時光突然倒流，打完飛機啲精縮返入龜頭: （26）

全黑嘅環境維持咗唔夠五秒，一道閃電打破昏暗，帶嚟光明。

我第一眼見到嘅係紫色嘅天空，以及黃色嘅雷電。

雖然我睇到嘢，但卻感覺唔到自己嘅身體。

一道閃電再次劃過天空。

驟然間，我個頭漂浮咗起嚟，一路升到半空，再同一副好似猩猩咁多毛嘅身體拼合。





與此同時喺我面前，有一個上身赤裸嘅肌肉硬漢，佢手持一把散發光芒嘅青銅利劍，不斷對住我揮動。

莫講話佢個樣，就連佢嘅動作都快到肉眼無法捕捉。

我淨係知佢一邊揮劍，我分離嘅手手腳腳就一邊拼返埋。

先係兩隻手，跟住到兩隻腳，再跟住又係兩隻手，最後陸續再駁埋六隻腳。

唔係呀嘛！我居然有四隻手、八隻腳，而且仲有一對翼？！





我拍翼向後飛，對方亦都身不由己咁後退。

我同佢大約拉開咗兩米距離。

呢個皮膚黝黑、滿身肌肉嘅男人，又係我老豆。

佢上半身無著衫，下半身就用一塊以牛皮縫製嘅短褲遮住，望落似一個部落族人。

我地兩個俾一片熊熊火海包圍，遍地都係屍骸，感覺猶如處身於煉獄之中。





但點估都估唔到，啲火居然係我噴出嚟嘅！

點解我會知？因為家陣我個口將啲火焰吸返入去。

究竟我又變咗啲乜嘢，會識得噴火咁神奇？

除此之外，地上嘅各種屍體亦都陸陸續續「復活」。

一隻俾斧頭劈中個頭嘅大黑貓…唔係…應該係獅子？

唔係喎，睇睇吓又似係貓…

算啦，總之就係隻好似貓嘅嘅獅子，佢喺我旁邊企返起身。

而插喺佢頭上嘅斧頭，三百六十度向後旋轉。