我喺迪士尼識咗個女仔: 29
過左幾日，終於到阿龍同Jasmine嘅大日子。
「點啊我靚唔靚仔啊？」阿龍問
「今日最靚仔係你啦」
「我係女一定會搶婚」我地個個都無好似平時咁潤阿龍，因為大家都知今日係佢大日子
望住阿龍都結婚喇，感覺當年喺灣仔後街一齊飲酒嘅三劍俠都長大了，除左我…
兄弟團喺阿龍屋企準備好晒之後，終於出車去Jasmine屋企接親喇，為左將功補過，司機梗係我啦。
去到Jasmine屋企，啲姊妹都算俾面無玩得太過火。唯獨係見到嘉澄嗰陣不自禁就好想逃離現場… 點解可以咁尷尬㗎。
一直以來，我都以為我自己尷尬凌駕一切，但係當見到阿龍同Jasmine受到父母祝福，我先發現如果兄弟朋友幸福，自己尷尬其實不值一提。
「娘家搞掂晒，下一站就男家喇喎」強哥無啦啦講呢啲係咩玩法
「架車坐得四個人，我同Jasmine、曦哥，仲有一個位喎…就嘉澄啦不如」阿龍又跣我一鑊
「係囉係囉，坐旅遊巴好容易暈車浪㗎，嘉澄你跟雷諾曦車啦，佢手車出名穩」
我想像唔到有幾尷尬…
「今日真係多謝晒你啊曦哥」阿龍話
「小意思啦，你大日子喎」我一路揸車一路話
「唔好咁講，幾時到你啊？」阿龍真係仆街黎…
「啊哈哈哈哈哈，邊度咁快啊，女朋友都無個」我一路答一路偷瞄嘉澄嘅神情變化
「係咩～定係要睇下人地咩反應先？嘉澄妳點睇啊？」連Jasmine都加入仆街行列
「啊…哈哈哈我唔知喎，我都無男朋友嘅～」
咦，咁係咩意思先…
Jasmine娘家喺天水圍，阿龍就住北角，長途車加埋婚車都咪話唔辛苦。
「返到男家喇，兩位新人請落車～」一落車已經有其他兄弟姊妹接應，我終於有啲時間休息下
「頭先，你唔好介意佢地講乜喎」我同喺車邊嘅嘉澄講
「唔會，唔會…」好尷尬啊屌
「你，呢排幾好嗎？」梗係好啦，同表弟去迪士尼
「幾好吖，幾好…」
傾計嗰陣，我先發現嘉澄個妝一年第一次喺迪士尼見到佢係一樣。就算係做姐妹，當其他人都會化濃少少、差唔多嘅妝，唯獨嘉澄個妝特別淡，但係又唔會暴露到皮膚嘅弱點。多年做攝影師嘅經驗同我講，呢個妝一定唔係化妝師化嘅。不得不說，佢始終都係咁靚… 係我唔識得憐香惜玉。
望咁耐，嘉澄都開始望返我，對眼嗰陣大家又尷尷尬尬咁望下電話望下車。咁樣落去只係自討沒趣，我同嘉澄不約而同咁上樓了。
「抹完車喇咩？」強哥問
「咩啊，泊返好啲就上黎啦」我話
「哦～無傾下計咩？」強嫂都插嘴問
「少少啦，咁尷尬嘅嘢我做唔出」
「啱嘅，留返今晚先啦」強哥話
我想講做兄弟其實真係好辛苦，由5am踩到夜晚，又要玩遊戲又要擔擔抬抬，到時我結婚肯定要封大利是俾班兄弟。
啊，講遠左，我應該有排都唔會結婚，不過阿龍封利是真係好夠義氣。
我係完全唔明點解阿龍會book喺東涌Sheraton擺酒，所以我係要喺北角車返佢地入東涌。北角空車去天水圍接親、天水圍返男家、男家去婚姻註冊處再入東涌，油費都唔平啦…
「ok可以出發去註冊處喇」
「紅棉路註冊處～坐穩喇喎」我話
「咩啊，大會堂註冊處啊。」嘉澄突然出聲
「係咩？乜唔係紅棉路咩，我記得阿龍講過㗎喎」
