我喺迪士尼識咗個女仔: 28

「其實森林咁大，無必要為左一棵樹停滯不前」
「愛一個人，嗰個人其實先係佢個森林」

我無反駁，因為呢個係事實。

「但係明知個森林有危險，或者已經俾人私有化，妳都仲會冒險走入去咩？」我問
「我諗我get到你咩意思喇，大佬」Hazel苦笑
「呢個世界啊，大把森林啦。走，請妳飲珍珠奶茶」

細路女未識諗係一回事，辦公室戀情麻煩都係一回事，所以咁樣處理對大家嘅傷害都最低。





「大佬，你個Ex係咩樣㗎？」Hazel問
「哇，妳啱啱受完咁大打擊就問呢啲問題？」
「我就係想知邊個可以贏到我咁勁」
「妳係咪對自己嘅吸引力諗得太有信心…」
「妖… 咁我輸囉得未？」
「妳仲係咁容易動情成世有排輸啊。我Ex係個大情大性嘅女仔黎㗎，佢雖然成日兇我，但其實作為幼教嘅佢好有愛心，入迪士尼玩見到自己學生，寧願放低我都要同佢地玩。」我飲住珍珠奶茶話
「哈哈哈哈你好慘啊，仲有無啊？」

「佢有時好小鳥依人，乜都靠晒我咁。但係又有時…一個人承受晒所有嘢」




「哦… 哇原來我地行下行下行左去筲箕灣添」Hazel突然咁講，我先發現我地兩個已經由太安樓行到去筲箕灣電車站，意識到我成隻手都濕晒嗰陣先知原來已經行左咁遠。

最後我地兩個上巴士返小西灣。

「到我問喇，識左你唔係好耐咋喎，咁快鍾意我嘅？」我真係百思不得其解，自問都無flirt人又唔係特別靚仔。
「你俾人好可靠嘅感覺吖嘛，同埋你鬧人…真係好可愛，所以咪氹到我呢啲細路女囉」
「吓，點可愛法啊…」從來無人話過我可愛
「點講呢…想狠狠咁鬧我但係又忍住忍住咁，好似個煲唔開蓋就快滾水咁」
「咩比喻黎㗎…」





話咁快就返到小西灣，我送Hazel到正門大閘。

「走啦返屋企休息啦妹，唔好諗咁多喇」
「得喇哥，原來叫你阿哥都幾順口」
「無我睇住你仆得街啦」
「係喇係喇，不過今晚嘅嘢，不如當發左個夢？」
「我最怕妳唔開心咋，妳ok我ok」
「我點會唔ok吖～八次好人卡心理點會唔強大？」
「係係係，快啲休息啦，聽朝準時返工」

返到屋企，本來諗住沖涼訓覺，結果阿龍send左個message俾我。

「快啲入嗰個兄弟姊妹Group啦😑全世界等你」
「得啦煩膠」





Group入面，兄弟大部份都係中同，同埋幾個阿龍嘅同事。至於姊妹，除左Jasmine自己啲friend，竟然俾我見到嘉澄。

原來佢仲未block我…

「再一次多謝咁多位老友用一個咁特別嘅身份見證我同Jasmine嘅人生大事！大家可以放心，啲game全部都好輕鬆無殺傷力😎 希望大家嗰日玩得開心！」

無殺傷力？有強哥同我仲有成班中同喎…

婚禮前一個月，成班兄弟姊妹約左出黎party room傾下plan，不過咁啱我要出婚攝trip，真係咁啱，錯過左同嘉澄解釋返嘅機會。其實由始至終，我最介意同關注嘅都係嘉澄。

「你又會咁啱唔喺香港？」阿龍問
「大佬你呢個月係結婚月黎，我唔使搵錢咩…」
「會唔會係咁啱幾次食飯都唔得吖」連Jasmine都咁講
「連阿嫂妳都唔信我…」
「係成班兄弟姊妹都唔信你啊！佢地個個都知你單嘢，就係想趁今次幫你地破鏡重圓。」強哥話





嗰晚，我一路執行李，一路喺度諗，其實係咪我太長情。明明係我做錯，提出分手嗰個係佢，我可以拍拍籮柚走左去快活都得，偏偏無呢種感覺，又有種說不出嘅空虛。唉，都係搵錢緊要。

唔記得講，今次嘅partner係富哥，即係又公數去旅行嘅節奏。

「李生李太早晨，我係你地今次嘅攝影師Jayden，呢位係另外一個攝影師Tony」
「今次麻煩晒你地喇，有啲位我地自己都未去過」

呢兩夫婦應該係我見過最有禮貌嘅客，由對接到傾價錢都無乜還價同要求。我同富哥其實對航班時間無乜所謂，但係個客好堅持要早機，唔係因為自己，而係擔心我地紅眼航班會好辛苦。最後為左成本問題，加埋我同富哥都勸佢地留返啲錢結婚，都係香港快運嘅凌晨機。

