中六個年 我鍾意左叫我起身個女仔: 運動會訓練（二）

老實講，我對自己嘅發揮唔抱任何期望，唯一希望就係唔好跑到一半暈低。

我開頭跑得唔算快，但都叫跑緊，但係過左大約一半路程之後，無論係我啲肌肉定係呼吸系統都接近Full load，係每行一步都痛苦到想死嘅情況下，我照樣用我嘅意志力撐住，但係即使我動用曬我所剩無幾嘅意志力，我嘅身體同我嘅想像都係有啲出入，已經Full load嘅肌肉冇曬力，我直接冧低，瞓咗係地下。

就算我有幾唔想認廢，事實就係我冇力企返起身。

既然都瞓低左，不如就…瞓好啲？

我攤開雙手雙腳，大字形咁瞓喺地下，每個經過嘅人都好似望癡線佬咁望住我。





喺我舒服咁瞓係到嘅時候，一個我最唔想而家出現嘅人出現左。

係向晴，佢都係嚟跑步，希望佢千其唔好睇到我，雖然好似冇咩可能。

佢向住我呢邊慢慢跑過嚟，我諗住起身扮冇事，但係我個身完全冇反應，只能夠等佢嚟到我身邊。

佢踎左落嚟：「你冇嘢呀嘛？」

我忍住痛，用手扶住圍柵，出盡奶力先企返起身。





我用手托住個頭，扮曬輕鬆咁：「梗係冇事，啱啱隻腳抽筋咋嘛。」

佢「哦」咗一聲，之後就繼續向住碼頭跑。

屌，真係尷撚到癲，我今次真係水洗都唔清。

算啦，我點都改變唔到已經發生左嘅事，都係睇下我呢一半跑咗幾耐先啦。

係七分鐘，照咁計，跑三千米就要十四分鐘，但係因為體力嘅消耗，後半段會再跑慢啲，所以我預計要用十六分鐘先可以跑完三千米。





簡單啲講，情況唔樂觀，但都係嗰句…

「既然避唔到，咁就捱過佢。」