係...」雖然唔係啲咩好難答嘅問題，我都要吞吞吐吐咁先答到一隻字。

「咁你哋本身係咩關係？」大師兄再追問。

「欸我...」但今次我遲遲都俾唔到個答案出嚟。

我同子瑜係咩關係？呢條問題我記得曉琳都曾經問過我一次，我嗰陣覺得子瑜比較似係我嘅屋企人，但係依家要我再答多次，我已經分唔清楚嗰條界線，係因為我已經一早越過咗嗰條界線？

「自己好好諗清楚啦，不過唔好下下都將你嘅情緒放喺塊面上面，如果唔係好易俾人睇穿㗎。」





大師兄重重拍咗我兩下膊頭，就起身混入跑道嘅人潮之中，原本遮擋住社長同子瑜嘅身軀不再存在，佢兩個嘅身影毫無保留咁進入我視線之內，社長手舞足蹈咁講緊啲唔知乜嘢，子瑜就喺旁邊陪笑，但下一秒我感覺到子瑜向我呢邊望緊過嚟，我下意識即刻擰轉頭避開...

好不容易，終於捱到呢次操練課結束，兩位師兄嗌肚餓話要去買宵夜食，咁剩返個社長就肯定會同子瑜一齊走，差在係社長送子瑜返屋企定係唔知仲會去咩地方，如果係送子瑜返屋企嘅話，就即係代表會同我行埋同一條路，咁倒不如我先行一步，免得一陣尷尬。

離開運動場上到行人天橋之後，我刻意放返慢腳步，等我可以同前面兩位師兄嘅距離拉返遠，但同時又怕慢得滯會俾後面嘅子瑜同社長後來居上，我借啲意向後睄咗一眼，睇吓佢哋係咪真係行埋同一條路。

誰不知我只係見到一個熟悉嘅女仔身影，一直跟住我後面，我停低腳步，佢又跟住停低，我怕俾佢發現我注意到佢，於是我扮到若無其事咁繼續向前行，我感覺到佢又重新跟住我向前行，我再企定定嘅時候，佢又跟住企咗喺度，好似刻意咁同我保持住距離。