【校園／愛情】戀上鄰家女孩（布甸篇）: 9. 朱古力味布甸燒

呼！好不容易，我終於帶曉琳嚟到一間專賣布甸燒嘅鋪頭前面。隔離仲有塊好大嘅黑板，上面由人手用唔同顏色嘅粉筆畫咗呢度最出名嘅幾款布甸燒，包括有北海道芝士、提拉米蘇、雲尼拿同埋焦糖味，啲畫仲要畫得好生動，仲靚過影相。 

「到喇！」 

「嘩！啲布甸燒好似好好味啊。」曉琳即刻鬆開我衣袖撲向玻璃櫃面前，目不轉睛咁望住裡面各式各款用透明杯殼裝好嘅布甸燒。 

就算我係男仔都不得不承認，呢間啲布甸燒個賣相又真係幾吸引，齋睇未放入口，已經可以想像到嗰種幼滑鬆軟嘅口感。 

「你係咪同子瑜嚟過㗎，你又會知道呢間鋪嘅？」曉琳轉身問我。 





「無啊，我都係第一次嚟。」 

「信你至奇啊，咁你覺得子瑜最鍾意食邊款？」我感覺到曉琳又喺度試緊我。 

「提拉米蘇？」我幾乎脫口而出，不過子瑜鍾意食提拉米蘇，但唔鍾意飲咖啡呢個算係我哋都知嘅事，所以曉琳只係考緊我嘅記性？ 

「嘻嘻。」曉琳一聲奸笑之後，擰轉身同收銀姐姐落單嗌咗份拎走嘅提拉米蘇布甸燒。 

仲以為曉琳又會趁機窒我兩句，但佢呢下奸笑，真係唔知道佢又響度諗埋晒啲咩古靈精怪嘅嘢，但見佢雙眼目不轉睛咁，望住收銀姐姐將個布甸燒從雪櫃攞出嚟個興奮表情。 





忽然間我靈機一觸，我再望向鋪頭旁邊嗰塊畫滿晒唔同布甸口味嘅黑板，由左至右、再由右至左咁掃視一個圈，但係...無時間俾我慢慢揀喇，跟住我就行埋去收銀處度： 

「唔該，我都想要份朱古力味啊，喺度食，唔使拎走。」 

「你又想食啊？」曉琳疑惑咁問我。 

「唔係啊，係想買俾你食，見你望到口水都流晒出嚟。」八達通「嘟」一聲響起，我袋返好個銀包。 

「你咁好人嘅。」曉琳笑道。 





跟住收銀姐姐好似表演魔術咁，將原本烘焙餅底面向上嘅布甸燒，乾脆利落咁翻返轉落隻紙碟上面，布甸脫離透明杯殼嘅一瞬間……完美著陸！剩低嘅只有布甸頂層喺著地衝擊之後嘅餘震搖晃。 

成個過程我一直企喺曉琳側邊，起初見佢擘大雙眼滿心期待咁凝望住個布甸燒，當著陸嘅一刻，曉琳直接拍手歡呼。 

曉琳呢個反應，搞到收銀姐姐都忍唔住偷笑，我諗其實佢同麥當勞姐姐都係一樣，希望可以將歡樂帶俾咁多位小朋友。 

至少我而家見到曉琳笑得咁開心，我都好滿足。 

我同曉琳學其他人咁，喺鋪頭隔離搵咗個空位，佢就開始品嘗呢個朱古力布甸燒。曉琳食緊嗰陣，我幫佢攞住子瑜個提拉米蘇，等佢唔使食到太論盡。 

「好好味啊，你要唔要試吓？」曉琳食咗幾啖之後問我。 

「哦好啊，我問收銀姐姐攞多支匙羹先。」 

「唔使啦。」曉琳直接用佢食緊嘅嗰支匙羹，筆咗一羹遞俾我，上面舊布甸仲喺度震下震下。 





我腦裡即時浮現返尋日子瑜笑我嗰句：「開心啦，曉琳食晒你啲口水尾，間接接吻啊。」估唔到事隔一日，我竟然可以調返轉頭食曉琳嘅口水尾？唔得，我絕對唔能夠展露出半點笑意，唔係就會俾曉琳睇穿我心裡面諗緊咩，我一定要明鏡止水當屋企支匙羹咁用。 

慢慢放入口...慢慢放入口...咬... 

唔...真係好好味，當然我係指緊舊布甸。 

睇見曉琳已經滿面笑容、急不及待咁想拎返個匙羹繼續品嘗，我就知道帶佢嚟買布甸燒呢個決定真係無懈可擊，我諗當子瑜見到佢份提拉米蘇都一定會好似佢好姐妹咁，開心到忘晒形。 

「無介紹錯呢？呢個布甸燒直情好過頭先間糖果屋嗰支布甸狗波板糖喇，今次係真係有布甸食添喎。」我俾曉琳興奮嘅心情感染到，不由自主咁指住子瑜份提拉米蘇表揚下自己。 

話口未完，曉琳含住支匙羹，瞪大眼睛。 

嗱咪住先...有啲唔對路... 





「我都無講過佢支波板糖係響頭先間糖果屋度買，你..又..會..知..嘅？」 

曉琳而家個眼神，簡直好似福爾摩斯終於逼到疑犯自投羅網咁。