我喺迪士尼識咗個女仔: 19

第三日，今日我一早就起左身，因為我自己都好期待，畢竟係第一次去東京迪士尼。

「七點幾，咁早起身玩嘢咩？」
「今日行程豐富到你唔信，仲要轉酒店啊，快少少啦」
「唉得喇得喇，依家化妝」

喺Family Mart簡單食個早餐，終於踏上呢兩日奇妙之旅。首先坐地鐵去八丁堀，然後坐JR，九個字就到迪士尼了。嘉澄一上車就訓左覺，完全無察覺原來去緊迪士尼。

「到站喇，落車啦…」
「咁耐嘅…你究竟帶我去邊度啊？」




「你落車跟我行你就㗎喇」

落JR後行多七分鐘，終於到迪士尼門口。嘉澄由呆左嘅表情變成嚇親嘅表情，我就知道今次行程好彩有迪士尼。

「東迪？？？呢個真係東京迪士尼？」
「係啊，飛都買埋，仲約埋餐廳添啊～」我舉起兩張飛話
「啊啊啊啊啊，你又知我想去嘅？」
「講多無謂啦，快啲入去啦」

咁早入到去已經好多人，對比香港迪士尼真係小巫見大巫。我同嘉澄穿過大街市集，去到城堡花園個分叉路，我做過功課最近係探險樂園同明日世界，所以問嘉澄想邊個先。





「不如西部樂園先啦，畢竟同香港最唔同，而且。我真係好想好想行下呢度。」嘉澄雙眼發光咁講
「講明先啊，我地一定玩唔晒Disney Sea同Disneyland㗎，儘量玩得幾多係幾多～」

嘉澄揀左玩西部樂園嘅巨雷山過山車，實在不敢相信九點都要排成個鐘，呢個大概就係東京迪士尼嘅威力。

「哇…平時香港要排半個鐘都算耐啦，呢度咁早都要成個鐘…」
「所以港迪除左細啲，都幾吸引㗎」

真係排左成個鐘先玩到，不過無令我地失望。類似極速礦車嘅嘢，但係好玩好多，更加刺激。





「呢個真係正，呢啲先係過山車嘛～」我話
「真係啊，港迪嗰啲係俾細路仔玩」
「咁跟住玩咩啊？」我問
「我趁頭先排隊背左呢度個地圖，諗吓先…不如玩飛濺山啦，濕下身都好喎」
「我有得拒絕咩，係咪動物世界啊？行啦快啲，一陣又唔知排幾耐㗎喇」

我無講錯，呢個又要排一個鐘。其實玩東京迪士尼真係要好有時間觀念，因為餐廳又要book，入shop買嘢又要book。

「哇玩到濕晒～但係原來咁就十一點喇？點解呢度時間過得咁快嘅？」
「因為排隊用好多時間囉～我地玩兩個遊戲排左兩個鐘，仲要周圍行呢～」我話

嘉澄話夢幻樂園同香港差唔多，所以直接去左隔離個卡通城。

「呢個兔子羅傑卡通轉轉車好似幾好玩喎～不如玩呢個啦」




「好啊，妳話事啦」唔係我hea覆，而係東迪多game到根本唔知玩邊款好
「從來都未試過去迪士尼係玩到攰，東迪好正啊～」
「妳鍾意嘅話，以後年年嚟一次囉～」我話
「口甜舌滑啦你，你好有錢咩？港迪咪都係咁好玩」
「係喇係喇，有妳邊度都好玩㗎啦」
「有雷諾曦同馬嘉澄，邊度就有童話」
「Beauty and the beast？」
「係啊你咪隻Beast囉」

你一言我一語，終於排到我地玩，原來咁就40分鐘。

其實都係啲轉下轉下跟住有啲嚇鬼嘢出現咁，不過嘉澄似乎好enjoy，鑊鑊都俾人嚇倒。

「哎呀～真係俾佢嚇死」
「咁都驚～真係注定要我保護妳」我拖住嘉澄隻手話




「喂～我邊度話認你做我男朋友㗎？」
「妳有得唔認咩？妳已經屬於我啦」
「我發現，你去到日本都幾大膽喎。成日女朋友前女朋友後，又乘機抽水」
「咁去到陌生地方無後顧之憂嘛～」
「你個咸濕仔雷諾曦吖！唔理你，玩Space Mountain」

