殘酷暗戀物語【最終部曲】: 難道我還未夠難
｛難道我還未夠難—葉巧琳｝
「聽朝一齊返學，早啲出門口買埋早餐返去食？」返到屋企之後無耐，郭家朗打俾我，佢話要傾到我瞓覺為止，因為佢擔心我又會遇到啲唔開心嘅事。
「嗯，好吖。」雖然我哋隔住電話，但佢只係住喺我下面嗰層，我哋睡房個間隔又係一樣，感覺上就好似住喺同一間複式單位咁。佢同我講，只要我伸手掂落地板，佢又同時伸手掂上天花板，我哋就可以拖住手。
「我瞓覺喇～早抖。」
「聽日見。」
＊＊＊＊＊＊＊＊＊＊＊＊
第二日朝早，我比平時更加早起身，梳好個頭，落足心機紥好條孖辮，化咗少少淡妝，搽好唇膏之後，換埋條校裙就出發，一開門差啲嚇親我，見到郭家朗粒聲唔出咁，擺晒甫士挨住咗喺我門口對面幅牆度，搞到我忍唔住笑，有冇必要咁型吖你。
我哋買咗一人一份三文治做早餐，郭家朗問我想唔想喺學校Canteen一齊食埋先上班房，但係我擔心如果比其他同學見到會唔係咁好，於是乎我哋去到走廊就講拜拜，各自番返自己班房入面。
行到去班房門口嗰陣，我已經聽到班房入面傳出一陣陣嘈吵聲音，原來係班同學圍住黑板上面幾張相喺度議論紛紛，我一頭霧水咁探頭望吓有咩好睇，仔細一望發現總共有六張相用磁石貼痴住響度，全部都係影住嘅係排球隊儲物室正門。
第一張係保安叔叔解開鎖頭嘅畫面，第二張係一個著住校服嘅男仔推開度門四圍張望嘅模樣，第三張就係個男仔轉身入返儲物室，最後三張都係個男仔拖住個著住校裙嘅女仔喺儲物室走出嚟。雖然啲相唔算好清，但都足夠認得出相入面嘅女主角就係我，因為全班得我一個係紥孖辮，而且全部都係菲林相有晒日期時間做註腳。
「張相個女仔咪就係王樂兒？」戴住眼鏡嘅男仔接住講。
「似係喇！我之前都話，早兩日咪俾訓導捉過佢夜晚匿喺學校...」一個著住背心冷衫嘅男仔手舞足蹈咁分享緊佢嘅見聞。
「睇唔出原來王樂兒係咁淫，咁係咪啫係佢同呢個男仔喺學校過夜？」另一個生得矮啲肥啲嘅男仔插嘴。
我聽到佢哋講嘅嘢開始越嚟越難聽，突然之間控制唔到情緒向住佢哋大嗌：「我冇吖！！！」跟住衝入人堆將啲相搣晒落嚟，直接扔喺最近嘅垃圾桶裡面，當大家發現原來我喺度之後，就各自扮冇事散開。
扔完啲相，我擰返轉頭見到啲磁石貼因為我頭先搣相太大力，搞到佢哋跌到一地都係，我望住佢哋散落喺地下覺得好內疚，於是就踎低身，逐塊逐塊咁執返起佢哋，執執下我發現，我隻手一直喺度顫抖，地下亦都多咗一滴又一滴嘅眼淚。
我強忍住眼淚，執好啲磁石貼痴返喺黑板之後，就耷低頭行返埋位，僕低頭喺張枱度喊，但係我唔想俾啲同學知道我喊緊，我用盡力壓低自己身體抽搐嘅幅度。
我冇？我點會冇吖，根本上就係完全俾人揭發咗件事出嚟。我諗返起，嗰晚區嘉桐同訓導主任入到嚟儲物室，雖然我同郭家朗匿咗入更衣櫃裡面，冇俾佢哋當場發現，但始終我個書包漏咗喺外面俾區嘉桐見到，所以佢更加肯定當時我係在場，只係好彩最終訓導主任放棄繼續搜索，我哋先至逃過一劫。
嗰晚家朗同我講過，佢估道木門係區嘉桐故意閂埋，佢亦都擔心區嘉桐會喺第二朝專登埋伏喺儲物室正門等我哋行出嚟，假如佢真係咁做，其實我哋都冇任何對策可以破解，唯一方法係家朗先行出儲物室，確認四周無人再叫我出嚟，最後分開各自行返自己班房。
我哋慶幸嘅係，嗰朝早區嘉桐並冇出現，我哋以為喺無人發現之下成功走得甩，但原來我哋錯了，仲要係徹底咁錯。所以，影呢幾張相嘅應該就係區嘉桐。
