中六個年 我鍾意左叫我起身個女仔: 我不想知道太多(三)

「呢個係佢個客嚟。」啊澄淨係講咗簡單一句。

「淨係咁？」我有啲懷疑自己係咪比人撚。

「我有答到你條問題，想再問你咪再飲。」佢捉我問題嘅漏洞。

嚟到呢個位，我淨係想知到底件事係點，唯有肉隨砧板上。

我斟酒，然後一啖清：「佢係咪啊晴嘅大金主同前仔？」





呢個係一個是非題，佢冇可能走得甩。

「係。」佢幫我斟酒：「你都幾醒，識問是非題。」

「見人講人話，見鬼講鬼話，純粹見招拆招啫。」我再飲一杯。

「仲有嘢問？」佢有啲驚訝：「仲有問落去嘅必要咩？」

「有，一定可以問落去。」





「咁…你問啦。」佢好似有啲怯。

只要我想，我問足一日一夜都得。

粗略係有極限，但詳細係近乎無極限。

只要一直都唔滿足，知道嘅嘢就會越多。

知道嘅嘢越多可能會越傷心，但至少唔會係嗰個蒙在鼓裡嘅戇鳩仔。





「我想知佢點解要做呢份工？」我飲完之後專注咁望住啊澄。

唔係缺錢到一個地步，冇人會主動做埋啲咁嘅嘢，除非真係好貪錢。

「佢貪錢，就係咁簡單。」佢眼神有啲閃縮。

佢根本唔肯定，我唯有喺另一個位鑽落去。

「佢幾時開始同個金主一齊？」我再飲一杯。

點樣由客變做男朋友，呢個都係重點。

係因為錢，定係情？

「佢接完第一次金主單之後，就冇做過其他人。」佢答得有啲隱晦。





可以係第一次之後就比人包起，亦可以係佢第一次之後就沉咗船。

我唔相信係前者，但就現有資料嚟講，我都排除唔到前者嘅可能性。

我再飲一杯：「佢幾時開始做，同埋幾時開始唔做？」

我無可能完全掌握到佢對嗰個人係點，但我可以大概掌握到佢對我係點。

「三年前開始，兩年前開始冇出現。」

兩年前開始冇出現，即係中四之後佢就淨係接金主單。

「由金主轉做男朋友之後幾時分手？」我再飲一杯。





幾時一齊冇人知，但幾時分手都係重點。