我無啦啦同隻芝娃娃交換咗身體，跟住無啦啦又遇上喪屍大爆發: （74）

佢地各人揸住槍，矛頭直指「金元彬」！

上咗金元彬身嘅四眼仔即刻退後，我就以聯合國行動隊伍人員嘅身份，擋喺Chris面前。

「Go away！」Chris叫我走開，並用手推開我。

「汪汪！汪汪汪！汪汪！」上咗油頭仔嘅亞狗，亦都行埋嚟擋住Chris。

Chris嬲到面都紅曬，以為我調轉槍頭，同敵人聯手。





「你冷靜啲聽我講，呢三個人同我分別調換咗身體，我變返自己，佢地三個就撈亂咗，而佢地入面，無一個係金元彬！」

「What the fuck did you say！」Chris露出迷茫同憤怒嘅表情。

要令對方相信身體交換呢件事並唔容易，睇嚟需要多啲證據先得。

然而成件事嘅「始作俑者」就係嗰位泰國巫師。

我打開電話，將佢send俾我嘅訊息show出嚟：





「呢個人係泰國巫師，大約一個月前，我親自去泰國搵佢，請佢作法幫我交換身體！所有嘢都係源於呢一度！」

「Just fuck off！」Chris完全無耐性聽我解釋。

呢啲嘢睇怕口講說不清，既然係咁，唯有就親自俾佢感受一次。

「Chris！Open your mouth！」我再上前攔住佢。

「What？」佢張開口，剛發出個「Wh」音，我就隊兩隻手指入佢個口。





跟住佢一合埋口，啲牙就咬到我嘅手指。

一秒後，我地兩個同時打咗個冷震，互相交換咗身體。

「What…what the fuck！」

當佢見到自己變成咗我，而我又變咗「佢」，當堂嚇咗一驚。

「你依家應該明啦！呢個世界就係有body swap呢啲咁離奇嘅事！」我同佢解釋。

Chris o撚咗嘴，面上嘅表情極度震驚。

我喺佢手上拎過自己部電話，開返巫師發送嘅訊息出嚟。

訊息嘅內容全部係泰文，我以「Chris」嘅身份，問旁邊嘅翻譯員識唔識翻譯。





對方睇咗兩眼，點頭話識，隨即就翻譯咗嗰幾段未讀嘅message。

第一條如下：「對唔住，我發現我教錯咗你念口訣，導致成個『身體交換』程序都出咗錯！你依家嘅情況好危險，一旦被咬就會同人交換身體！」

第二條：「你睇唔睇到我嘅短訊？睇到嘅話請回覆！」

第三條：「本來我打算飛嚟香港，幫你消除句錯誤嘅口訣，可惜睇新聞見到香港出現喪屍，導致無法成行，十分唔好意思。」

呢吓終於都真相大白，原來唔係我搞錯咗步驟，而係個泰國巫師教錯咗我。

我再叫翻譯員用英文翻譯一次，特登係俾Chris聽。

「我同你身體就交換咗，呢度又有證據，你依家信未！」





Chris好肯定咁猛點頭，然後催促我快啲調換返個身體。

於是我叫佢咬返我一啖，跟住大家變回原狀。

回歸返自己嘅身體後，Chris心神仍然未定，不停重複住呢句：「Unbelievable！」

的而且確係令人難以置信。不過事實擺咗眼前，輪唔到你唔信。

假如我早啲俾佢咬，或者就唔使解釋咁多。

「所以你之前講嘅嘢都係真話？你同金元彬交換咗身體，你變成咗佢，佢就變成八爪魚？」Chris借翻譯員把口問我。

「係呀！我真係無講大話架！」

「即係你本來係八爪魚？」佢問。





我搖搖頭否認，跟住將自己變換身體嘅歷程，簡單快速咁講一次。

Chris一邊聽，一邊「Oh my God」咁發出驚歎。

聽我講完一問，佢就問佢最關心嘅問題：「咁隻八爪魚依家喺邊？」

「佢已經瓜咗，條屍就喺呢個基地嘅垃圾站，就同嗰個『美國隊長』一齊。」

「美國隊長？」

「咪就係做間諜嘅二五仔，佢話佢身上有定位追蹤，你地搵到佢就會搵到隻八爪魚。」我回答。

Chris拿拿臨分派人手去搵八爪魚同「美國隊長」。





「另外喪屍病毒嘅解藥，就收埋咗喺金元彬嘅屋企。」我對Chris講。

「你喺邊度收到風？」

「係金元彬個手下同我講架，佢話自己良心發現，希望轉做污點證人。」我指住油頭仔講。

對方立即向我抱以疑惑嘅眼神，佢似乎唔明白點解我要幫佢講說話。

佢係就係有份策劃以及散播喪屍病毒，只不過無佢嘅話，我一定無機會上返自己個身，更無機會企喺呢度講嘢。

所以我想幫返佢一次，當係還個人情。