「若要人不知，除非己莫為！」我聽到前面有把女聲字字鏗鏘咁嘲諷緊我，抬高頭一望，就係區嘉桐本人，我俾佢見到晒我喊緊個樣，跟住佢好得戚咁行返埋佢個位坐。然後又見到曾皓賢孭住背囊行入班房，佢察覺到我唔妥，就即刻衝埋嚟我前面個位坐底問我發生咩事。
我只係擰擰頭講：「我冇事。」
佢再追問我：「冇事做咩喊到對眼紅晒？」俾佢咁講我先知道原來我喊到好明顯，正當想拎部電話出嚟照吓自己個樣嘅時候，學校大鐘就響起。
曾皓賢留低一句：「一陣再搵你講。」之後就即刻飛奔返佢個位度。
呢刻我只想盡快平伏返自己個情緒，同時希望越少人知道越好。不過我都清楚紙係包唔住火，遲早全級都會知道，而且上緊堂嗰陣，我依然可以聽到啲男同學仲喺背後講緊我。
小息嗰陣，我行出去走廊，諗住吸下新鮮空氣，點知道區嘉桐走過嚟同我講：「我而家就去教員室將條片交俾訓導主任！等佢知道上一次唔係我屈你，係你真係有匿咗喺入面，仲要匿咗成晚！」區小姐啊，其實我都冇得罪過你，點解你成日都針對我，喺排球隊又係咁，喺班上面又係咁。
而我本能反應只係慌張咁衝上去，求佢唔好咁做，縱然呢個可能就係區嘉桐想見到咁嘅場面。
「區嘉桐！你同我企喺度！」就喺呢刻，郭家朗唔知響邊度走出嚟，擋喺區嘉桐面前喝住咗佢。
「做咩吖郭家朗？唔通你想打我吖？王樂兒佢冇做過嘅怕咩人知？」區嘉桐理直氣狀咁頂撞返郭家朗。
走廊啲同學開始望住我哋，我未見過郭家朗個樣咁嬲，就連上次頂撞訓導主任嘅時候都冇咁嬲，我好驚佢會衝動做錯事。我睇得出其實區嘉桐由頭到尾都係針對我一個，所以我唔想拖埋郭家朗落水，我唔想因為咁而令到區嘉桐討厭佢，我唔想因為咁而俾班同學估到相入面個男仔就係佢，然後對佢指指點點。
我用我僅餘嘅氣力扯一扯區嘉桐衣袖，細聲咁求佢：「我去自首吖，你可唔可以唔好交條片出嚟。」只見郭家朗瞪大眼睛望住我，意思係問我係咪傻咗？
咁呢一刻我都冇得揀㗎喇。
呢個時候，曾皓賢走埋嚟我哋度，喺區嘉桐耳邊淡淡然講咗幾句，然後就繼續行去廁所方向，跟住區嘉桐眼神向我閃過一下怒光，之後就氣沖沖咁急步行返入課室，當下我同郭家朗四目交投，大家都摸不著頭腦，但估到應該係曾皓賢唔知講咗啲咩，令到區嘉桐收手。我細細聲同郭家朗講：「你返去先喇，我冇事㗎喇。」佢應該都知道再留喺度只會製造更多花生，於是聽我話擰轉頭入返班房。
第二次小息嗰陣，我捉住曾皓賢行出走廊，搵咗個冇咩人經過嘅角落，問佢究竟同區嘉桐講咗啲咩，佢擺出一副笑瞇瞇嘅表情望住我講：「因為我知道區嘉桐嘅秘密，但係呢個秘密幾乎冇人知道，所以我威脅佢如果交片嘅話，就會將呢個秘密話晒俾全班知。」
我好奇地追問：「咁係咩秘密？我可唔可以知㗎？」
佢左右張望查看四下確實無人之後，再哄埋喺我耳邊細細講：「佢暗戀郭家朗。」然後佢再補充：「因為王樂兒你啊，係公認全班第二靚啊嘛，而且你係行清純可愛路線，佢妒忌你搶緊佢鍾意嘅人。」
啊，原來曾皓賢都睇得出我同郭家朗有嘢，咁又係嘅，佢識咗我咁耐，點會估唔到我諗咩吖。不過我內心好感激可以有曾皓賢呢個朋友幫我哋解圍，就算我而家同緊郭家朗拍拖，我都希望可以繼續同佢保持住好好好好朋友嘅關係。只不過就算今次唔使驚動到訓導主任，但係班同學已經知道咗我匿喺學校過夜，呢樣嘢就冇人幫到我解決㗎啦，只能夠透過時間慢慢沖淡。