「明明就係大會堂，你就記錯喇」
「你地兩個都錯吖…睇下rundown，係尖沙嘴註冊處」
「啊…哈哈哈大家兄弟姊妹太忙啫，一時唔記得」我打圓場
「係囉係囉，阿曦又要揸車又要玩遊戲忙中有錯咋嘛」嘉澄話
嘉澄幫我出聲？
「哦…唔緊要啦，仲有時間～」阿龍意味深長咁講
「係囉係囉～最緊要解開誤會」阿嫂真係越嚟越調皮
跟住佢地就靜咗全程直到酒店。
「終於去到最後一部份喇～結婚原來真係好攰」阿龍話
「但你唔開心咩？」我問
「開心，更開心係你同嘉澄終於破冰喇喎」阿龍拍拍我膊頭
「又講我…都唔知依家究竟算點，好似破冰又好似無變咁」
「俾啲時間自己啦，破冰都唔係一日可以完成嘅事」
或者阿龍講得啱，我唔應該逼得自己太緊。
架花車送到阿龍佢地去東涌，我就去左還車，佢地話反正夜晚都唔使揸車，伴郎團可以多一個替酒鬼。阿龍結婚咁開心，破例飲一次啦唉…
「多謝各位親朋好友見證我人生最幸福嘅日子！未來或者唔可以再自出自入屋企約大家飲酒篤波，不過歡迎大家得閒去我屋企打邊爐！」
結婚咁開心，就係要盡興！所以收人情嗰陣我都破例飲酒，仲要飲唔少，有紅有啤，總之落得肚嘅液體都係酒。
「阿龍今晚quota夠喇，等我地呢班兄弟上！」強哥話口未完，一條友隊左三杯紅酒，我都唔差，隊左兩支大啤
「哇，曦哥今晚真係勇，一條友半枝紅酒四支啤酒！掌聲鼓勵！」阿龍話
「唔係喎，你睇下嘉澄，七支啤酒，痴線㗎，使唔使叫停佢吖」Jasmine問
「唔使啦，你睇下佢地，天生…一對！」強哥步伐不穩咁講
跟住我好似訓著左，直到聽到周圍乒乒乓乓先醒返，原來人地已經執緊嘢。其實呢一刻我都已經好唔清醒，不過我用盡最後一刻理智企起身，然後攞返自己啲銀包電話。
「吓屌啊，人呢？」當我企起身嗰陣，我發現其他人都走撚晒
「咪喺度囉屌…」我用力睇清楚眼前呢個女仔，竟然係嘉澄
「嘿嘿嘿，我就知道你唔會𨂽低我」
「邊個話？我走㗎喇」
「我今次唔會再俾你走㗎喇，妳跟我黎！」我唔知點解鼓起勇氣捉住嘉澄對手，一路跑到唔知邊度。
「我唔跟啊！我要訓覺！」嘉澄話
「咁妳俾我同你一齊訓！」
「好啊！」
馬嘉澄真係醉到… 不過東涌出去咁遠，而且嘉澄住沙頭角要入禁區咁麻煩，無辦法之下嘅辦法，就只有喺呢間酒店過夜。我有啲口乾，見到檯上面有杯唔係啤酒色嘅嘢飲，心諗點都安全嘅，梗係一飲而盡啦，唔係邊度有力抬隔離個女仔。
「唔該開間房，張單擺落頭先擺酒嗰度。」我feel到自己就黎冧，但明明頭先我係飲水㗎。
咪住，點解嘴角有陣味，水應該無味㗎喎。仆街，唔係白酒吓話…？攞住張房卡，點都要頂硬上㗎喇，好彩唔係市區啲酒店咋，唔係真係俾人以為我借醉行兇。
啊，我都醉到咁，都唔算行兇啦，頂多係誤會。
入到房，我一個溫柔嘅公主抱放低嘉澄喺King Size Bed度。就算經歷咁疲累嘅一日，望下佢個可愛樣，都係同未分手嗰陣一樣。我無借醉做任何嘢，傻啦，點解要咁做？曾經要珍惜嘅人我無珍惜，我邊度有資格玷污佢，同床只係咁啱同迫於無奈啫。
