時光突然倒流，打完飛機啲精縮返入龜頭: （19）

不經不覺間，我終於都捱完沉悶嘅少年時期，繼而再從一個細蚊仔，退化成初生嘅bb仔。

接生我嘅居然又係同一個人，唔同在佢上次著嘅醫院護士服，今次就著古裝。

對我而言，佢並唔係接生，而係「送死」。

喺時間倒流嘅世界中，死亡先係一切嘅開始。

當雙眼再次打開，我見到自己正正訓喺棺材入面。





我老豆老母，仲有mk仔大嘜，圍住副棺材痛哭。

佢地一路喊，眼淚就一路倒流返入眼。

我第一眼先留意嘅係三人嘅衣著。

我老豆老母前世係山賊，而前世嘅前世就似返正經人家。

老豆著住古代嘅官服，留有一執羊咩鬚，老母就一身白色輕紗長衫，個樣望落後生咗。





至於大嘜個look直頭就係帶刀護衛。

直到佢地三個收返曬啲眼淚，我嘅身體自動喺棺木中彈返起身。

我發現自己正置身於古代嘅衙門公堂之中。

一塊懸掛嘅牌匾大大隻字印住「懸高鏡明」…

唔係唔係，應該要從咗邊讀起，係「明鏡高懸」先啱。





我開始估自己前前世嘅身份。

死於公堂之內，我諗我應該係官府嘅人。

莫非係官差？我身上嘅衫又唔似喎，反而係似坐喺公堂上審案嘅人。

嗰種人叫咩職銜呢？官人？判官？大人？

我掛住諗呢個問題，分咗心，無留意到身邊發生嘅事。

當再回過神嘅時候，就發現自己坐咗喺公堂之上。

喺我面前嘅案台，放置咗筆墨、狀紙、一個簽筒，仲有一塊黑色嘅驚堂木。

視線再移遠少少，我睇到喺公堂之中，擺放咗一個銅鑄嘅狗頭鍘。





一個斷咗個頭、傷口滴緊血嘅身體，「long」咗喺上面，地下則有一大灘鮮血、一個血淋淋嘅人頭。

我心入面屌咗出聲，無預計過會遇到啲咁嘅場面。

同埋點解無啦啦會有個狗頭鍘喺度？

如果我無記錯，狗頭鍘係包公專用嚟對付重犯嘅刑具。

咁唔通…我前世嘅前世係…包青天？