我想喺夜場搵真愛，你陪唔陪我癲？: 番外篇-社工

琴晚同啊晴飲完，醉到不省人事。

酒醒之後，外展社工話好耐冇見過我，於是就約咗我出去。

「喂，啊熙。」

「係我啊。」

「近排同女朋友點啊？」





「冇啊，散咗啦。」

「做咩散咗啊？」

「冇自信、太小氣、太黐身、太小朋友。」

「第一個問題，你會講你讀毅進先定寫嘢先？」

「讀毅進，做咩？」





「問題一出咗嚟。」佢繼續講：「咁你出嚟玩會唔會玩得放？」

「唔太放。」

「佢呢？」

「佢放啲。」

「下一個問題，你想要點嘅愛情？」





「我可以黐住佢，唔洗諗咁多。」

「明白。」

「咁有咩建議？」

「你咁諗啦，你的確係好小朋友，因為你講緊嘅根本唔係成年人嘅愛情，成年人唔洗黐先，互相支持、一齊進步就得啦。」

「然後？」

「就算你唔小朋友，你兩個都好似唔太夾。」

「真係咩？」

「而家嚟睇唔夾。」





「仲有咩建議？」

「每一次分手，都係上咗一堂。」

「跟住？」

「呢一刻你更加要去做好自己，成為一個更好嘅人。」

「嗯。」

「愛情唔係用嚟打沉你，而係令你變得更好。」

「嗯。」





「如果呢一段愛情，令你變得更好，咁又何嘗唔係一件好事？」

「嗯。」

「其實你唔Ready都唔接受有人嚟愛你。」

「點解？」

「因為你自己都唔愛自己，都唔知點比人愛。」

「你又知？」

「識你咁多年，點會唔知你啲嘢。」

「真咩？」





「梗係啦，得你自己唔在意自己咋。」