我喺迪士尼識咗個女仔: 20 (嘉澄自白)

今日，係我一世都唔會唔記得嘅生日。或者因為我似花瓶，自細朋友唔多，男朋友…俾人玩多過真係拍拖。終於今年，就快三十變中女嗰陣，第一次有老豆以外嘅男仔陪我過生日，仲要喺日本。

原來感覺真係可以好微妙，以前亦都係唯一一次拍拖嗰陣，好似要口口聲聲提住自己拍緊拖先真係feel到拍緊拖。中學時期兩小無猜，誓估唔到我會俾人戴綠帽。

大概由嗰一刻開始，我唔相信男人了。

被分手後嘅每年聖誕節，好慶幸仲有樂欣師姐陪我過，未至於做毒女。不過，人地都有強哥㗎嘛，年年咁樣破壞人地節日氣氛都自討沒趣啦，結果呢幾年又毒返，upgrade咗做白金卡都好似無乜用。

「與其年年揈錢又去得唔多，不如試下自己去啦」樂欣話
「係囉，我朋友雷諾曦成日都係咁啦」強哥搭嘴話




「會唔會好尷尬㗎？」我問，因為我從來都未試過
「入迪士尼係求開心㗎嘛，唔使介意人地目光啦」

樂欣咁講又好似係喎，一不做二不休，即刻預約個入園日期，兩手揈揈入園啦。

首先入去梗係玩Space Mountain，呢個係連女仔都未必嗌嘅過山車，其實除左快入面乜都睇唔到，唔明點解可以咁長青。由於係平日，就算無卡都係排5分鐘，但係似乎職員就未訓醒，無分開我同前面個男仔，結果我地同一卡車。

見隔離個男仔無咩反應，咁我又無謂搞咁大件事。

有玩過Space Mountain都知，其實只不過不停轉轉轉，無乜嘢好驚，但係畢竟一個人去無乜偶包，所以我由開始轉到完都不停大嗌，全車得我咁樣做，反正去迪士尼就係求開心，梗係唔理人地嘅目光啦。不過，隔離個男仔個樣仲驚過我喎…





話咁快就玩完，當我諗住繼續玩其他game嗰陣，個男仔截住我話：

「喂，下次玩Space Mountain唔好再叫咁大聲，有少少柒。」雖然我係嗌得大聲，但係關佢咩事喎？

「你…其實你係邊個？」我有啲嬲，點解眼前呢個男仔可以咁串

喂，越叫越走嘅？個男仔講完即刻衝出去唔知去左邊。

唉算當我黑仔。烈日當空，斷估個男仔都唔會怕曬應該玩灰熊㗎啦，咁我就玩小小世界過冷河先。點知我錯了，原來佢同我同船，仲咁休閒咁睇電話？等我嚇嚇佢先。





「我屌你老母…」呢個人咁爛口嘅？
「你無啦啦串我先㗎」我扮嬲咁講
「對唔住咯小姐，妳想我點賠罪？」
「陪我玩一日。」我只係無心插柳咁講左呢句，點知挑起左我嘅小心思，其實我入黎搵返個男朋友咪得囉！無人話迪士尼唔俾一個入兩個出喎
「唔得，我黎呢度就係散心，俾妳跟住仲得了。」有無搞錯啊，我咁靚咁快落閘
「咁我同人講你非禮我。」我唯有出呢招啦唉

玩完小小世界，我拉左佢去小熊維尼冒險之旅。

「呢個好玩啊。」我一直都覺得小熊維尼呢個係最有童真嘅遊戲

玩完出黎，個男仔眼眶濕晒嘅，佢唔係嬲我要脅佢嬲到喊吓話？

「哇你做乜啊？」我問




「無事，有沙入眼啫。」一定係玩小熊維尼有沙入眼啦…
「咁我地去玩灰熊山谷個過山車啦。」我唔知點做好，唯有繼續帶佢玩
「嗰個叫極速礦車啊！唔係灰熊山谷！」個男仔突然執著搞到我有啲嚇親
「有咩唔同喎？」
「灰熊山谷係成個區名，極速礦車先係個遊戲。」
「其實咪一樣！唔好咁執著。」點解個男仔會為左一個名而起晒鋼呢？
「唔得，極速礦車先係個名。」

