我想喺夜場搵真愛，你陪唔陪我癲？: 二十九.

「我而家知，但嗰陣唔知呀嘛。」我有少少無奈。

「好似又係。」

「如果我真係PlayBoy，又真係想食你嘅話，我就唔會攬住你坐成晚啦。」

「但係你唔係有摸我咩？」佢問我。

「邊有。」





冇醉曬，都有少少醉啦，博返個大霧先啦。

「從實招來。」

好，柒咗，柒曬。

「係，我有。」我有少少內疚：「Sorry。」

「冇事啦，你好乖架喇。」





我用頭抆咗抆佢，好似狗仔比人讚完之後咁。

「好啦，瞓啦乖狗。」佢摸咗摸我個頭。

佢搭住我，我攬住佢，呢種感覺除咗幸福，我諗唔到第二個字嚟形容。

我好快就瞓着咗，繼續喺夢裡面搵佢。

我同佢喺條街到行，之後入咗一間賣手工嘢嘅鋪頭。





我拎起貨架上面一個狗骨造型同一個柴犬造型嘅髮夾：「呢個啱你喎！」

「咩呀，明明你先係狗。」佢反咗個白眼。

「咁你咪即係將我戴喺你個頭上面？」

「好似又係。」佢拎住兩個髮夾：「咁…」

我直接搶走兩個髮夾：「唔好諗啦，買啦。」

講完，我就直接衝咗去收銀台比錢。

然後…

我就醒咗喇，佢叫醒咗我。