時光突然倒流，打完飛機啲精縮返入龜頭: （18）

開講有話，「快活不知時日過」，開心嘅日子總係過得特別快。

隨住倒退嘅時間流逝，一個一個娶返嚟嘅老婆，轉眼間一個又一個咁返娘家，回到未嫁之時。

先係miss朱，再到miss曾同miss張，最後得返我自己一個。

啲古人通常好後生就結婚，所以當時間倒退至我未娶老婆嘅同時，我亦回到青少年嘅年紀。

我前世嘅老豆老母亦都「復活」咗。





佢地都算係我識得嘅人，男嘅係以前中學嘅校長，女嘅就係我小學校長。

本來走咗三個老婆，生活已經變得好乏味，轉過頭仲要俾兩個前校長，送咗去私塾度讀書。

私塾就即係古時候嘅私立學校，通常有錢人家先有得讀。

啲同學全部都係男人，因為喺古代封建社會，女仔係無得返學。

無認錯人嘅話，班同學係我做外賣仔嗰時識嘅廚房佬，教書先生就係餐廳老細。





無論前世今生，圍繞喺自己身邊嘅，幾乎都係同一班人。

每日喺私塾，對住啲四書五經，真係悶到抽筋。

以前返學唔想聽書都話可以走堂，家陣身體唔到我控制，想走都走唔到。

喺無聊嘅時候，身不由己嘅我就會喺度諗兩個一直未有答案嘅問題：

1. 究竟點解時光會倒流？





2. 時光倒流到幾時先會停？

我日思夜想，諗到頭都爆埋，始終都諗唔到一個合理嘅答案，嚟解釋呢一切。

可能要等時間倒流至真正嘅盡頭，先會得到解答。