我想喺夜場搵真愛，你陪唔陪我癲？: 三十二.

「唔好笑啦大佬，重手咗少少啫。」我有啲無奈。

「好啦好啦，唔笑唔笑。」我個FD吸咗大大啖煙，然後終於停到笑。

「我好迷。」枝煙到底，我完全唔知自己食緊乜鳩。

「睇得出。」佢將我手上嘅煙拎走，彈落地下：「熄撚曬都有得你吸。」

「有冇咩意見比到我啊葉師傅？」我準備講發生咗咩事。





「得，聽我講。」佢無諗住比我講落去：「順住行落去就得啦，唔識就咩都唔好講，等佢搵你。」

「吓，認真咩？」講真，我0信。

佢嘆咗啖氣：「傻仔，你哋做咩嚟呀？」

我諗住開聲，但係比佢打斷咗。

「唔洗講，你失蹤咗成晚，心照啦。」





「你有搵我咩？」我睇咗睇電話。

好，真係有，電話定Whatsapp都有。

佢反咗個白眼：「佢無嘢會唔會無啦啦搵你搞啊？」

「我鬼知你哋啫。」

「人哋一開始就坐你隔離喇。」佢個白眼已經反到去後腦：「為扑嘢都唔係直接搵你啦，搏洗眼咩？」





好似比佢講到好衰，但…

駁唔到。

「唔洗諗咁多，等佢出手你再接就得。」佢拍咗拍我膊頭。

「明曬。」

講係咁講，但我都係覺得佢唔會主動出手，不過…

都係聽佢講啦，因為我自己都知自己0識。