因為炸雞店一次意外，我變成了超級英雄。: 第十章 老人面

德村大排擋出事啦。阿誠揮開個大舊衰既拳頭，驟然間，只見阿誠已經比嗰8個男人圍住。

我個心囉囉攣，依然企係暗巷入面冇任何行動，腦入面就諗緊應唔應該出去幫阿誠手。但一諗到頭先阿誠接對方拳頭個下，依我判斷，個下技術絕對唔係阿誠可以做到。再加上頭先聽佢講佢都係個場意外下來既生還者，咁如果係咁，佢或者都可以發揮出個種力量。

我腦入面既呢個諗法令我繼續按兵不動，只見其他既食客冇人敢出聲阻撓，有幾個阿姐就行到老咁遠去報警同拍片。

阿誠好冷靜，佢觀察眼前既8個人，一啲驚既感覺都冇。

突然間阿誠既左手手腕生長出一把黑色既刀鋒，而呢把刀鋒好熟口面，我好肯定我見過呢把刀鋒，就係醫院個陣，帕特修斯左手個把！





阿誠踎低身，突然以極快既速度衝向正面既兩個人。個兩個人反應唔切，企左係度連擋既機會都冇，然後我見到既係大量既血液從佢地既頸動脈噴出，兩個大隻佬隨即倒地，應該已經死左。而恐怖既係，呢幾件事發生，只不過係兩至三秒既事。

其他六個自然比阿誠既舉動嚇親，個個身體不斷咁向後縮。阿誠又望向其他人，始乎係搵緊下一個應該向邊個落手。

個六個人掉頭就跑，但阿誠就好似一隻狩獵緊既肉食動物，佢一見到其中一個人走，即刻重施故技，又斬死其中一個。

周圍既人開始尖叫，原本坐係德村大排擋既人紛紛逃走，而阿誠見到咁既情況，臉上竟然露出一種好詭異既笑容。

情況已經失去控制，我既大腦話比我知我唔可以再袖手旁觀。不過依家呢度人數咁多，如果貿然走出去同阿誠對抗，我有特別能力既事就會比大眾見到，到時候我就會變得好危險。





呢個時候警車聲響起，一架警車泊係大排檔隔離，有3個警察揸住手槍落車，指住阿誠，大嗌︰「放低武器！」

阿誠已經喪失理性，佢望住眼前3個警察，又露出個個詭異既笑容。佢又再次踎低，我知道佢又想用個招，於是向佢地大嗌一聲︰「小心啊！」

其中一個警察始乎聽到我既說話，係阿誠撲向佢地之際，開左一槍打中阿誠既右肩。

阿誠右肩中彈，佢左手禁住中彈既位置，望住受傷既部位，面部既表情變得猙獰起泥。

個幾個警察上前想鎖起阿誠，但阿誠左手一撥，幾個差人就比佢撥開，身體就咁跌落部警車上面。





阿誠用手禁住個頭，表現得好辛苦咁。緊住佢向天大叫一聲，雖則係叫，但我覺得更似一種咆哮既聲。

佢掉到就跑，而佢走既方向，係平日好多人會行既商業海傍，如果佢係個度大開殺戒，咁就麻煩啦。

我係暗巷既垃圾堆周圍摷，終於比我發現到樣野可以幫我隱藏身份。呢樣野就係一個用塑膠造既老人面具，相信係啲人係派對用完就揼架。面具冇穿冇爛，不過係有啲污漬，抹完之後都叫可以用。

就係咁，我戴住呢幅老人家面具去追阿誠。