一覺瞓醒，你竟然同我講香港有喪屍？！: Zombie 16：一悲一喜.
這次終於成功了！與此同時，喪屍亦成功把鐵閘推倒，一窩蜂擁進了渡假村。
「一個一個爬過去，然後扶實條梯。」我吩咐著。
「噉邊個先？」小鳳問。
「呼哈……是旦啦！我暫時冇力爬，俾我哋抖抖先……」我軟癱在地上休息。
「我先！」洛雯自告奮勇做第一個。
隨著洛雯的行動，女生們也開始緊隨其後，剩下我們男生二人加一個阿叔。
「阿水叔，你先喇！啲喪屍有機會上到嚟，我哋時間無多！」我催促著還在拖拖拉拉的蔣金水。
「我……我畏高……」蔣金水緩緩道出。
屌！總有一個豬隊友喺左近！就好似七仔同M記噉，總有一間喺左近。
「我先喇！」家輝邊行邊說。
「阿水叔，下個到你！」
我走向通往天臺的樓梯口把門鎖上，我完全沒有意料到推個竹梯會弄這麼久，也沒有預料到喪屍那麼快就把鐵閘推倒。
「我……我留喺度……呢條鎖匙係我間舊鋪㗎，書房裡面有個夾萬，夾萬入面有本筆記，記錄晒我所有銀行密碼，公司資料呀嗰啲……你哋等個香港冇咁亂就去拎嚟用啦！我老婆仔女都唔喺度囉，我其實都冇咩牽掛。」蔣金水突然向我交代身後事。
「阿水叔，唔係好高咋，快啲爬啦！」我繼續催促。
「嘭！嘭！嘭！」喪屍真的找上門了。
你班喪屍可唔可以唔好計到啱啱好先上嚟得唔得呀！頂！
眼看蔣金水整個人在發抖，我上前一把扶起他，走向竹梯處強迫他爬過去。
「條鎖匙……條鎖匙呀！」蔣金水一直將他手上的鑰匙塞過來。
「好！好！好！我袋住先，你跟我一齊爬過去。」
我將繩子的末端綁在一條柱子上，然後牽著蔣金水的手準備爬過對面。
「雯雯！Mayu！小鳳！幫我哋撳實條梯，我哋要一齊爬過嚟！」我大聲吩咐道。
雯雯三人立即合力按住竹梯，連同一旁疲憊的家輝亦上前幫忙。
「水叔，頂住呀！唔好望下面，跟住我個步伐一步一步向前爬，唔好急，定啲嚟。」我嘗試引導蔣金水。
「嗯！」
竹梯下的喪屍彷彿在替我們打氣，手舞足蹈地向我們揮手呼叫，但他們的動作並沒有先前的喪屍般擁有驚人的行動力，至少他們不會跳。渡假屋天臺的拍門聲愈來愈大，甚至感覺愈來愈近。
「咿——」蔣金水的手愈來愈抖震，比按摩棒震得還厲害！
「唔好驚呀！水叔，我一定會將你帶過去，唔洗驚！」我把蔣金水的手握得更緊。
老實說，我不知道哪來的勇氣，竟然牽著一個發抖的老人爬著這條懸空的竹梯。他抖得愈厲害，竹梯上的我們就愈不安全。
「哥！後面就嚟頂唔住喇，要快少少呀！」洛雯擔心道。
「老公！」Mayu雙手合十似在祈禱，但她本身明明沒有任何信仰。
「吼嘩——啊！」天臺的鐵門被撞開了，目測超過十隻以上的喪屍一擁而上，向著我和蔣金水衝過來。
「水叔！」我用力拖拉著死守原地的蔣金水，硬著頭皮一步一步爬過對面。
聽著這群喪屍的叫聲和腳步聲，很明顯比竹梯下的喪屍更有攻擊性，而且速度可能跟一開始襲擊我的那隻喪屍是同等級。我不再理會竹梯的安全性，用雙手抓住蔣金水，把他固定在我的背上。
「我孭你過去，捉實我！」
說真的！蔣金水雖然不胖，但確實很重，也有可能是因為剛剛把力氣花光在「竹梯遊戲」上的關係，導致我爬得非常吃力。
「差少少咋！」洛雯替我打氣。
就差那麼一步的距離，一隻喪屍突然抓住蔣金水的小腿。
「啊呀！好痛呀——」
「水叔！唔好放棄，差一步咋！」
很明顯我連一步也跨不出去，喪屍的力氣真的很大，大到我快承受不了的狀態，更何況被死死抓住的蔣金水，小腿的痛楚一定比生小孩還要痛。
「啊呀——」
果然！
「阿哥！手！」家輝撲上前用力抓住我的肩膀，嘗試把我抱住。
唔係叫我俾手咩？捉住我膊頭做咩？而且咁大力鏈落嚟好痛㗎！
「梯要跌落去！」Mayu驚叫道。
「哥！我捉實你！雯雯將條梯㧬落去。」家輝大叫。
「龍仔！龍仔！我就嚟冇力喇。」蔣金水把漁槍掉下，雙手用力抱緊我的脖子。
「水……水叔！咳咳！箍頸……氣……唞唔到氣……」我屈膝用腳踝輕踢蔣金水。
正當我被家輝拉上去之際，蔣金水突然鬆開手，我來不及伸手去拉他，只能眼睜睜看著他掉下去。
「水叔！」我們五人異口同聲大叫著。
「……小鳳？」我們身後突然出現了一個五十多歲左右的男人。
「阿爸？你真係冇事，擔心死我喇！」小鳳一個箭步把男人抱緊。
我雖然很理解小鳳重遇家人的心情，但蔣金水才在我們眼前掉下去，而且還被喪屍圍堵發出陣陣的慘叫，我真的無法替她高興，至少不是在這個Moment。
「佢哋係……」小鳳爸爸問。
「我好朋友……阿爸……啱啱跌落去個阿叔救過我，而且係佢開船送我哋過嚟……」小鳳突然哭泣起來，情緒轉變未免太快了吧！
「我哋入去先！」小鳳爸爸示意我們跟上。
學校裡的人不多，寥寥可數，大約二、三十人左右。除了幾個青少年外就只得叔輩年紀和年邁的老人。
「Uncle，呢度剩係得你哋？」家輝訝異著。
「係！」
「其他人呢？」我接著問。
「唔知……可能喺第二度匿埋呱？」
「螢螢！擔心死阿媽囉！」小鳳的媽媽跑過來一把抱緊她。
「媽……」小鳳又再次落下眼淚，但顯然這是開心的淚水。
我們跟學校裡的所有人打聽過後，又知道了更多喪屍的特徵了，我總結了一些新的資料。
普通喪屍：行動緩慢，攻擊力低，基本上殺傷力唔大，可輕易掙脫。
勁少少喪屍：識得跑，超大力。
好𨶙勁喪屍：識得跑，識得跳，超大力，攻擊力超強。
「咩好𨶙勁喪屍呀？有咁勁咩？」小鳳不屑的問道。
「我唔識點形容，但真係好𨶙勁，成兩、三米咁遠跳過嚟，妳都咪話唔勁。」我顯得有點激動。
「本当！（真的！）真係好𨶙勁㗎！」Mayu附和道。
「Mayu，妳唔好成日學埋晒啲粗口啦！阿哥！好心你講少啲粗口啦！教壞晒Mayu！」洛雯抱怨著。
「係！係！大小姐！」我開玩笑道。