因為炸雞店一次意外，我變成了超級英雄。: 第八章 炸雞俠登場

夕陽落係海洋既水平線上，我如今坐係沙灘上面，望住一望無際既大海，腦入面一片空白。

今朝發生既事我仲未消化到，單手托住個貨櫃，人類根本冇可能做到呢件事。我覺得依家呢副身軀唔係屬於我，都唔屬於呢個現實世界。但亦都無可否認依家係我控制緊呢副身體。

我好混亂，搞唔清楚依家咩情況。我唔想成為一隻怪物，更加唔想比人當成異類。

身邊冇一個人可以傾訴。依家既我只想漫無目的咁游出去公海，直至筋疲力盡沉係海洋既最深處。

不過呢個都只係諗法，我根本就冇勇氣尋死。





夕陽離開左。周圍變得黑鼆鼆，唯獨天上面既星星散發住光芒。

我抬頭望星，佢地始乎係唯一可以安撫到我情緒既野。望住佢地，心入面既煩惱好似即刻冇哂咁。

「停手呀！」突然附近傳出把女聲。

我望向聲音發出既方向，好似係後面堆草叢傳泥喎…

腦海中閃過幾十個情況，包括情侶打野戰、睇片、打架等等…不過，頭先個叫聲都叫得好悽厲，我應該要過去睇下架。





我企起身，向發出叫聲個草叢行過去。一揭，見到個成身污糟邋遢成面鬚既男人騎緊係個學生妹身上。

「喂！你做緊…」後腦突然被硬物重擊，意識好似冇左。

「我地又見面啦，麥佐治。」好熟悉既聲音。

我擘大雙眼，見到「炸雞之神」就企係我前面。

「係你？」我望下周圍，同個陣既夢境好似。





「點解我突然之間又會泥左呢度？」我問。

「你比人用硬物襲擊後腦，令你失去左意識。所以你既精神傳送到我呢個空間。係呢度我地冇時間既概念，亦都冇現實既限制。」

「姐係我又死左？」

「哈哈哈。」佢突然捧腹大笑。

「有咩咁好笑？」

「區區個舊野點可以殺得死你。放心啦，你只係暈左姐。」

「區區？你對我既身體係咪知道啲咩野？」

「緊係知道啦，你依家擁有既野係我賦予比你架。」





「係你？你係點做到架？」

「因為我既力量，炸雞入面既能量可以激發出你內在既潛能。但依家我想同你講既係，殺死阿光既怪物就係帕特修斯。」

雖然唔明點解炸雞可以激發我既潛能，但後面佢講既野對我泥講比較震驚。

「個隻怪物就係帕特修斯？點解佢要殺死阿光？點解阿光又唔似其他人咁比佢食落肚？」

佢沉默左片晌，一聲都唔出。

「喂！答我呀。」

佢終於開口︰「帕特修斯故事仲未完。我地將帕特修斯炸完後，我同我既12個助手就一齊食左佢。」





「你地竟然…」我唔知比咩反應，唔明點解佢地可以將啲未知生物食落肚。

「食左帕特修斯之後，我地13人都獲得超乎常人既能力。但後來我地發現，帕特修斯係大自然混沌中誕生既生物，只要佢汲取到營養，佢就可以重生。所以食左佢落肚既我地，自然成為左個重生既宿主。當我地死既時候，帕特修斯就會破肚而出。為左阻止呢件事發生，我地用帕特修斯賦予比我地既力量，將佢既能量封印係特製調味粉入面。呢種粉末可以抑制佢生長，亦都用契約同雞進行連結，等佢地成為我地封印帕特修斯既使者。於是當特製粉末同雞混合既時候，帕特修斯就唔可以復活。」

「但你地做到咁周詳，點解佢都復活到既？」我又問。

「個次爆炸創造出新既混沌，加上雞同粉本身就存在帕特修斯既力量，仲要當時有埋你地既生命作為養份。種種因素加埋，令到帕特修斯成功復活。而佢從阿光身上攞既，就係本身屬於自己既力量。」

「佐治！聽我講，彼得亦即係阿光已經死左，你要諗辦法搵到另外11個人，聯合大家，一齊阻止帕特修斯從佢地身上吸返自己既力量。如果比帕特修斯攞返哂自己既力量，人類就會好危險，重生既佢依家冇所畏懼，只有襯佢依家仲好薄弱，我地先有機會可以殺死佢！」

「返去啦，記住我所講！依家既你好強！」

炸雞之神既聲音越泥越遠。我擘大雙眼，用力捉住係後面對我施襲既仆街。

又係一個污糟邋遢既流浪漢！我用力一踢，正中丹田，就咁將條廢柴踢暈係地。





騎係學生妹身上既男人見到之後，即刻從女學生身上跳開，口疾疾講︰「你…你想點呀？」

「即刻係我面前消失！」我怒睥佢。

佢都知死，即刻擰轉身跑走。

「你冇野嘛？」我問地下個妹妹仔。

只見佢臉頰顯紅，怕怕羞咁搖頭︰「冇野，多謝你。」

我揚手，轉身頭也不回咁離開現場。兒女私情實在唔係依家要處理既事，我知道自己有更重要既事要做。既然阿光係其中一個，咁我相信佢都係。

我拎起手提電話，從聯絡人揀起熟悉既電話號碼。





「嘟嘟…嘟嘟…喂？」

「喂阿誠，出泥見個面啦。」