是咁的，我無啦啦收到隻戒指: 一.

琴晚我見Followers已經去到9999，就諗住等埋佢去到一萬先瞓，點知我等到天荒地老都未有多一個人Follow，最後仲等到瞓着咗。

一覺瞓醒，Followers終於去到一萬。

我拎住部電話喺個廳鳩叫又鳩跳咗一陣，然後…

陷入沉思。

之前咩都玩過曬，到底今次又可以玩啲咩？





唉，唔理喇，打返鋪機先啦。

我開電腦入Discord，我個Friend一早已經喺到等緊我。

「喂，大作家一萬Followers喇喎！」

佢係啊金，係我中學同學，都係由一開始支持到依家嘅忠實Fans。

「係呀。」我開Game：「打鋪機先啦，一間有嘢要問你。」





「得呀，GOGOGO！」

呢一鋪打咗成個鐘，最後佢贏咗，不過唔緊要，因為我已經拎咗我嘅是日份快樂。

「差少少收皮，好彩頂住咗，最後一波反吸。」佢唞曬大氣：「你唔係有嘢要問我咩？」

「係啊，我想問你一萬Followers有咩可以玩？」我拎部電話出嚟碌IG：「咩都玩過曬，而家都唔知玩咩好。」

「你俾我諗下。」佢靜咗幾秒：「你好似冇玩過匿名問答？」





「你講NGL？」

「係呀。」

我回憶咗一陣：「好似真係冇。」

「咁仲諗咩？玩啦！」

「即去。」

講完，我就即刻Down咗NGL個App。

整好條Link之後，我就將佢Send咗比啊金。

「喂，啊金！」我喺Discord呼喚佢。





「搞掂喇？」佢問我。

「係啊，你撳Story條Link試下。」

「得，而家撳。」

幾秒之後，我部電話就響咗，係NGL個App嘅通知。

「我Send咗123，你睇下有冇。」佢Offline咗隻Game。

我撳入個App，第一個就係佢個「123」。

「有啊！」我答佢。





「咁你Po得Story架喇，我去做嘢先。」

「Ok bye。」

講完，我就開IG將個NGL Link Po咗喺Story到。

一萬Followers匿名問答活動…正式開始！