我無啦啦同隻芝娃娃交換咗身體，跟住無啦啦又遇上喪屍大爆發: （75）

「雖然依家件事搞清楚，但我地點算？我地嘅身體點先可以交換返嚟？」

四眼仔上咗金元彬嘅身，佢最關心呢個問題。

然而能夠處理呢個問題嘅，大概只有泰國巫師一個。

我地坐潛艇離開海底基地，返上陸地後，Chris派出聯合國專機到泰國，特意請巫師過嚟香港。

等緊巫師到臨嘅同時，喺另一邊廂，Irene作為金元彬個女，佢知道金元彬屋企喺邊。





於是就聯同阿明帶聯合國部隊，到自己藍灣半島嘅屋企，搵出治療喪屍病毒嘅解藥。

原來啲解藥係一樽樽噴霧，只要對住喪屍噴一噴，佢地索一索，咁喪屍就會變返正常人。

禍害咗大半個月嘅喪屍危機，總算得以解決。

至於罪魁禍首金元彬變成八爪魚，再俾「美國隊長」踩死，都叫做得到咗佢應得嘅懲罰。

雖然隻八爪魚，但佢嘅罪行仍然會被記錄低。





佢將會成為咗歷史上第一個被定罪嘅動物。

等咗大半日，終於都等巫師乘搭專機嚟到香港。

落機後，佢就坐直升機由機場嚟到柴灣公園。

佢見到我嘅第一反應，就係同我講對唔住，佢為教錯我口訣而道歉。

坦白講，依家諗返轉頭，其實我都唔覺得佢有幾對我唔住。





假如我無呢個交換身體嘅能力，就咁單憑一個普通人，我可能未必能夠喺喪屍橫行嘅世界，生存到咁耐，亦都唔會經歷到普通人一世都唔會經歷到嘅嘢。

例如係做芝娃娃、老鼠同埋八爪魚。

而且，兜兜轉轉交換過咁多次身體，到頭來發現始終都係做自己最好。

巫師道完歉之後，就為我修正並消除嗰句錯誤嘅口訣，令我從此唔再會因被咬，而同人交換身體。

其後，佢就將四眼仔同油頭仔嘅靈魂，送返去各自本來嘅身體。

至於亞狗就無辦法，佢本來芝娃娃嘅身體早就無咗，因此只能上金元彬嘅身。

「汪汪汪！汪汪！」

本來陰濕奸詐嘅金元彬，變成只識吠叫嘅阿叔，呢個反差都有趣。





Irene見到自己「老豆」變成咁就仲開心，一嚟無人再管住佢，唔俾佢做男人。

二嚟以前佢俾老豆恰得多，家吓終於可以恰返「佢」：「Sit！」

亞狗非常聽話，人地叫佢坐就坐，叫佢「hand hand」就遞隻手出嚟。

「哈哈！見你咁聽話，咁我就帶你返屋企啦！」Irene同阿狗講。

「咁我呢？我都好聽話架，不如帶埋我返屋企？」阿明挨落Irene個膊頭。

「妖！邊個話要你？」

「唔好咁啦，帶埋我返歸啦！」





二人一唱一和，帶住亞狗離開公園返去小西灣。

另外油頭仔回歸返自己嘅身體後，亦都俾人帶走。

好在我地逃走嗰陣無炸死人，否則我都可能要受審，我希望佢會被從輕發落。

所有嘢都解決曬，既然係大團圓結局，咁總要有個人負責攬女。

可惜嗰個人唔係我。

喪屍無咗，父仇又報咗，呢一刻「美國隊長」同我女神，喺夕陽之下重聚並熱烈相擁。

場面都幾感人，只不過，我都唔再妒忌呢條鬼佬。

因為我借交換身體嘅能力，搗破犯罪組織呢壇嘢，令我聲名大噪、一夜成名。





嗰個一路同我過唔去嘅四眼仔，原來係做開出版社。

佢主動搵我，想我將成個經歷寫低，然後幫我出書。

即係話唔使好耐，我將會有一本屬於自己嘅自傳！

除此之外，聯合國更邀請我出國演講，到時我求其講兩句就有得溝鬼妹，港女就留返俾條鬼佬啦，哈哈！




（全文完）