[少甜][愛情][校園][真人真事改編] 自從我爸爸過左世，我遇上左佢: 3

時間過得真係好快，隨着小四既結束，我既小學生涯得番兩年既時間，而夢兒姐姐都邁入中學既生活。
喺呢半年，因為夢兒姐姐所定既規矩，我地之間既距離拉得近左好多。
但因為佢升左上中學，即使會一齊出門口，但路程就完全唔同，放學亦都唔再會一齊走。
雖然可以做番自己，每日放學可以盡情咁打波唔洗等埋佢先返屋企，但始終都已經習慣左
所以冇左佢既陪伴，生活都冇咁多色彩。

小五，係呈分試既一年，每個人都好盡力去考好試，入一間好中學。
以往既我認為，入咩中學都冇咩所謂，始終自己都係想hea。
但同夢兒姐姐熟左之後，就好想同佢入同一間既中學。
夢兒姐姐一直以黎都好努力，而佢入既中學係區內第一既名校。




雖然我前面好撚串嘴咁話小學既野係智商測試，但如果想考個名列前芧既成績都係要付出
所以我都開始温多啲書，希望可以同夢兒姐姐入一樣既中學。

同一時間，我既籃球技術都一日比一日強。
一直發育緊既我，手臂力終於有所進展，而我希望可以升中前改為單手射波
雖然雙手射波唔係話唔準，但我希望可以將我既投籃練得更加強。
或者冇打開波既唔知，射波係籃球入面得分最直接，高效既手段。
不論係以前既中距離，定係由curry開發既三分時代，一直以黎投籃都係咁重要。
阿叔佢地就係射波唔算好強，所以就算可以打爆街場既人，都邁向唔到職業既道路。





---------------------(我係分隔線)-----------------------------------
有一日，我放學如常咁去打波，返到屋企見到夢兒姐姐喺房到。
因為升中既關係，我同夢兒姐姐既關係疏遠左，雖然都仲係會一齊食飯傾計。
反正就冇小四個時咁多互動啦。當我靠近佢間房嗰時，聽到一啲喊既聲。
我即刻入左去佢間房，佢睇落嚇左一嚇。
「你做咩喊啊...」見到平時好堅強既佢喊，我都嚇親。佢咩都冇講，只係行左過黎，攬住左我。
呢一刻，我明白到佢需要一個人既安慰，雖然我仲係小學雞，咩都唔識，但我都唔會推開佢既。
「我好大壓力啊...中學啲野好難...」夢兒姐姐用哭腔既聲音，斷斷續續咁講。
「冇事架，我會陪住你。」就係咁，我比佢攬左好耐先放開左我，但見到連夢兒姐姐都咁，我開始有啲擔心。





後尾先知，原來夢兒姐姐係小測既時候唔小心失左手，而且中學啲野本來就好容易唔及格
本來小學成日滿分既佢，一下子接受唔到個落差先會情緒失控。
但都因為呢件事，我同夢兒姐姐既關係好番好多，平日我地都會一齊做功課温書。
雖然唔同既野，但我地都會一邊做一邊傾下平日發生既事。
了解到對方既生活有咩唔開心，有咩困難，咁樣既生活維持到我升中。
啊係wor，因為平日有夢兒姐姐教我，而且我都努力左好多，最後都入到同夢兒姐姐一樣既學校。
可喜可賀，可喜可賀。
當然，呢一切都只係開始，故事既開始。