因為炸雞店一次意外，我變成了超級英雄。: 第五章 初遇馬堅

自從個隻怪物出現左之後，社區再唔似以前咁安定。超市出現搶貨潮，大量市民因為恐懼離開市區。

即使政府已經向人民承諾會調查怪物既下落，但根本冇人相信呢個政府，因為個隻怪物冇留下任何痕跡，就好似水蒸氣一樣就咁蒸發左，所以根本無野可以調查。

我係事件其中一個現場目擊者，再加上同阿光係同一間公司既同事。所以個件事發生之後，警察約左我錄口供，今日就係我同佢地錄口供既日子，亦都係我出院既日子。

「咯咯咯。」病房既木門比人敲起。因為我係重要證人，所以醫院都安排左一間私人病房比我。

「入泥。」





門比人推開，入泥既係張芊奈，亦即係我既「天使」。

「佐治先生，警察已經係出面啦。」

「我知架啦，你叫佢地入泥啦。」

芊奈擰轉頭，想走出房間之際，我喝停左佢︰「等一陣！」

佢停低，望住我︰「有咩事？」





「呢幾日辛苦你啦，我今日就會出院，唔知…我仲有冇機會可以見到你呢？」

芊奈閃開我既目光，一聲都唔出，就咁行左出去。

我好失落。自從個次幫完芊奈之後，我同佢既關係就好似更加疏落。佢後來有向我多謝，不過就冇同我講關於佢自己既事，我都只係透過佢既名牌知道佢個名。講到底，或者佢根本就唔想虧欠我。

跟住三個著便衣既男人就行入泥，其中一個一泥就開口問︰「係咪麥佐治先生？」

「係呀。」我答。





聽完我講之後佢地就閂埋房門，中間開始自我介紹︰「麥生你好，我係警方國家安全部既指揮官馬堅。左邊係超自然研究大學教授何權國，右邊呢位係生物學家李策森。」

「你地好。」

「咁麥生如果你準備好既我地就開始幫你錄口供啦。」

「好呀。」

錄口供既過程唔算耐，一個鐘就搞掂。佢地都係問下個隻生物既特徵，同埋阿光死個陣既情況。我如實答佢地，不過聽完佢地都係皺哂眉頭，似乎都得唔到咩有效既資訊。

「咁好啦，唔該你佐治先生，口供錄完架啦。」馬堅將份口供袋好，同我講。

「咁如果仲有啲咩你後來醒起冇講既，就打呢個電話搵我啦。」佢遞左張卡片比我，上面有佢個名同電話。

我望向佢身邊兩個學者，問︰「兩位呢？」





馬堅搭嗲︰「我會幫你搵到身邊兩個博士，所以你靜係同我聯絡就得。」

「好啦。」

佢地之後就收拾好隨身物品，走出病房。