我捲起張被將張King Size Bed劃成楚河漢界，解左頸頭兩粒鈕，幫嘉澄冚好被，轉個頭就去左搵周公了。
夢入面，再一次出現曉盈。我同曉盈坐喺公園嘅長凳，久久不發一言。今次，嘉澄始終無出現。我欲言又止，好想同曉盈講清楚自己真係要放低，但係又好怕佢承受唔到。
「其實，你有無諗過自己點諗㗎雷諾曦？」曉盈望住我問
「我自己？」
「係啊，一直以來你只係唔想做傷害兩個女仔嘅渣男，但係你自己呢？你不斷逃避內心嘅諗法其實都係傷害緊自己喎」曉盈繼續講
一直以來，我都將自己放得好後，因為我覺得嘉澄同曉盈兩個女仔值得更多保護，但係我自己點諗我根本唔知。做兵都話知道係為左娘娘，我做咁多野係為左兩個女仔定係自我感動？
「你值得對自己更好。三個人之中點都有人會受傷，呢個係無可避免，但係可以令受傷嗰個無咁傷，靠嘅就係你把口同行為。」
「吓，即係點啊？？？？」我唔係好明，諗住再問曉盈嗰陣，佢就消失左喺我夢境入面。
然後我就帶住頭痛起身了… 宿醉好辛苦。
望住仍然熟睡嘅嘉澄，點解可以訓到衣衫不整咁款… 不過我仲邊度有資格理？我覺得呢刻離開我就同渣男無分別，但俾佢知道我咁樣抱佢上房，我真係準備叫龍哥保釋我。
返到屋企，礙於真係超級頭痛，沖完涼就即刻訓死左，再起身嗰陣已經係黃昏。打開WhatsApp，見到二十幾個message。
首先係龍哥。
「Wtf點解酒店話你開左間房？」12:05
「仲要係大床房 Dllm千六蚊一晚😇」12:06
跟住係樂欣。
「你係咪痴線㗎 就咁放低嘉澄喺酒店房😀」11:30
跟住係瘋狂spam地鬧我，然後…
「不過你地尋晚做左啲咩👀😏」13:42
最後係曉盈。
「點啊你？我見到阿龍結婚嘉澄都有去喎？」
09:22
「有無喺嘉澄面前做頂酒坦克啊？🫢」09:23
「依家都未覆即係冧咗啦🫡👌🏻」16:33
「我唔理喇，今晚食飯啦，我啱啱出左糧心情好😙」17:05
我坐喺床度苦笑，然後不情願咁跳落床換衫。
「妳睇下妳，咁多年都食到污糟貓咁。」我想幫佢抹嘴角嗰陣，佢竟然縮開。
「又話要溝返我，又要避我」我笑佢
「唔好啦，又要逼我做bitch，你知唔知我好委屈㗎」
「係係係，最慘係你啦…」
一直我都以為，同前度分手只有不歡而散，但係呢一刻我竟然feel到兄弟情誼，而唔係愛情。我對曉盈嘅，應該係關心多過愛。
「你啊，唔好諗咁多啦，生活仲係要繼續過！聽日我地兩個又要做返社畜㗎喇～ 快啲返屋企啦！」望住曉盈蹦蹦跳跳咁上巴士，我先安樂咁返屋企。我無好似以往咁送曉盈返屋企，畢竟角色唔同，而佢又無要求。
坐車嗰陣，我碌IG見到嘉澄個story，差唔多十點先啱啱放工。換著係以前，無論我幾攰，見到嘉澄咁夜都未走一定會揸車去接佢，仲要買定底雞蛋仔俾佢食。我只能夠嘆氣，然後熄左電話個mon佢。
———————————————
作者的話：
話說小弟最近更新得越黎越慢，真係唔好意思🙏🏻
實不相瞞，小弟係應屆DSE考生
所以更新埋呢個chapter真係要停更兩三個月了…
希望大家可以體諒下 考完DSE我會返黎的🥲