中六個年 我鍾意左叫我起身個女仔: 相信(九)

我知啦！

粉麵係一定有湯，而且食嘅時候一定會彈湯，除非真係食得好小心。

而喺白色嘅運動衫上面，呢啲湯跡會明顯到不得了。

我即刻起身落去行咗個圈，明顯見到啊澄件衫上面有一點紅色嘅湯跡，而啊晴件衫咩都冇。

另一樣嘢就係燒味鋪通常有浸燒味味，食完件衫一定會吸到少少。





我喺啊澄後面扮行過，經過佢嘅時候彎低腰。

完完全全一啲燒味味都冇，肯撚定冇去過燒味鋪。

我對住啊晴用返同一招，可以隱約聞到有叉燒嘅氣味。

答案已經呼之欲出，但…

點解？





以依家呢個情況嚟講，佢應該好憎我，而相反地啊澄對我嘅好感度應該會高少少，所以比較大機會買飯比我嘅都應該係啊澄。

仲有一樣好重要嘅嘢就係理論上啊晴唔會特登行上嚟睇我，因為我同佢相隔至少十排，所以都唔會知我喺上面瞓著咗。

仲有一樣好重要嘅嘢。

「佢無啦啦幫我買飯係想點？」

佢係純粹唔捨得我，想默默照顧我？感覺唔似係。





佢係想諗辦法同我講返嘢？應該都唔係，因為如果係嘅話佢一直會直接認。

我思考咗一陣，然後諗起「人心隔肚皮」呢句嘢，之後就決定放棄思考呢件事。

放棄思考唔代表唔理，因為我決定要直接去問啊晴。

我行落去，嚟到啊晴面前。

我深吸一口氣，鼓起勇氣：「啊晴。」

「做咩？」

「你係咪有嘢要同我講？」

「冇，做咩？」





「咁我返去啦。」

講完，我就行返去側邊嘅樓梯，準備行返上去。

「你係咪冇嘢要同我講？」我再問一次。

我聽唔到佢講嘢，淨係見到佢扤咗扤頭。

我轉身行咗兩步，我就聽到啊晴叫緊我個名。

我再一次轉身面向啊晴：「做咩啊？」

「都係…冇嘢啦。」





唔知點解，我好想佢有嘢要同我講。