【校園／愛情】戀上鄰家女孩（布甸篇）: 22. 牧羊少年奇遇記

「係...知道...」我都算好彩，Miss Chan竟然手下留情無追究我幫曉琳作咗個大話掩飾。

「無咩特別嘅話，你哋就靜靜地聽早會廣播。」Miss Chan冷淡地說道，然後打開本課室日誌埋頭苦幹。

你哋以為早會廣播就代表可以放肆同隔離傾偈？真係諗都唔好諗啦，完全唔值得喺個killer面前因小失大，郁啲就俾會佢罰出走廊企半個鐘，所以佢頭先無罰我幫曉琳講大話，都唔知係我行咗咩狗屎運。

所謂嘅早會廣播咪又係提及吓今日係壁報板設計比賽嘅最後一日，今日五點鐘就係截止時間，所以同學都要離開班房，到時候會有評判老師逐班入去俾分，但今年減到剩係得冠軍同優異獎兩個名次。除咗呢項溫馨提示之外，其餘嘅宣布我都無留心去聽。

今朝返嚟就聽到咁多關於曉琳嘅事，偏偏佢今日就請咗病假…呢個星期已經習慣咗同佢仲有班讀Visual Arts嘅女仔一齊食晏，但我諗今日Lunchtime都係要自己食自己㗎啦。





「男班長，回條呢？係咪無咗曉琳喺度就唔記得咗嗱？」

「係...嚟緊...」我即刻彈起身對住班同學連打眼色，拜托幫幫手快啲傳啲回條上嚟俾我收。

今日無咗曉琳喺度，我真係唔記得咗呢樣嘢，平時都係見到曉琳企起身，先醒起同樣身為班長嘅我有咩要做。

不過大家都相當合作，好快就收好晒全班回條，我數過啱數之後，疊整齊晒先行埋去放低喺Miss Chan枱面。

「幾叻仔啊，咁快就搞掂。」Miss Chan壓低聲線，喺早會廣播嘅掩護之下，我諗個聲量啱啱好剩係得我聽到。





「吓...？」叻仔嘅意思係指我收回條收得快？都係全靠大家賞面合作啫。

「不過你頭先都聽到廣播㗎啦？五點鐘就係截止時間，咁你一陣放學五點鐘落嚟教員室搵我。」

救命啊！仲以為佢放過我一馬，點知都係要俾佢罰留堂。

小息嗰陣，其他班都忙於最後衝線，唯獨是我哋班已經提早完成，相對得閒。而事實係，雖然呢個比賽屬於班際比賽，但真正會落手落腳幫手做嘅人只屬少數，加上啱啱開學無耐，所謂班內嘅團結精神又邊有咁快體現到出嚟。

至於關於曉琳同藍社社長嘅事？我已經趁頭先Bio堂嗰陣一口氣將家樂所知嘅搾光搾盡晒，佢仲話會幫我繼續打探，佢對我咁老友，我都係咪應該要對返佢好啲呢...





不過一放小息佢已經拎住頭先個麵包一馬當先衝咗出課室，向住子瑜班房方向奔馳，而我當下只係喺走廊隨意散步，直至行到走廊嘅另一端，眼見剩係得子瑜同家樂兩個人響班房入面，對住塊壁報板苦戰緊。

望見呢個畫面，我之前仲誤會家樂連自己班務都唔幫簡直係有異性冇人性，但此時此刻除咗家樂之外，佢嗰班啲同學個個事不關己咁，塊壁報板上面好多位以子瑜嘅身高根本就望洋興嘆，但佢班啲男仔好似活喺平行時空咁，圍埋一堆喺度傾偈嘅傾偈，打機嘅打機，無一個人願意幫手，全靠家樂喺度擒高擒低。

但同時不得不承認，子瑜整嘅壁報板真係好靚，背景係片一望無際嘅沙漠，喺繁星夜空之下，左邊係一座大型金字塔嘅輪廓，明顯仲未完成，而旁邊就有對年輕男女，著住套好精緻嘅阿拉伯民族服裝，互相緊靠住對方，身後跟住一隻又一隻嘅白色小綿羊，我離遠隱約見到，綿羊身上嘅羊毛部分係由綿花構成，而中間就係佢哋班每位同學嘅大頭相，不過輕輕一望個數量，就知道堆綿羊嘅完成度應該連三分一都未有。

雖則個構圖設計背後蘊含嘅意思我一概不懂，但係論心血同手工，單單喺每隻綿羊上面嘅綿花已經極費時間精神去處理，仲要剩係得子瑜同家樂兩個人整，唔怪之得佢哋個進度亦都係咁多班之中最嚴峻嘅。