中六個年 我鍾意左叫我起身個女仔: 相信(四)

我同佢坐喺到你眼望我眼，大家一齊喺到等死。

過咗一陣，紋身佬就推住架餐車出嚟，好似好Pro咁。

佢將我哋啲嘢擺上枱，過程中我有一下幻覺見到隻碟裝住嘅係老鼠藥。

「開鋪無耐，食完可以比啲意見。」佢望住我兩個講。

講完，佢就行咗返廚房，然後就傳嚟斬嘢嘅聲。





事實上我唔知佢斬緊咩，因為…都冇人。

我望一望枱面上面嘅嘢食，我開始懷疑人生，而對面嘅啊澄都眼神已死。

豆漿的確係枝裝，但裡面起曬一塊塊嘢，好似豆腐花咁，而白粥就黃色嘅。

我諗住望下啊澄啲嘢食會唔會好少少，點知佢嗰邊都唔弱。

乾炒牛河冇牛，啲河就黑色嘅，而杯凍奶茶就白色嘅。





我喺櫃桶拎咗對筷子出嚟比啊澄，兩對筷子上面都有黑色一點點嘢，唔知係設計定真係污糟，但我選擇相信係前者。

既然都係要痛苦，不如就快快手食完佢算數。

我係咁諗，啊澄都係咁諗。

我哋兩個唔洗十分鐘就食曬所有嘢，暫時未有生命危險。

食完早餐先八點半，運動場就喺隔離，但係九點先可以返去，仲有成半個鐘。





「你有冇嘢要問我？」啊澄問我。

「梗係有。」我揮咗揮手：「老細要杯水啊唔該！」

我決定飲啖水慢慢講，因為我要問嘅嘢實在太多。

「收到！」紋身佬喺廚房嗌返出嚟。

佢將兩杯水擺上枱，驟眼睇應該冇寄生蟲。

我飲咗啖水：「你講你做咩要拆散我兩個？」

佢冷笑一聲：「第一件事，你兩個根本都唔夾。第二件事，你哋兩個自己都呃大家。」

「咁關你咩事？呢啲我哋會自己搞掂。」





「仲有第三件事。」

「請講。」

「我想溝你。」

我有啲意外，但又唔係好意外，因為我都估到。

有條女無啦啦過嚟拆散人哋，唔係想搶仔唔通屎忽痕搵嘢拆咩。

「點解？」

但我更想知嘅唔係佢想做咩，而係有咩原因。