唉，我屈服，原本應該係我做公主變左係我要時刻留意佢情緒。

玩到咁上下都肚餓啦，估唔到佢問我食唔食嘢先。

「妳食唔食嘢？」佢問
「好！去火箭食啦。」我直接答佢





見到佢食飯食到心不在焉咁，肯定係睹物思人啦，於是我試探咁問佢。

「喂，你Ex好鍾意迪士尼？」
「吓…咁妳都知？」咁驚訝嘅？
「見你玩乜都眼濕濕咁，又唔係驚，即係睹物思人啦。」
「妳都唔好咁八卦，其實我都唔識妳，食完嘢就唔好跟住我。」仲係咁串，唉…
「好，同埋我有名，我叫馬嘉澄。」
「妳叫阿儀都唔關我事。」

食完飯我突然興起想睇musical，又會咁啱，個男仔都睇緊。Musical內容十年如一日，調轉背都得，不過每次睇都總會笑得好開心，或者可能係職業原因啦。

好耐都無試過咁開懷咁笑喇，樂欣講得啱，去迪士尼求開心，點解要顧及人地眼光？

我同個男仔中間分開玩左陣，睇煙花嗰陣俾我發現佢企到個靚位，梗係厚顏無恥咁痴埋去啦。





「哇…」我不禁驚嘆，重建後嘅城堡。配合燈光同音樂，感覺煙花又昇華左另一個層次。

相比重建前，加入左好多光影元素，同埋感覺音樂更加觸動人心了。城堡大左，反而顯得無咁空虛，可能就恰巧填補到一個人嘅空虛。

本身以為同呢個男仔嘅緣份就係去到煙花，點知佢跟住嘅行為真係嚇一嚇。

佢一出迪士尼就瘋狂跑，跑到上車就一粒聲唔出，去到青衣站落車就即刻爆喊。

「唉好喇好喇唔好喊喇，紙巾抹吓眼淚先啦，好柒。」估唔到想搵人陪嗰個變左陪人
「唔該…」

我同佢坐低喺機鐵站無人嘅長凳，聽佢娓娓道來同個Ex五年嘅愛情故事。

「就咁睇，你定情於迪士尼，情逝又喺迪士尼。」我話
「都可以咁講…」




「所以你去迪士尼就係想正面克服呢樣嘢？」
「唔係…」
「吓？咁你入去做乜？」
「我純粹唔想蝕張白金卡…」
「哈哈哈哈哈哈咁撚戇鳩嘅，為左唔蝕錢而辛苦自己。」我真係未聽過咁荒謬嘅理由
「喂…好柒啊細佬女。」咁事實呢個理由真係好好笑喎
「得啦，喊過就會無事，好似我咁，一個人都可以盡興。」我話

本來以為只係個過客，點知…

「師妹～我有求於妳啊」樂欣約我出黎食飯話
「做到嘅我一定幫妳做㗎，除左借錢」
「咁膚淺㗎妳，我係有筍嘢益妳啊」
「有咩咁筍啊？」
「之前阿強咪講過佢個friend雷諾曦嘅～佢想搵model幫手影相啊，佢要參加比賽，唔知咩一日男友嗰啲」
「吓，我唔得㗎喎，咁耐無拍過拖點知一日男友係點…」
「最緊要靚就得㗎喇，去啦去啦，你都唔想我難做㗎？」

喺樂欣嘅半推半就情況下，我都係妥協決定幫人一把。

「hi你係樂欣拍片好勁嗰個朋友？」我係一個頗主動嘅人，所以我直接dm雷諾曦
「係啊…叫我阿曦得喇。聽日妳想邊度拍？」
「迪士尼得唔得？」
「都得，十點正門等？」睇黎有年卡喎
「ok」

好耐無同異性單獨出街，莫名其妙咁有啲興奮，唔知雷諾曦係咩樣㗎呢？

朝早，難得假期我都八點起身，因為第一次見雷諾曦，又係shooting day，所以要化妝set頭。其實今日都唔算凍，不過難得約男仔應該俾佢睇到我嘅活力，所以決定著件薄Hoodie，set個馬尾同淡妝。

