中六個年 我鍾意左叫我起身個女仔: 我不想知道太多(二)

呢個係一張合照，啊晴同啱啱個男仔嘅合照。

「同Ex嘅合照啫，有咩特別？我而家都摷到幾張出嚟啦！」我自己覺得唔在意，但語氣不受控制地有啲激動。

「唔特別咩？」佢放大個男仔個樣：「佢個樣幾似你喎。」

「人有相似，物有相同。」我繼續扮冷靜。

「咁都啱嘅。」佢再碌去下一張相：「咁呢張你又有咩睇法？」





呢個係一個TG群Chatroom嘅Cap圖，正中間有一張啊晴嘅自拍相，而個群名係…

「出租情人/兼職女友」

「可能係人哋覺得佢靚女，純粹Po上嚟分享下呢。」我作咗個連我自己都唔信嘅大話。

「下面仲有價錢表，不過唔比你睇啦。」佢收埋電話：「你應該唔知呢單嘢啩？」

「的確係，咁又點？」





我其實想問多啲，但又唔想顯得自己好犯賤。

「總之，我知道嘅嘢好多，而且有好多都冇講出嚟。」

呢個時候，啊姐拎住酒同杯行咗入嚟。

平時啊姐都會搵我吹兩句，但我估佢都Feel到唔對路，擺低啲嘢就即刻衝返出去。

「咁關我咩事？」





佢斟好兩杯酒：「你想問嘅，絕對可以，不過一題一杯。」

「猜枚啦，我唔會問。」我伸出雙手。

「其實你都行到嚟呢步，你覺得你真係咩都唔想知？」佢拎起酒杯：「你諗下我今日係點叫你出嚟？」

無錯係，我係因為有啊晴嘅消息先出嚟，但我純粹想搵到真相。

而家都已經搵到真相，我冇必要再問落去。

「一杯一個問題，唔問就今日成日都冇得問，我出咗呢個門口都唔會再答你任何嘢。」佢拎起我嗰杯：「三。」

「二。」

真相已經出咗嚟，但…





只係一部分。

我接過酒杯，碰咗佢隻杯一嘢就一啖飲曬佢。

「請講。」佢笑一笑，然後都一啖飲曬。

「我想知，個男仔係邊個嚟？」我問佢。

我真係好犯賤，過咗去都係死都要問到底。

但真相重要過件事本身，至少我係咁樣諗。