講起香港快運，我第一次同嘉澄去旅行咪就係…

上機之後，因為富哥鼻鼾大，所以佢自己坐，我坐兩位新人隔離。

「李生李太，你地幾時簽紙或者擺酒㗎？我睇下使唔使做左你地啲相先？」我見佢地都無訓覺就問下




「啊，其實我地一早簽左紙㗎喇，至於擺酒我諗我地都唔會㗎喇，所以啲相慢慢黎都得。」
「明白…不過真係好少見呢啲情況」
「之前疫情嘛，我地做小生意嘅捱得好辛苦，都無乜錢剩就無擺酒無影婚紗相。到依家重回正軌，發現其實唔擺酒都無乜所謂，但係婚紗相就梗係要啦」
「李太對李生都好有信心喎」我由心而發咁讚
「拍左拖十年，嫌佢無錢對佢無信心一早走左啦，信心係雙向嘅，你要對人地有信心，人地先會對你有信心。」
「明明就係我嘅美貌鎖死左你…」李生話

見到兩公婆耍花槍，我都識做咁退場訓覺。回想起嘉澄同我之間，其實佢對我有無信心呢？

呢5日都唔好諗可以輕鬆咁遊山玩水，因為一旦有天氣狀況，戶外景就好大機會要喺5日內擇日再戰。不過一對新人似乎毫無倦態，帶動埋我同富哥嘅熱血。

「呢對新人真係我見過最襯。」執器材嗰陣富哥話
「人地經歷左好多㗎，一個就係糟糠之妻，一個就係好好先生」我話
「都睇得出，嗰陣建議過佢地喺香港綠幕影，李生一口就話一定要實景，因為老婆鍾意」富哥話
「咁依家可以公數去旅行就更加無怨言啦」





呢五日好似好難捱，但係又好似好快過咁。李生同我地傾嘢嗰陣，無論點都會拖住李太，仲事事問過老婆先。五日之後，佢地繼續度蜜月，都不忘送一盒士多啤梨俾我地攞返香港。雖然呢份心意真係收到晒，但係對咁多器材嘅我地真係百上加斤。

返到香港，執完啲婚紗相終於可以休息下，因為為左阿龍結婚我攞左好幾日Annual leave。

「點吖龍哥，緊張嗎？」
「話唔緊張就呃你啦係咪啊雷生？」龍哥答我
「緊張唔緊要，最緊要唔好搞錯新娘就得喇」強哥一路飲酒一路講
「屌你啦，Jasmine咁靚點會認錯」
「我係講緊曦哥呢～今次，真係唔好再俾人走左去喇」強哥捉住我隻手好認真咁講
「咩…咩啊，平常心啦」
「你知唔知上兩次兄弟姊妹gathering嘉澄有幾心不在焉，係咁問你去唔去，跟住我話安排車婚禮完送大家返屋企，佢衝口而出講左你屋企地址喎」龍哥話
「咁…大家都未放低啫。況且我做得咁錯佢點會原諒我吖」
「人誰無過，你咪用一世彌補返」

請左Annual嗰幾日梗係唔係淨係放假啦，為左幫龍哥洗少啲錢，我地秉持幫得就幫，借得就借嘅精神幫龍哥壓縮婚禮開支。尤其係場地佈置同婚禮攝影方面，我真係碌盡人情卡請左公司幾個後生仔幫手，就連花車都係我問老豆借，強哥再搵佢錦田嘅車房朋友打左個靚蠟。龍哥呢世都估唔到成日問佢r著數的兄弟，竟然幫佢個婚禮慳咗幾皮嘢。

女子組梗係有Bridal Shower，男子組只係簡單喺大排檔食左餐飯。

「計我話，龍哥之後就係你㗎喇Joseph～」強哥話
「哇，你明知我係不婚主義者黎㗎喎」
「乜都有可能，況且你係金融才俊嘛」
「梗係曦哥先啦，你地都on99嘅」呢個時候龍哥突然指住我話
「又關我事？」我問
「梗係啦，明知人地未放低仲唔去追？嘉澄呢啲好女仔你唔主動好容易俾人溝走㗎」

呢個時候，龍哥電話響，終於結束左呢個話題。

「一講曹操，曹操就到都有嘅？雷諾曦快啲過黎，有嘢俾你睇」
「咩事啊？」

我行到埋黎，發現係同阿嫂嘅視像，但係嘉澄喺隔離。

「Hi阿嫂…」我尷尬咁答
「點啊雷諾曦，去日本公幹好唔好玩先？」
「公數去旅行梗係爽㗎…」
「吓原來你唔係…」嘉澄呢個時候出聲
「唔係咩啊？」我問
「無…無嘢喇」

點啊馬嘉澄，神神化化咁…

等收線後，我先逼問成班仆街究竟佢地同嘉澄講左乜。

「屌你地啊，你同佢講我係因為唔想面對而去日本散心？」
「你都話你自己係仆街囉，咁我地都係想你個教訓深刻啲啫」強哥一臉自豪咁講
「屌你老母啦…阿龍你做乜唔阻止佢啊？」
「喂咁強哥有佢嘅道理喎，你唔可以再咁吊兒郎當㗎啦，馬嘉澄唔等得㗎喇」
「再等佢就收經生唔到唔可以生個親家俾我㗎喇」

咪住，咪撚住，乜撚嘢話？？？

「即係咁…你地就快做契爸啦～」強哥一臉輕鬆咁講
「唉碌柒，阿嫂咁好基因俾你糟蹋晒」
「屌…」

就係咁，幾個麻甩佬又係咁樣鳩吹到深夜…