[少甜][愛情][校園][真人真事改編] 自從我爸爸過左世，我遇上左佢: 38

第二日都係返學日，我發現原來識我既人越黎越多。
一黎應該係陸運會拎左個全場總冠軍。
二黎應該係因為籃球隊好耐都冇試過出線，佢地好似將我地首名出線既事搞到好大。
今朝早會嗰時，校長仲話黎緊既籃球隊比賽都要同學去打氣，務求要個氣勢贏過對面。
仲話希望我地籃球隊可以為學校拎返個冠軍。
真係冇諗過打個波都可以搞得出咁鬼多野。
另外我發現梓軒同思穎玩得越黎越埋。
個衰仔平時明明好似跟尾蟲咁跟住我架嘛，宜家日日同思穎一齊。
搞到我喺班房到好似邊緣人咁。
不過都多得佢我先至可以耳根清靜。




我先唔需要所謂既朋友，自己一個先過得舒舒服服，哼!
另外就係如無意外最後既一場社籃今日要開打。
呢場社籃拖左好耐，因為種種既因素而一直都冇打。
詳情我唔多講啦，始終我地紅社就係比藍社勁。
贏係意料之內既事，不過真係好多人睇... 好唔慣比咁多人圍住黎打波。
正如我前面所講，識我既人越黎越多。
下至同樣都係中一，上至中六既都叫緊我個名，幫我打氣。
今場比賽我冇盡全力去打，因為我知大概係Henry佢地最後既一場社籃。
我比左好多機會佢地得分。
當然，勝利呢樣野我都係冇可能會讓出黎。




最後都係我地紅社贏左，成功拎左今年社籃既冠軍。
贏波之後我地影左張「全家福」，好好咁紀念一下。
唔知點解，反而我覺得贏呢場波冇咩特別既感覺，自己一個入左更衣室換衫返屋企。
而佢地仲喺籃球場到開心緊，我差唔多行出校門先聽到佢地揾緊我。
總係覺得我份人好怪，個個都好開心既時候反而有種失落感。
呢種時候最好既就係自己一個人靜靜。
着住校服既我慢慢行，行下行下就去左籃球場。
偉哥佢地又唔喺度，都好既，我想一個人靜下。
着校服既我又冇波，但都係想喺呢個冇人既球場到坐下。
我諗左好多野，感情事有，打波既野有，未來既方向都有。




直到有個人影出現左...
佢係... 呢個係...?
天恩。