中六個年 我鍾意左叫我起身個女仔: 是誰(五)

拎完獎搞完一輪，天都黑曬，而運動會都差唔多嚟到尾聲，等大遊行完等體育老師宣佈咗就可以走。

點解運動會要搞到夜晚而唔係搞多一日？好簡單，因為間學校窮啊！

我身後傳嚟兩下拍咪聲，應該係宣佈大遊行開始。

「大遊行準備開始，請有興趣嘅同學落嚟三千米項目嘅起跑線集合。」

果然。





我都唔知大遊行有咩魅力，可以令到幾乎全校落曬去行。

雖然我對大遊行呢單嘢完全冇興趣，但以往我都會比班主任強逼落去行一圈。

不過，今日佢點逼我都唔會落去，因為我有更重要嘅嘢要做。

班主任行緊上嚟，喺佢上到一半嘅時候我已經開口：「唔去。」

講完，我就即使攤低扮瞓，但雙眼留返一條線。





佢黑曬面咁轉身落返去，一轉入離開看台嗰條樓梯嘅時候我就即刻彈返起身。

我望住啊澄同啊晴，心諗：你兩個一定要落去。

過咗一陣，啊澄同佢啲朋友就跟班主任一齊落咗去，而啊晴就拉咗兩個姊妹陪佢。

我即刻衝落去，第一時間摷咗啊澄個袋先。

佢今日帶嘅係細袋，一開就見到裡面有一枝哮喘藥喺到。





咁證明啊澄有哮喘，但都唔可以肯定係佢。

我再行落幾行摷埋啊晴個袋，喺暗格搵到一枝哮喘藥。

吓，即係佢兩個都有哮喘？

我望落去，喺人海之中搵到啊澄同啊晴。

佢兩個應該都已經行咗一圈，應該行到埋我呢邊就會上返嚟看台。

我而家諗到嘅辦法就係賭佢哋其中一個，將我手頭上枝藥擺落其中一個個袋到，然後一間再睇佢哋反應。

我覺得唔會一直都係啊晴，所以今次我決定賭啊澄。

過咗一陣佢哋就上返嚟，我第一時間𥄫實啊澄。





佢個袋好細，但佢打開之後望咗好耐先閂返埋。

感覺上有啲古怪，但又冇明顯證據指明啲咩。