中六個年 我鍾意左叫我起身個女仔: 相信(三)

我踎喺枱底，諗住搏佢睇唔到。

「你睇唔到……」我喺到自言自語。

然後…

佢直接坐咗喺我對面。

「喂，你變態架？上返嚟啦。」佢踢咗我一腳。





我知佢冇瞄準過，但佢嗰腳準確命中我條嘢。

我痛到忍唔住嗌咗聲，撳住下面趴咗喺到。

「快啲起身啦，你再唔起身我報警架喇。」佢再踢一腳。

仆你個街，咁準嘅？連續命中同一個點兩次，香港足球界欠你一個交代。

我諗住慢慢爬起身坐返上櫈，然後…





仆你個街，甴曱啊！

「我屌！」我忍唔住鬧出聲。

我嚇到成個人彈起，隻甴曱都比我嚇到衝咗出去。

「呯！」

我個頭一嘢撞咗落張木枱到，嗰一下撞擊聲同打樁機有得揮，差少少就腦震盪。





我慢慢爬返上張櫈到，一手撳住後腦，一手撳住下面。

「你搞咩啊？」佢用力合埋個嘴：「運動會要Cosplay咩？」

「你講咩啊？」我喺到捽個頭。

「一隻手擺後腦，一隻手擺下面，咪MJ囉。」

「你踢咗我弱點兩下，我都未同你計。」我望住佢，眼神已死。

諗住一餐飯就當咩事都冇發生過？可以，我最鍾意人哋請我食飯。

「咁呢餐我請，當補數。」佢拎個餐牌出嚟。

但係請食飯食埋啲咁嘅嘢，會唔會有少少…





「你不如請我食屎？」我喺到自言自語。

「你講咩啊？」

「冇啊，我話嗌得咋嘛。」

點解連餐牌都未睇就嗌得？睇嚟都冇用，因為除咗白粥同白飯原則上唔會炒之外，我估計其他嘢佢都係拎碟屎出嚟。

「咁嗌啦。」佢揮咗揮手。

紋身佬行咗出嚟：「食咩啊？」

「Lady first。」我微笑點頭。





「乾炒牛河，凍奶茶。」啊澄擺返好張餐牌。

勇猛，留名等睇你一間痾爆個廁所。

「白粥，豆漿。」我嗌咗兩個唔會炒車嘅嘢。

豆漿通常都係枝裝嗰啲，應該都唔會出事。​​​​​​​