我無啦啦同隻芝娃娃交換咗身體，跟住無啦啦又遇上喪屍大爆發: （71）

油頭仔帶我離開垃圾站，穿過防火通道，輾轉再返到出去基地外面嘅走廊。

經過一幅掛畫前，油頭仔停低，伸手拎開幅畫。

掛畫嘅背後，喺墻上面鑲嵌住一個保險箱。

油頭仔輸入密碼，打開個箱，喺入面拎咗兩支手槍，同埋一揸銀色嘅鋼珠。

佢將一支手槍同一半鋼珠分比我，與此同時，有兩個聯合國部隊嘅人喺走廊發現咗我地！





對面二人立即用對講機通知其他人，並且掹槍指向我地。

本來我都唔知啲銀色鋼珠有咩用，呢個時候油頭仔就示範咗一次。

佢隨手將三兩粒珠仔拋向前面，啲珠仔一落地就產生爆炸！

威力仲要唔細，炸到地下爛曬，嗰兩條友彈開到幾米咁遠！

爆炸嘅火光消失後，走廊剩返碎片同白煙。





「波士，唔好望啦！走啦！」

「去…去邊呀？」我問油頭仔。

「咁仲使問，梗係離開基地啦！」

「但係門口一定有人把守，我地根本走唔到。」

「我地仲有第二個出口架嘛！」





油頭仔一邊跑一邊對我講：「到時走甩左，返上岸之後，我地就去你屋企攞走啲解毒劑！反正啲解藥一日仲喺我地手上，我地一日都仲有價講。」

我心諗：原來啲解藥放咗喺金元彬屋企。

然而，真正嘅金元彬已經香咗，即係話家陣死無對證，我注定要啃佢呢一隻「死貓」。

我無奈歎一口，跟住油頭仔轉個彎。

結果又遇到聯合國隊伍嘅成員，今次仲要係俾人前後包抄。

睇嚟Chris已經動員所有人嚟捉拿我地。

油頭仔開槍駁火，對付前面三個敵人，我就負責解決後面嗰班。

基於性命攸關，我亦無謂留手，直接飛出幾粒鋼珠，下一秒就「Boom」一聲炸到飛起。





快快手搞掂呢班人之後，我地就繼續前進。