中六個年 我鍾意左叫我起身個女仔: 鏡頭下的你

「食完咁行得未？」我問佢。

「嗯！」佢放咗隻手落地下，又拎返起。

我企起身望住佢：「做咩呀？」

「你拉我起身啦，唔想整污糟隻手，一間仲要影相。」佢比咗整黑咗少少嘅雙手我睇。

「好啦好啦。」我伸出雙手。





佢捉住我，我一嘢發力就拉咗佢起身。

「你有冇咩特別位要影架？」我問佢。

「冇呀，影到靚相就得架啦。」佢喺下巴擺咗個剔扮可愛。

「好啦，咁你慢慢行，我喺你後面Freetyle啦。」我拎起相機。

有人話鏡頭有神奇嘅功用，我原本都唔信，今日終於知呢樣嘢係真架。





我開始校個鏡頭，諗住影幾張有朦朧美Feel嘅相。

「再矇啲？」我喺度自言自語，然後將個鏡頭再校矇咗少少。

再矇咗少少之後都好靚，不過就好似有啲怪怪地，但係又講唔出邊度怪。

我諗咗陣，然後終於知道點解。

係鹹片，啱啱咁矇嘅係鹹片畫質。





我企喺原地繼續校部相機，當我校好再望返向前面嘅時候，佢已經行到好遠。

我跑返上前，嚟到佢側邊：「行咁快點影啊？」

「對唔住囉，人地冇為意你整緊部機呀嘛。」佢用一個楚楚可憐嘅眼神望住我。

唔係，唔可以用楚楚可憐咁簡單嚟形容，佢嗰種眼神就好似返工比人連續屌足廿四個鐘之後會出現嘅眼神。

唔好話我，真係連單細胞生物見到佢都心痛到唔想再鬧佢。

「冇事冇事，你繼續行啦。」我再次拎起相機。

平時就咁睇人哋啲長頭髮比風吹亂，就成個癲婆咁，而家用鏡頭睇唔知點解就好似好正咁。

講真，睇佢啲頭髮咁樣比風吹一吹，我真係有少少鳩動⋯I mean心動。





當然睇之餘我都有做嘢，喺我哋行到堤壩另一邊呢段路我都影咗大概有一百張，雖然唔知佢過目完會淨返幾多張，但我估應該唔會太差。