樂欣「掂過碌蔗啦😻」08:55
我「係咪㗎？🌚」08:55
樂欣「俾啲信心自己，阿曦好男仔黎😌」08:59

點解我feel到唔係拍片咁簡單嘅？

九點四十分，其實除左代購狗邊度會有人咁早到，所以好容易就認得出雷諾曦嘅背影。

「等左好耐？」我問眼前嘅男仔，佢擰轉頭望住我

原來佢就係雷諾曦？？？

「吓，妳就係樂欣個師妹？」
「吓，妳就係樂欣師姐講嗰個諾曦？」

兩個人僵持喺驗票閘前，唔講仲以為係情侶臨入場鬧交。

「咁妳仲拍唔拍？」佢問
「拍，我點解要怕你？」其實我真係好緊張啊啊啊，點會估到前幾星期見到同我懟到咁僵嘅男仔就係雷諾曦啊。

聽樂欣講雷諾曦真係做攝影，咁我梗係信任佢嘅專業，由佢喺美國小鎮大街搵左幾個位，諗埋啲pose，拍左幾個素材。果然係專業，張張都係IG直出級別。

「埋位啦。」佢話
「你呢？」我問
「我？關我咩事？」
「你唔知個主題係一日男友咩？」我問
「wtf？我聽都無聽過喎？」咁大整蠱？定係做媒㗎咋？

「我都未介意你介意啲乜，快啲啦。」不過又咁講，po IG扮有仔曬下命都幾好吖～

佢好明顯為交差影幾張，效果相當尷尬。

「你咪成碌木咁啦，邊有男女朋友企成尺遠。」呢個無拍過拖都知啦，中間成個人嘅距離。

「喂，行啦快啲玩機動遊戲。」為左緩解尷尬，我主動提議玩機動遊戲
「哦。」佢根本未俾得切反應已經俾我拉左去Space Mountain，哈哈。

「一陣記得要拖實我喎，我會驚㗎。」或者可能真係恨仔好耐，我竟然會痴線到講呢啲咁flirty嘅說話
「吓…」佢一時反應唔到，死得啦
「都話你係我一日男友，做戲做全套啦。」我唯有咁樣打圓場。

死喇死喇，我係咪沉船喇？我唔要啊啊啊 :(

玩完Space Mountain，我地去左玩蟻俠。據聞呢個係可以交流最多嘅機動遊戲黎。

「你要carry我喎，阿曦！」我攞出畢生嘅勇氣賣萌，其實真係唔知佢受唔受，可能覺得我幼稚。

到拍拖嗰陣先知道，原來佢真係幾受呢套，或者可能我真係可愛，嘻嘻。

「前方嘅危機已經解除，可以繼續開火！」跟住我地去左玩蟻俠，係真難玩。

「喂射啦，我要爆分！」我攞住把雷射槍亂射
「咁虧㗎妳，等我教妳。」

點知原來佢攞左我把槍Σ(-᷅_-᷄๑)

「喂啊，你出貓嘅。快啲俾返把槍我。」有無搞錯啊，佢唔俾我射但係單手繼續輸出
「我就係唔俾喎，吹咩。」

我想哄埋去攞返把槍結果一跌就跌左喺雷諾曦胸膛度。我同佢都呆左，我唯有用笑掩蓋我嘅緊張。

原來心動嘅感覺真係無得呃，電光火石之間已經夠。點解…點解單身咁耐嘅我會有感覺嘅？我唔明啊啊啊啊…

「就係咁喇，點算啊…我點解會心動㗎？」嗰晚，我同樂欣傾電話
「放鬆啲，咁依家自由戀愛時代，鍾意人咪追囉」
「會唔會係我太耐無見過男仔先咁咋？應該唔係心動嘅～」
「你唔好自己呃自己啦，你呃到我呃唔到自己㗎」
「但係人地唔係啱啱分手咩？」
「咁無人叫你依家衝埋去嘅。仲唔認？仲話唔係心動，問咁多做咩？」

哎呀，咁樣俾人周到…