東迪個Space Mountain真係超級無敵多人，排隊時間係65分鐘，不過嘉澄話想玩都要玩㗎。

「今日好似好多時間都係用黎排隊，好浪費啊」嘉澄話
「點會浪費啊？排隊嗰陣累積嘅係妳同我相處嘅時間喎」我即刻補返句
「真係？咁BB豬可摸以幫我一個忙啊？」

我係應該feel到有伏的，因為嘉澄叫我衝出去買個Toy Story爆谷桶。

「買到喇，個桶係幾靚嘅」




「咁你食埋啲爆谷啦～唔該你吖」望住嘉澄水汪汪嘅眼睛，我唯有放棄我一直以來保持得好辛苦嘅身型。啲女人真係好古惑！
「真係唔食？」我問
「唔喇，太肥喇」
「如果我餵呢？」
「啊～快啲啦」

根本就唔想洗手先唔食…

原來世界各地嘅Space Mountain，都係清一色得個轉字，不過呢個轉得仲勁。

「哇～呢個Space Mountain真係好轉啊」
「係囉，香港嗰個好弱啊。都差唔多食飯喇喎，行啦」
「咁急做乜啊？」
「我book左餐廳啊，遲到無得入去㗎喇」
「我真係懷疑你係有預謀咁拐帶我去東迪」




「梗係啦，叫你去plan行程係煙幕黎～」

我預先book左鑽石馬蹄餐廳，係就係貴啲等同港迪大街飯店價錢，不過勝在可以一早預約唔使排隊嘛。即使我係迪士尼迷，不過不爭嘅事實係迪士尼內嘅熟食不嬲都係食飽就好，但係東京迪士尼嘅熟食又真係唔錯喎。燒牛肉套餐¥5500但係份量唔細又唔會老，仲包沙律、麵包同生果，兑返三百蚊港紙算係咁啦。

「如果香港迪士尼食嘢都有呢個質素就好喇…」嘉澄話
「火箭餐廳，百五蚊漢堡包，仲要同班大媽爭位坐」我話
「嘻嘻，今餐我請啦，唔可以要男朋友出晒㗎」嘉澄話
「咁點得啊，妳生日喎…」

仆街，口疏左添…

「你點解知道㗎？肯定又係樂欣啦」嘉澄問
「係啊係啊，所以今次都算係驚喜啦係咪？祝妳生日快樂～我轉頭先再講」我攞出當日買嘅另一條手鍊
「我有喇喎呢款，唔係你送嗰條咩？」
「我係送俾自己㗎」

我戴起條手鍊，然後拖住嘉澄隻手。

「依家，妳係我嘅人喇，我都係妳嘅人喇」我終於可以堅定咁講出呢句說話。

「我知道我知道之前實在太吊兒郎當，唔夠決絕，係因為我仲未夠勇氣接受一段新戀情。五年，係好深刻，但係呢半年同妳經歷嘅所有嘢，無論係去妳屋企食飯定係喺海濱睇風景，我覺得我自己變左。我可以做返一個男朋友應該做嘅嘢，我可以享受同妳一齊嘅每一分每一秒。所以，馬嘉澄，好多謝妳，由當日喺機鐵站陪個大細路喊，到依家陪個大細路去東京迪士尼，一直無放棄過佢。依家，到返個大細路陪妳喇」

我無好似日劇咁浪漫即刻嘴埋去，只係輕輕咁擁抱嘉澄一下。我知道，擁抱先係我地之間嘅默契。

「我唔想喊…但係…你個衰人雷諾曦，係要搞到我…咁開心嗰陣喊！其實，係你一路陪我，曾經…我以為唔會再對男仔動心。結果…你真係個衰人，由迪士尼到雞蛋仔，一舉一動都牽引住我。」嘉澄嘅眼淚喺眼眶打轉，我知佢唔想喊，但係有情人終成眷屬，幸福嘅淚水點會白流？

