【校園／愛情】戀上鄰家女孩（布甸篇）: 10. 提拉米蘇布甸燒

正當我以為曉琳受到布甸燒嘅甜度沖昏咗大腦，暫時消減咗佢繼續追問我同子瑜之間關係嘅雅致，誰不知我自己率先鬆懈，竟然一下大意唔覺意自爆咗。 

「陳佑男～我一早估到支波板糖係你買㗎喇，你認咗佢啦。」曉琳兩隻腳不停原地踏步，仲要拎住支匙羹指住我，興奮過食布甸燒嗰陣，定係啲布甸令到佢個興奮度有加乘...？ 

「咩啊...咁頭先嗰間鋪都有得買呀嘛...」我講完都覺得好無說服力... 

「係你㗎喇！你又點會知尋日子瑜收到嗰支布甸狗波板糖個款，同今日我哋喺糖果屋見到個款係一樣啫。」 

「除非係你送～」點解突然間曉琳思路會咁清晰㗎，我毫無還擊之力... 





無喇無喇，垂死掙扎只會更加樣衰，不如大方認咗去算。 

「好喇好喇，我認係我送喇。」唉，我而家好似細個玩數字棋咁，踩中咗地雷要即時倒後十步，距離追到曉琳嘅呢個目標又遙遠咗... 

唔通同自己講，早知會係咁，尋日就唔好咁屎窟痕買嘢送俾子瑜。咁樣又講唔過去，話晒尋日子瑜真係幫過我，而我又真係無請到佢晏晝嗰餐，在情在理買啲零食俾佢都係好應該嘅... 

「你係咪鍾意人哋啫？」而家我肉隨砧板上，唯有見招拆招。 

「唔係。」 





「咁你當子瑜係咩？」唔知曉琳係咪受到糖份刺激多巴胺，好奇感急升，鍥而不捨繼續追擊我。 

老實講我又真係無認真諗過呢個問題，而我又唔知點解呢刻我竟然嘗試認真思考個答案。我同子瑜做咗三年同學，三年朋友，今年第一次分班，但依然仲會一齊食飯傾偈，但我總係覺得以上統統都唔能夠好準確咁描述到我對佢嘅感覺，如果硬係要搵一種關係去形容，我諗呢個會係最適合？ 

「屋企人？」我回應道。 

「吓屋企人？」曉琳疑惑咁望住我，同時終於靜咗落嚟... 

「嗯...就好似...」 而我竟然突然間心血來潮，想去認真咁解釋埋我嘅答案俾曉琳知道，係因為我唔想佢誤會我？等我仲可以繼續保持住追佢做女朋友嘅希望？ 





「黃子瑜！」但聽見曉琳忽然大嗌，視線轉移向我身後。 

「你做咩扮睇我唔到喎？」然後曉琳再搶前一步，我跟住佢個步伐，向後擰轉頭一望，又真係子瑜嚟咗，隔離仲有個鄒家樂。 

「邊有啊，唔想阻住你兩個二人世界呀嘛。」子瑜笑道。 

正當我諗住將心底裡關於子瑜嘅感覺，坦白從寬講俾曉琳知嗰陣，無諗過子瑜咁橋出現喺我哋面前，搞到我呢刻望住子瑜都有啲尷尷尬尬… 

「你唔係同鄒家樂去睇戲㗎咩？」曉琳問。 

又係喎，咁快睇完？ 

「無啊，鬼叫佢大頭蝦，將新城市廣場戲院睇錯咗做新都會廣場戲院，想即時補買戲飛都就唔啱時間喇。」子瑜回答。 

「哈哈，家樂你第一次約到子瑜就留低咗個壞印象。」曉琳拍拍家樂手臂，以示安慰。 





我望住家樂，佢又望住我，從佢個表情都知道佢有幾咁失望，明明今朝早仲好風騷，咁而家佢兩個入嚟呢度個商場，斷估都係子瑜俾個機會家樂去補償。 

「跟住佢猛咁同我講對唔住，我話唔緊要啦，你請我食返我最鍾意嘅甜品當補返數，我仲開心過睇場戲，所以我就捉咗佢嚟呢度。」子瑜說道。 

「呵呵，鄒家樂慢咗一步喇，因為陳佑男已經買咗子瑜最鍾意嘅提拉米蘇啦。」曉琳脫口說道。 

同時間，曉琳單手捧住佢碟朱古力布甸燒，個布甸仲要係搖搖欲墜緊，但佢有理無理咁，用另一隻手捉住我拎緊嗰袋提拉米蘇布甸燒，遞俾子瑜睇。 

曉琳我真係服咗你，咁高難度嘅操作都俾你做到… 

我見家樂神情再度下沉，子瑜一時之間都呆咗俾唔到反應，我就俾人捉住咗隻手無得反抗，而笑得最燦爛嘅就係曾曉琳…