我無啦啦同隻芝娃娃交換咗身體，跟住無啦啦又遇上喪屍大爆發: （70）

「係你害到我無咗個老豆！」

我嬲嬲地鬧返佢轉頭：「頂！你夠搶走我女神！搞到我無咗條女！」

「原來你條二五仔出賣我地不得止，就連波士條女你都溝埋！你都算仆街啦！」油頭仔個頭仲暈緊，仲未起到身。

「都唔知你講乜！我幾時有搶過你女人？」「美國隊長」反駁。

「咪就係一個月之前囉！我追咗一年都追唔到嘅女神，你條友用咗一個禮拜就撬走咗！Fuck you！」





「你唔好諗住轉移話題越講越遠！你快啲答我！點解你當年要恩將仇報，陷害我老豆…」

「我女神本來係屬於我架！如果唔係你半路殺出嚟，我一定溝到佢…」

「你知唔知我嘅童年過得幾咁痛苦…」

「諗返起真係唔抵，我對女神付出咗咁多，竟然最後輸俾你…」

我同對方展開咗「寒戰」式嘅聲疊聲對罵。





大家一輪嘴喺度互屌，鬧到口水都乾先至停落嚟。

油頭仔亦終於都唔再暈，可以企得返身。

佢衝埋嚟想分開我地，可惜都未埋到身，就俾「美國隊長」起腳，踢到佢掩住個肚再跌低。

「你地走唔甩架啦！我身上有定位追蹤裝置，Chris好快就帶人搵到嚟呢度！」Chris對我地講。

而我實在唔想俾人當犯咁拉返去，心諗究竟點先可以證明到自己嘅清白。





「我再講一次，我同金元彬交換咗身體，所以我唔係佢！如果你唔信嘅話，你就咬我一啖，咁我同你都會即刻交換身體！」我嘗試再解釋。

「你呢啲說話傻仔先會信！」

「係真係假，你咬我一啖咪知囉！」

「收嗲啦！我係唔會聽你講架！」「美國隊長」對我嘅說話無動於衷。

眼見𠱁唔到對方落搭，咁唯有轉第二啲方法。

既然軟嘅唔得，咁就用硬嘅！

我靈機一觸，將個頭向後一chok，用後尾枕撞落對方塊面度。

呢招都算係「傷敵一千自損三百」，我後尾枕咁撞法都好痛。





結果撞第一吓，條友都未肯鬆手，跟住再向後撞，撞到第八第九吓，條友先肯鬆開手。

我同佢都撞到頭暈暈，雙方都掩住個頭，好似啲醉酒佬咁，腳步浮浮咁企唔穩。

就係咁啱得咁「橋」，「美國隊長」褪咗兩步，隻腳一唔為意，踩中地下嗰隻垂死嘅八爪魚，成個人當堂跣親向後仆。

仆落地嗰吓，佢個頭「咚」一聲撼落地下，令佢徹底咁昏迷過去。

本來隻八爪魚已經奄奄一息，俾人咁樣再踩多腳，直接瓜埋。

咁樣一嚟「美國隊長」算係報咗父仇，二嚟佢又暈低咗，俾我同油頭仔有機會逃走。