認定關係後，身處迪士尼嘅我地更加似童話故事。成個世界有馬嘉澄就即刻潤色唔少，排隊好似好快排完，但係歡樂時光就特別長。

唔記得玩左幾多個機動遊戲，終於都到巡遊環節。

東京迪士尼嘅巡遊真係完勝香港嗰啲，可能無煙花可以專注搞花車，無論係角色定燈光都靚啲。嘉澄眼眸又有熟悉嘅倒影，不過今次好似想喊咁嘅？

「嗯…做咩喊啊？」
「無…無啊，有啲感動啫」
「傻妹嚟嘅，都話以後想嚟就嚟啦」
「唔係啊…我係話，估唔到有男仔會接受到我。我俾人感覺好花瓶、好幼稚，我又做唔到女朋友嘅嘢，唔成熟唔識諗，想做就做」
「妳幼稚，我陪妳幼稚，妳做花瓶，咁我做支花囉」
「雷諾曦…我愛…咪住，你話我係花瓶你係花？」
「啊…有咩問題？」
「咸濕仔！！！」然後嘉澄踢左我一腳

唉，冤枉啊大佬。

睇完巡遊原來已經九點，攞返寄存嘅行李，我同嘉澄去Check in。奈何Budget有限，住唔到最typical嘅迪士尼樂園酒店，但係都book到玩具總動員酒店，仲要喺我有限嘅日文情況下同酒店聯絡到安排生日驚喜。

「哇～呢間酒店好靚啊」嘉澄一入酒店就俾色彩繽紛嘅Toy Story人物吸引。
「唉，budget有限，唔係住左城堡嗰間啦」我懶係sad咁講
「唔緊要啦，你有心幫我慶祝我已經好開心喇。不過真係估唔到，簡簡單單去個旅行俾你搞到我喊，哼！」
「喔，妳仲有得喊喎～妳打開房門睇下～」

多謝東京迪士尼，加¥5000有咁高質嘅生日裝飾。

嘉澄見到乜都無講，淨係識得喊。

「唔使咁喎，妳咁樣我好難…」未等我講完嘉澄已經衝埋黎喊住咁嘴我，咁呢啲甜頭我就無理由拒絕啦係咪？
「透唔到氣…咳咳咳」我話
「又扮嘢，你平時用口透氣？」嘉澄即刻理性返
「哎呀，俾妳發現左添，不過嘴咁耐都夠啦～」
「啊，我發現你真係長期心無雜念㗎喎，咁都可以唔諗歪」
「攰到咁點諗歪啊，咕～」人類個胃真係唔會呃人

於是我同嘉澄落樓搵嘢食，結果淨係喺隔離間酒店搵到Lawson…生日便利店大餐，都幾值得紀念。

「唔講以為做賊…邊有人去人地酒店買晚餐㗎？」嘉澄問
「咁妳係咪想餓死先？呢度附近搵間餐廳都有難度」
「童話世界可能唔使食嘢？」
「你想我點答…？食嘢啦」

一個飯糰，一個三文治，兩件千層蛋糕，原來同愛人過生日，唔使天花龍鳳，都可以好滿足。

「食嘅嘢好唔好味，其實都係睇同邊個食啫」

食飽之後，我同嘉澄返酒店房…沖涼訓覺，因為聽日仲要去Disney Sea。兩個人攤喺床上面，最適合傾心事。

「今日真係好充實好開心啊，多謝你雷諾曦。呢個一定係最難忘嘅生日。」
「唔會㗎，因為我同妳，未來仲有好多個生日要過㗎。沒有最難忘，只有更難忘～」
「我發現呢，你真係越黎越識講嘢。諗返第一次見你嗰陣去迪士尼，哭哭啼啼咁，本身諗住呢個男仔咁懦弱，估唔到依家會同我同床共枕」
「哎呀妳咁樣講嘢嘅？不過又真係嘅，嗰陣入小小世界妳跟埋黎嗰陣我已經feel到呢個女仔一定唔簡單～」

原來講講下，嘉澄已經訓著左。我睇下個錶，原來已經十二點喇，聽朝仲要六點半落去食早餐，繼續玩埋呢個奇妙之旅。

「早唞喇…馬嘉澄。」