【校園／愛情】戀上鄰家女孩（布甸篇）: 21. 當局者迷上加迷

「早啊。」我同家樂互相打過招呼之後，就轉身入返課室。

家樂行返埋位嗰陣，見到塊壁報板，表情都無咩特別異樣，大概係尋日佢幫完子瑜整完壁報板之後，返課室執書包嘅時候，都已經見到我哋班塊壁報板發生緊咩事。

不過返到埋位之後，我先發現原來家樂個書包一早放咗喺佢張凳上面，即係代表佢仲早過我返到課室，然後又出咗去，但見佢頭先拎住個麵包衝上樓梯，又唔係由子瑜班房方向返嚟，咁即係去咗邊處嚟呢？

唉算啦，我諗咁多做乜？

「陳佑男，我無意之中知道咗一個秘密，雖然呢個都唔算得係秘密，因為已經有其他同級嘅同學都見到。」家樂哄埋我耳邊度細細聲講。





「又有秘密？」

「尋晚呢，我去咗旺角返補習社補Chem，我都係第一日返，但你知唔知我撞到邊個？」家樂故裝神秘咁問我。

「邊個？」

原本我以為佢想講佢同子瑜發展成點，但原來係講佢自己嘅事，所以我都只係扮認真咁聽，但聽聽吓就發覺唔係喎！補習社？唔通真係咁橋？忽然間刺中咗我嘅好奇心，我擰轉面望住家樂，我諗佢都感覺到我已經估到係邊個。

「就係曉琳啊。」家樂隨即開估。





果然無估錯，咁但係點解要咁細聲講，都唔算係唔見得光嘅秘密啊。

呢個時候家樂再壓低聲線：「不過呢，我無同佢坐埋一齊，因為我遲咗少少先到，再加上佢隔離已經有個男仔坐咗喺度，起初我都認唔出個男仔係邊個，後尾落堂我見到佢正面嗰陣，我先認得出佢係你哋藍社個社長啊！而且佢成堂喺度同曉琳有講有笑咁…」

「吓！？」

成件事只要諗深一層就知好唔對路，因為呢個社長讀緊中五，高我哋一級，中四讀嘅嘢同中五又唔同，就算要補習都應該唔會係同讀緊中四嘅曉琳同班啩？

一齊補習...仲要有講有笑添...





呢幾日發生嘅事，等我仲幻想同曉琳嘅可能性越嚟越高嗰陣，點知突然間殺出個程咬金，所有嘢一下子又好似俾人打回原形，而且唔係家樂咁樣提起，我都差啲唔記得曉琳本身就有好多師兄排住隊想溝佢，而我就由始至終都唔知自己排緊第幾位。

「咁佢哋落咗堂係咪一齊走？」我覺得呢條有一條關鍵性問題，因為一齊補習一齊坐都可以話係咁啱得咁橋啫，但一唔一齊走個分別就可以係天淵之別。

與此同時，我向住最前排座位張望，曉琳個位依然係空空如也，咁遲都仲未返？曉琳好少可會遲到…

「開頭啊，佢哋真係一齊走㗎...」聽完我都有啲後悔做咩要挖苦自己，但家樂隨即又繼續講落去…

「但我睇唔過眼，主動行過去同曉琳相認，佢先發現原來我同佢同班，跟住佢就同個社長講咗幾句話，我估應該都係講bye bye之類，之後個社長就自己走咗，曉琳就同我一齊搭地鐵返屋企。」

真係好彩，家樂喺關鍵時刻出手，喺社長魔掌之中救返曉琳出嚟，平時我對家樂總係愛理不理，而佢就為咗我而做咗啲本來就事不關己嘅事，其實俾著第二個真係大可以托住手肘由得你死。

正當我仲想追問家樂，知唔知道曉琳同個藍社社長仲有咩交流嗰陣時，班主任Miss Chan對高踭鞋所發出嘅韻律已經傳遍整個課室，身為男班長嘅我，唯有先行放棄追問，嗌咗起立敬禮再算。

敬完禮之後，Miss Chan托一托佢副黑框眼鏡，瞪大隻眼咁望住我個方向打咗個突，然後佢再由左至右掃視全班，深呼吸一道氣，昂聲向住我問。





「男班長，今日係咪返齊人？」

頂，掛住聽家樂講秘密，又真係唔記得咗check大家返齊課室未。

於是乎我極速掃視一周，係得曉琳個位依然空緊，死喇佢仲未返添，去咗邊呢...

「男班長？」Miss Chan目光凝視住我。

我只好回應：「欸...齊人，除咗差曉琳未返到…我諗佢可能忙緊藍社啲嘢？」

的而且確，曉琳仲未返到，我怕佢真係遲到，不由自主咁幫佢諗埋藉口。

「曉琳今日請咗病假，女班長嘅職責麻煩由你幫手處理埋喇。」