因為炸雞店一次意外，我變成了超級英雄。: 第四章 帕特修斯
我攤係張床度左諗右諗，點諗都記唔起意外發生個刻既畫面。反而同個個「炸雞之神」既畫面就記得一清二楚。
而最離奇既係，我發現自己身上一啲傷都冇。我曾經就呢件事問過李醫生，佢話我送院既時候皮膚高度灼傷，情況叫做危殆。不過當佢幫我進行手術既時候，傷口已經好返得七七八八。佢只係話奇蹟，亦都冇再多既解釋。而其他生還者似乎都同我有同樣既情況。
不過雖則有咁既情況發生，但我卻感覺唔到自己身體有咩異樣。不過就難免唔聯想到呢件事到底同「炸雞之神」有冇關係。個啲對話既記憶係真既，定係夢呢？
不過無論個個記憶係真定假，我靜知道一樣野係真，就係肚餓係真架。李醫生話我個情況可以落床活動，所以唔洗訓係度等人餵。
我跳落床，同當值既護士交代一聲，然後就行去醫院食堂食返個靚飯。
泥度醫院既canteen。呢度多數都係醫院既工作人員，亦有小部分著住病人衫既病人。
我行去點餐個櫃檯排隊，望下個餐牌有咩食。突然排係我前面既人突然轉身嗌我︰「喂佐治！」
我望向佢，原來係炸雞店做櫃台既阿光。
「咦！你都泥左呢度咩？」阿光又係後生仔，同我都幾岩傾，所以係度見到佢都幾驚喜。
「係呀，我醒返就係呢間醫院，都唔知發生咩事。」
「我又係，聽講係炸雞店爆炸。」
「我都係聽到類似既野，但我一啲記憶都冇。」
聽到呢度我突然腦入面諗到一個問題，就係阿光有冇同我一樣，夢到「炸雞之神」呢？
我當然唔會問得太明顯，我只係問佢︰「咁…你無意識之後，有冇發到啲咩奇怪既夢？」
阿光擘大對眼望我，只講左句︰「唔通你…」
「下一位！」佢講到一半，個櫃檯姐姐就叫到佢。
「等一陣再講。」佢話。
我點頭，從佢既反應判斷，睇泥佢同我有同樣既情況。
阿光拎住個餐去到其中一個座位，而我就開始點餐。而就係我點餐既時候，身邊熟悉既身影行過。點解我會對佢個身影咁敏感，因為個個氣味，同埋個個身形，個個輪廓，佢就係我今朝擘開眼見到既天使！
「啊…」我想嗌佢，但唔知點解嗌唔出。
「你要咩呢阿生，後面仲有好多人排隊！」個櫃檯姐姐又催我。我望向後面，成大棚人望住我。
我自然唔好意思，於是嗌左個揚州炒飯，拿拿聲拎去阿光張檯。
我一坐落張檯，阿光就問我︰「搞咩呀，比人咁喝。」
我懶理阿光的問題，四圍望下佢坐左係邊。但食堂之大，人數又咁多，我又真係搵唔返佢。
「唉，冇野。我地講返頭先個話題。」
「係呀，你咁問得我，似乎你都有喎。」
「冇錯，我夢到個聲稱自己係炸雞之神既肥老伯。佢同我講左一大輪莫名其妙既說話，又話我死左，又話可以令我起死回生，仲講左有隻咩帕…帕乜斯既野復活左。」
「帕特修斯。」佢補充。
「啊！好似係呀，你都夢到佢？」
「我係有夢到你講既野，但同我講野既人唔係一個肥老伯，我夢到既係一個金毛既外國後生仔，似乎同我地差唔多年紀。」
「咁搞笑？」我望住阿光，手揸住枝羹，呆左係度。
不過呢個時候，我感覺到個頭異常無比咁痛。我即刻鬆開匙羹，㩒住個頭。而令我驚訝既係，阿光一樣感覺到個頭痛，佢摸住個頭，嗌︰「哇！好痛呀！」
然後地下突然傳來震動，震動由輕微不斷遞增變得越泥越劇烈。食堂所有人都感覺到震動，但因為幅度好怪，唔似係地震，所以大家都唔知發生咩事。
突然一個黑色既物體打爛正門玻璃窗闖左入泥，個刻個舊黑色物體速度好快，我只見到一束影。但當我將視線慢慢移動到個個黑色物體既時候，我就知大事發生啦。
佢係我仲未見個既生物，巨大接近4米高，冇眼，翠玉瓜咁既頭骨，兩隻巨大既利齒係下腭末端突出。但身體卻係人類構造，可以企係度，左手手腕有住刀鋒既既物體，兩隻手肘都起角。腳指甲如同猛獸般尖長。
佢用力咆哮一聲，聲音大到耳仔發痛。然後隨手拎起幾個人，用力拋到空中，然後擘大個口，就咁將人食落肚。
食堂既人見到開始瘋狂逃走，但多數都漫無目咁亂走。檯凳比人推到跌哂，有啲人仆落地都冇人理，比人踩左幾腳。
我比眼前既畫面嚇到不知所措，好彩阿光拍一拍我，我先回復返個神智。
阿光大嗌︰「快啲走！」
我點頭，即刻掉頭奔跑。
但突然我又聽到好多刺耳既尖叫，我轉頭望向怪物個方向，又比我見到今朝個天使仆左落地，而其他人只顧住走，根本冇理到跌落地既人。
我停低腳步，猶豫緊要唔要幫佢好。
而阿光就繼續拉住我隻手，係咁講︰「快啲跑啦！」
「屌！」我揈開阿光隻手，一枝箭咁衝去天使既位置。
阿光就冇跟上，自己跑走左。
而係我跑既過程中，我發現自己隻腳好輕，好似唔係我咁。而且只係幾秒，我就泥度天使隔離，而我用肉眼判斷頭先我同既距離，足足有成百米。
「你冇事嗎？」我問佢
佢搖搖頭，我望向個隻怪物，似乎佢冇留意我地呢邊。我抱起佢。咦？咁輕既。然後開始拔腿狂奔。
呢個時候怪物方向傳來熟悉既叫聲，我望過去，只見阿光已經比怪物捉住。
然後接下來既畫面真係難以置信，阿光身上竟然發光，同夢中「炸雞之神」既光幾乎一模一樣。
而個啲光粒竟然比隻怪物吸收緊！當阿光身上既光粒比佢吸哂既時候，阿光變成一個燒焦既屍體，眼見再冇生命既氣息。
隻怪物仰天咆哮，然後講左一句人話，佢話︰「力量返泥啦。」
佢講完呢句之後，就跳出醫院，從人群既眼前消失得無影無蹤。